Kannur, 11 ഓഗസ്റ്റ് (H.S.)

കണ്ണൂർ: കർക്കടകവാവ് ദിനത്തിൽ സിപിഎം നിയന്ത്രണത്തിലുള്ള രണ്ടു വ്യത്യസ്ത സംഘടനകൾ സംഘടിപ്പിക്കുന്ന പരിപാടികൾ തമ്മിലെ അടിമുടി പൊരുത്തക്കേടും വൈരുധ്യവും രാഷ്ട്രീയ-സാമൂഹിക മേഖലകളിൽ വലിയ ചർച്ചയാകുന്നു. ജില്ലയിലെ പ്രധാന പിതൃതർപ്പണ കേന്ദ്രമായ പയ്യാമ്പലത്ത് ബലിതർപ്പണത്തിനെത്തുന്ന വിശ്വാസികൾക്കായി സിപിഎമ്മിന്റെ പാലിയേറ്റീവ് സംരംഭമായ ഐആർപിസി (IRPC) സേവന കേന്ദ്രമൊരുക്കുമ്പോൾ, മറുഭാഗത്ത് പടിയൂരിൽ സിപിഎം നിയന്ത്രണത്തിലുള്ള വായനശാലയുടെ നേതൃത്വത്തിൽ കർക്കടകവാവ് ദിനത്തിൽ പന്നിയിറച്ചി ചാലഞ്ച് സംഘടിപ്പിക്കുന്നതാണ് വിവാദങ്ങൾക്ക് വഴിവെച്ചിരിക്കുന്നത്.

വിശ്വാസി സമൂഹത്തോടുള്ള സിപിഎമ്മിന്റെ സമീപനത്തിലും നയനിലപാടുകളിലും നിലനിൽക്കുന്ന പരസ്പരവിരുദ്ധമായ ആശയക്കുഴപ്പമാണ് ഈ സംഭവങ്ങളിലൂടെ പുറത്തുവരുന്നതെന്നാണ് ഉയരുന്ന പ്രധാന വിമർശനം.

പയ്യാമ്പലത്ത് സാന്ത്വന സ്പർശവുമായി ഐആർപിസി

വർഷങ്ങളായി കർക്കടകവാവ് ദിനത്തിൽ പയ്യാമ്പലം കടപ്പുറത്ത് ബലിതർപ്പണത്തിനെത്തുന്ന ആയിരക്കണക്കിന് വിശ്വാസികൾക്ക് ആശ്വാസമേകാൻ സിപിഎമ്മിന്റെ നേതൃത്വത്തിലുള്ള പെയിൻ ആൻഡ് പാലിയേറ്റീവ് സംഘടനയായ ഐആർപിസി (ഇൻസ്റ്റിറ്റ്യൂട്ട് ഓഫ് റിസേർച്ച് ആൻഡ് പാലിയേറ്റീവ് കെയർ) സജീവമായി രംഗത്തുണ്ട്. പാർട്ടി വിശ്വാസികൾക്ക് എതിരല്ലെന്ന സന്ദേശം നൽകുന്നതിന്റെ ഭാഗമായിട്ടായിരുന്നു ഏതാനും വർഷങ്ങളായി ഈ മേഖലയിൽ ഐആർപിസിയുടെ സാന്നിധ്യം ശക്തമാക്കിയത്.

ഇത്തവണയും പുലർച്ചെ മുതൽ തർപ്പണത്തിനെത്തുന്നവർക്കായി ലഘുഭക്ഷണം, കുടിവെള്ള വിതരണം, അടിയന്തര വൈദ്യസഹായം, ആംബുലൻസ് സൗകര്യം എന്നിവ ഐആർപിസി പ്രവർത്തകർ പയ്യാമ്പലത്ത് ഒരുക്കുന്നുണ്ട്. സാന്ത്വന പരിചരണത്തിലൂടെ വിശ്വാസി സമൂഹത്തിന്റെ പിന്തുണയും വിശ്വാസവും നേടിയെടുക്കുക എന്ന ലക്ഷ്യമാണ് ഇതിന് പിന്നിലുള്ളത്.

പടിയൂരിൽ ചോദ്യാവലിയുയർത്തി പന്നിയിറച്ചി ചാലഞ്ച്

എന്നാൽ പയ്യാമ്പലത്തെ പ്രവർത്തനങ്ങൾക്ക് തികച്ചും വിപരീതമായ നിലപാടാണ് പടിയൂർ കരവൂർ എകെജി വായനശാല ആൻഡ് ഗ്രന്ഥാലയത്തിൽ കാണുന്നത്. വായനശാലയുടെ ഓണാഘോഷ പരിപാടികളുടെ ഭാഗമായിട്ടെന്ന പേരിലാണ് കർക്കടകവാവ് ദിനത്തിൽ പന്നിയിറച്ചി ചാലഞ്ച് സംഘടിപ്പിച്ചിരിക്കുന്നത്. ഒരു കിലോ പന്നിയിറച്ചി 370 രൂപ നിരക്കിലാണ് ഇവിടെ വിതരണം ചെയ്യുന്നത്.

മുൻകാലങ്ങളിൽ ഓണാഘോഷത്തിന്റെ ഭാഗമായി നടത്തിവന്നിരുന്ന പൂക്കള മത്സരത്തിന് പകരമായാണ് ഇത്തവണ വിചിത്രമായ ഈ 'പോർക്ക് ചാലഞ്ച്' പ്രഖ്യാപിച്ചിരിക്കുന്നത്. ഹൈന്ദവ വിശ്വാസികൾ പിതൃസ്മരണയിൽ വ്രതശുദ്ധിയോടെ ബലിതർപ്പണം നടത്തുന്ന സവിശേഷമായ ഒരു ദിനത്തിൽ തന്നെ പന്നിയിറച്ചി ചാലഞ്ച് നടത്തുന്നതിൽ എന്ത് ഔചിത്യമാണുള്ളതെന്നാണ് പൊതുസമൂഹവും പ്രാദേശിക നേതൃത്വവും ചോദിക്കുന്നത്.

പാർട്ടിക്കുള്ളിലെ ആശയക്കുഴപ്പവും വൻ വിമർശനവും

വിശ്വാസികളെ ചേർത്തുനിർത്താനും പാർട്ടിക്ക് മേലുള്ള ഭൗതികവാദ മുദ്ര മായ്ച്ചുകളയാനും ഒരുവശത്ത് ഐആർപിസി പോലുള്ള സംഘടനകളെ മുൻനിർത്തി ശ്രമങ്ങൾ നടക്കുമ്പോൾ, മറുവശത്ത് ഇത്തരത്തിൽ വിശ്വാസ വികാരങ്ങളെ വ്രണപ്പെടുത്തുന്ന തരത്തിലുള്ള പരിപാടികൾ പ്രാദേശിക ഘടകങ്ങൾ സംഘടിപ്പിക്കുന്നത് പാർട്ടിയുടെ ആസൂത്രിത തന്ത്രമാണോ അതോ ഏകോപനമില്ലായ്മയാണോ എന്ന സംശയം ഉയർത്തുന്നു.

കർക്കടകവാവും പന്നിയിറച്ചിയുമായി യാതൊരു ബന്ധവുമില്ലാതിരുന്നിട്ടും, തികച്ചും മനഃപൂർവ്വം വിശ്വാസികളെ അധിക്ഷേപിക്കുന്നതിനും പ്രകോപിപ്പിക്കുന്നതിനുമാണ് വാവ് ദിനത്തിൽ തന്നെ പന്നിയിറച്ചി ചാലഞ്ച് നടത്തുന്നതെന്ന് പ്രതിപക്ഷ പാർട്ടികളും വിവിധ ഹൈന്ദവ സംഘടനകളും ആരോപിച്ചു. സംഭവത്തിൽ സോഷ്യൽ മീഡിയയിലടക്കം പ്രതിഷേധവും വിമർശനവും കടുത്തിട്ടുണ്ട്.

---------------

Hindusthan Samachar / Roshith K