Thiruvananthapuram , 10 ഓഗസ്റ്റ് (H.S.)

തിരുവനന്തപുരം: ശബരിമലയിലെ നെയ്യ് വിതരണവുമായി ബന്ധപ്പെട്ട് ഉയർന്ന കടുത്ത ക്രമക്കേട് ആരോപണങ്ങളിൽ തിരുവിതാംകൂർ ദേവസ്വം ബോർഡ് ആസ്ഥാനത്ത് വിജിലൻസിന്റെ മിന്നൽ പരിശോധന. ബോർഡ് പ്രസിഡന്റിന്റെ ഓഫീസിൽ കേന്ദ്രീകരിച്ചാണ് വിജിലൻസ് സംഘം തിങ്കളാഴ്ച പരിശോധന നടത്തിയത്. മുൻ ദേവസ്വം ബോർഡ് പ്രസിഡന്റ് പി.എസ്. പ്രശാന്ത് അധ്യക്ഷനായിരുന്ന കാലയളവിലെ പ്രധാനപ്പെട്ട ഭരണപരമായ തീരുമാനങ്ങളും ഫയലുകളുമാണ് ഉദ്യോഗസ്ഥർ വിശദമായി പരിശോധിച്ചത്.

ഇന്ന് ഉച്ചയോടെയാണ് പ്രത്യേക വിജിലൻസ് ഉദ്യോഗസ്ഥ സംഘം തിരുവനന്തപുരത്തുള്ള ദേവസ്വം ബോർഡ് ആസ്ഥാനത്തെ പ്രസിഡന്റിന്റെ ഓഫീസിലെത്തിയത്. മണിക്കൂറുകളോളം നീണ്ട പരിശോധനയ്ക്കൊടുവിൽ കേസുമായി ബന്ധപ്പെട്ട നിർണ്ണായക ഫയലുകളും രേഖകളും ഉദ്യോഗസ്ഥർ ശേഖരിച്ചു. ആവശ്യമായ തൊണ്ടിമുതലുകളും വിവരങ്ങളും ശേഖരിച്ച ശേഷം വിജിലൻസ് സംഘം മടങ്ങുകയായിരുന്നു.

പ്രശാന്തിനെയും അജികുമാറിനെയും പ്രതിചേർക്കാൻ നീക്കം

ശബരിമലയിലെ അഴിമതിയുമായി ബന്ധപ്പെട്ട കേസിൽ മുൻ ദേവസ്വം ബോർഡ് പ്രസിഡന്റ് പി.എസ്. പ്രശാന്ത്, ബോർഡ് മുൻ അംഗം അജികുമാർ എന്നിവരെ പ്രതിചേർക്കാനുള്ള നീക്കത്തിലാണ് വിജിലൻസ് എസ്.പി.യുടെ നേതൃത്വത്തിലുള്ള സംഘം. ഇതിന്റെ മുന്നോടിയായാണ് ഔദ്യോഗിക രേഖകൾ പിടിച്ചെടുക്കുന്നതടക്കമുള്ള നടപടികളിലേക്ക് വിജിലൻസ് കടന്നിരിക്കുന്നത്.

ശബരിമലയിലെ ഏറ്റവും പ്രധാനപ്പെട്ട വഴിപാടുകളിലൊന്നായ നെയ്യ് വിതരണത്തിലും സംഭരണത്തിലും വൻതോതിൽ അഴിമതിയും സാമ്പത്തിക ക്രമക്കേടും നടന്നതായി നേരത്തെ തന്നെ ആരോപണങ്ങൾ ഉയർന്നിരുന്നു. അന്നത്തെ ദേവസ്വം ഭരണസമിതിയുടെ ഒത്താശയോടെയാണ് ക്രമക്കേടുകൾ നടന്നതെന്ന സംശയത്തെ തുടർന്നാണ് വിജിലൻസ് അന്വേഷണം വ്യാപിപ്പിച്ചത്. കേസിൽ കൂടുതൽ വ്യക്തത വരുത്തുന്നതിനായി അന്നത്തെ തീരുമാനം അടങ്ങിയ മിനിറ്റ്സുകൾ, ടെൻഡർ നടപടികളുടെ ഫയലുകൾ, സാമ്പത്തിക ഇടപാടുകളുടെ വിവരങ്ങൾ എന്നിവയാണ് വിജിലൻസ് തിങ്കളാഴ്ച പിടിച്ചെടുത്തത്.

ബോർഡ് വൃത്തങ്ങളിൽ വലിയ പരിഭ്രാന്തി

ദേവസ്വം ബോർഡ് ആസ്ഥാനത്ത് വിജിലൻസ് ഉദ്യോഗസ്ഥർ നേരിട്ടെത്തി പ്രസിഡന്റിന്റെ ഓഫീസിൽ പരിശോധന നടത്തിയത് ജീവനക്കാർക്കിടയിലും നിലവിലെ ഭരണസമിതി അംഗങ്ങൾക്കിടയിലും വലിയ ഞെട്ടലുണ്ടാക്കിയിട്ടുണ്ട്. ശബരിമലയിലെ നെയ്യ് ക്രമക്കേടിൽ വൻകിട കരാറുകാർക്കും ഉന്നത ഉദ്യോഗസ്ഥർക്കും പങ്കുണ്ടെന്ന ആരോപണം നേരത്തെ തന്നെ ഉയർന്നിരുന്നു.

മുൻ പ്രസിഡന്റിനെയും ഭരണസമിതി അംഗത്തെയും കേസിൽ പ്രതിചേർക്കുന്നതോടെ അന്വേഷണം മറ്റ് ഉന്നതരിലേക്കും വ്യാപിപ്പിക്കാനാണ് വിജിലൻസിന്റെ തീരുമാനം. വരും ദിവസങ്ങളിൽ കേസിൽ കൂടുതൽ പേരെ ചോദ്യം ചെയ്യാനായി വിജിലൻസ് നോട്ടീസ് അയക്കുമെന്നാണ് സൂചന. നിർണ്ണായക ഫയലുകൾ പരിശോധിച്ച ശേഷം വിജിലൻസ് അന്വേഷണ സംഘം വിശദമായ റിപ്പോർട്ട് ഉടൻ തന്നെ കോടതിയിൽ സമർപ്പിക്കും.

---------------

Hindusthan Samachar / Roshith K