Kochi , 11 ഓഗസ്റ്റ് (H.S.)

അറസ്റ്റ് സുപ്രീം കോടതി വിധിയുടെ ലംഘനമെന്നും, പ്രതിക്ക് മുൻകൂട്ടി നോട്ടീസ് നൽകുന്നതിൽ പോലീസ് വീഴ്ച വരുത്തിയെന്നും തിരുവനന്തപുരം എസിജെഎം കോടതി ഉത്തരവ്.

തിരുവനന്തപുരം: അധിക്ഷേപ പരാമർശവുമായി ബന്ധപ്പെട്ട കേസിൽ അറസ്റ്റിലായ ആർഎസ്എസ് സഹയാത്രികനും ചിന്തകനുമായ ടി.ജി. മോഹൻദാസിന് ജാമ്യം. തിരുവനന്തപുരം അഡീഷണൽ ചീഫ് ജുഡീഷ്യൽ മജിസ്ട്രേറ്റ് (എസിജെഎം) കോടതിയാണ് അദ്ദേഹത്തിന് ജാമ്യം അനുവദിച്ചത്. പോലീസിന്റെ ഭാഗത്തുനിന്നുണ്ടായ ഗുരുതരമായ നിയമലംഘനങ്ങളും വീഴ്ചകളും ഓരോന്നായി എണ്ണിപ്പറഞ്ഞുകൊണ്ടാണ് കോടതി ജാമ്യ ഉത്തരവ് പുറപ്പെടുവിച്ചിരിക്കുന്നത്.

അറസ്റ്റ് നടപടികളിൽ പോലീസ് കാട്ടിയ അവധാനതയില്ലായ്മയും നിയമപരമായ വീഴ്ചകളും വ്യക്തമാക്കുന്നതാണ് എസിജെഎം കോടതിയുടെ പരാമർശങ്ങൾ.

സുപ്രീം കോടതി നിർദേശങ്ങളുടെ ലംഘനം

ടി.ജി. മോഹൻദാസിനെ അറസ്റ്റ് ചെയ്ത രീതി സുപ്രീം കോടതിയുടെ മുൻകാല വിധികൾക്കും ഭരണഘടനാപരമായ മാർഗനിർദേശങ്ങൾക്കും തീർത്തും വിരുദ്ധമാണെന്ന് കോടതി വിലയിരുത്തി. വ്യക്തിസ്വാതന്ത്ര്യം സംരക്ഷിക്കുന്നതിനായി രാജ്യത്തെ പരമോന്നത കോടതി മുന്നോട്ടുവെച്ച നിർദേശങ്ങൾ അന്വേഷണസംഘം പൂർണമായും അവഗണിക്കുകയായിരുന്നു.

നോട്ടീസ് നൽകിയാൽ പ്രതി ഒളിവില് പോകുമെന്ന പോലീസിന്റെ വാദം അംഗീകരിക്കാൻ കഴിയില്ലെന്ന് കോടതി വ്യക്തമാക്കി. നിയമപ്രകാരം മുൻകൂട്ടി നോട്ടീസ് നൽകാതിരുന്നതിന് തൃപ്തികരമായ ഒരു ന്യായീകരണവും കോടതിക്ക് മുന്നിൽ നിരത്താൻ അന്വേഷണ ഉദ്യോഗസ്ഥർക്ക് സാധിച്ചില്ല. ഇത്തരം ന്യായങ്ങളില്ലാത്ത നടപടികൾ പൗരന്റെ അവകാശങ്ങൾക്കുമേലുള്ള കടന്നുകയറ്റമാണെന്ന് ഉത്തരവ് അടിവരയിടുന്നു.

കസ്റ്റഡി അപേക്ഷ തള്ളി

കേസുമായി ബന്ധപ്പെട്ട് ടി.ജി. മോഹൻദാസിനെ കസ്റ്റഡിയിൽ വാങ്ങി ചോദ്യം ചെയ്യണമെന്ന പോലീസിന്റെ അപേക്ഷയും കോടതി തള്ളി. നിലവിലുള്ള നിയമങ്ങളിൽ നിന്നും വ്യവസ്ഥാപിത രീതികളിൽ നിന്നും വ്യതിചലിച്ചുകൊണ്ട് പോലീസിന് കസ്റ്റഡി ചോദ്യം ചെയ്യൽ അനുവദിക്കാനാകില്ലെന്ന് എസിജെഎം കോടതി വ്യക്തമാക്കി.

വ്യക്തമായ തെളിവുകളോ നിയമപരമായ തടസ്സങ്ങളോ ഇല്ലാതെ പ്രതിയെ കസ്റ്റഡിയിൽ സൂക്ഷിക്കുന്നത് നിയമവിരുദ്ധമാണെന്ന് കോടതി ഉത്തരവിൽ ചൂണ്ടിക്കാട്ടുന്നു.

പോലീസിന് കടുത്ത തിരിച്ചടി

അന്വേഷണ ഏജൻസികൾ നിയമത്തിന് അധീനമായി മാത്രമേ പ്രവർത്തിക്കാവൂ എന്ന ഓർമ്മപ്പെടുത്തലാണ് ഈ ജാമ്യ ഉത്തരവ്. വിചാരണയ്ക്കോ ചോദ്യം ചെയ്യലിനോ വിളിച്ചുവരുത്തുമ്പോൾ പാലിക്കേണ്ട അടിസ്ഥാന നടപടിക്രമങ്ങൾ പോലും പാലിക്കാതെ ധൃതിപിടിച്ച് നടത്തിയ അറസ്റ്റ് പോലീസിന് തിരിച്ചടിയായിരിക്കുകയാണ്.

കോടതിയിൽ നിന്ന് ജാമ ഉത്തരവ് ലഭിച്ചതോടെ ടി.ജി. മോഹൻദാസിന് പുറത്തിറങ്ങാനുള്ള വഴി തെളിഞ്ഞു. പോലീസിന്റെ നിയമവിരുദ്ധമായ അറസ്റ്റ് നടപടികൾക്കെതിരെ നിയമവൃത്തങ്ങളിലും വലിയ ചർച്ചകൾക്ക് ഈ ഉത്തരവ് വഴിവെച്ചിട്ടുണ്ട്.

---------------

Hindusthan Samachar / Roshith K