Kochi, 13 ഓഗസ്റ്റ് (H.S.)

കൊച്ചി: പ്രതിപക്ഷ നേതാവ് പിണറായി വിജയന്റെ വസതിയിൽ റെയ്ഡ് നടത്തിയ ശേഷം മടങ്ങിയ എൻഫോഴ്സ്മെന്റ് ഡയറക്ടറേറ്റ് (ഇ ഡി) ഉദ്യോഗസ്ഥരെ ആക്രമിച്ച കേസിൽ സംസ്ഥാന സർക്കാരിനും ഇ ഡിക്ക് തിരിച്ചടി. കേസിലെ ഒൻപതാം പ്രതിയായ ഹരീഷ് കുമാറിന്റെ ജാമ്യം റദ്ദാക്കണമെന്ന് ആവശ്യപ്പെട്ട് സർക്കാരും ഇ ഡി സമർപ്പിച്ച ഹർജി ഹൈക്കോടതി തള്ളി. തിരുവനന്തപുരം സെഷൻസ് കോടതി ഹരീഷ് കുമാറിന് ജാമ്യം അനുവദിച്ച ഉത്തരവിൽ ഇടപെടാൻ ഹൈക്കോടതി വിസമ്മതിക്കുകയായിരുന്നു.

കേസിലെ മറ്റ് 24 പ്രതികൾക്കും ഇതിനോടകം ജാമ്യം ലഭിച്ച സാഹചര്യത്തിലാണ് ഹൈക്കോടതിയുടെ നിർണായക തീരുമാനം. കേസിലെ ബാക്കി പ്രതികൾക്ക് ഏർപ്പെടുത്തിയ അതേ ജാമ്യവ്യവസ്ഥകൾ തന്നെ ഹരീഷ് കുമാറിനും ബാധകമാക്കിക്കൊണ്ട് ഹൈക്കോടതി സർക്കാരിന്റെയും ഇ ഡി യുടെയും ഹർജി തീർപ്പാക്കുകയായിരുന്നു.

കോടതിയുടെ നിരീക്ഷണവും വിധി പ്രസ്താവവും

കേസിലെ ആകെ 25 പ്രതികളിൽ 24 പേർക്കും കോടതി നേരത്തെ ജാമ്യം അനുവദിച്ചിട്ടുണ്ടെന്ന വസ്തുത ഹൈക്കോടതി ചൂണ്ടിക്കാട്ടി. ബാക്കി എല്ലാ പ്രതികൾക്കും ജാമ്യം ലഭിച്ച സ്ഥിതിക്ക്, ഒൻപതാം പ്രതിയായ ഹരീഷ് കുമാറിന് മാത്രം ജാമ്യം നിഷേധിക്കുന്നതോ അനുവദിച്ച ജാമ്യം റദ്ദാക്കുന്നതോ നീതിയുക്തമല്ലെന്ന് കോടതി വ്യക്തമാക്കി. സെഷൻസ് കോടതിയുടെ ഉത്തരവിൽ നിയമപരമായ തെറ്റുകളോ വീഴ്ചകളോ കണ്ടെത്താൻ സാധിക്കാത്തതിനാലാണ് വിധിയിൽ ഇടപെടേണ്ടതില്ലെന്ന് ഹൈക്കോടതി തീരുമാനിച്ചത്.

കേസിന്റെ പശ്ചാത്തലം

മേയ് 27-നാണ് കേസിനാസ്പദമായ സംഭവം നടന്നത്. തിരുവനന്തപുരം ബേക്കറി ജങ്ഷനിലുള്ള പ്രതിപക്ഷ നേതാവ് പിണറായി വിജയന്റെ വസതിയിൽ ഇ ഡി ഉദ്യോഗസ്ഥർ എട്ട് മണിക്കൂറോളം നീണ്ട മിന്നൽ പരിശോധന നടത്തിയിരുന്നു. റെയ്ഡിന് ശേഷം ഉദ്യോഗസ്ഥർ വാഹനങ്ങളിൽ മടങ്ങാൻ ശ്രമിക്കവേ, പ്രദേശത്ത് തടിച്ചുകൂടിയ പ്രതിഷേധക്കാർ ഇ ഡി സംഘ സഞ്ചരിച്ചിരുന്ന വാഹനങ്ങൾ തടഞ്ഞുനിർത്തുകയും ആക്രമണം നടത്തുകയുമായിരുന്നുവെന്നാണ് കേസ്.

കല്ലുകൾ, ഇഷ്ടികകൾ, മരക്കഷ്ണങ്ങൾ എന്നിവ ഉപയോഗിച്ച് ഉദ്യോഗസ്ഥരെയും വാഹനങ്ങളെയും ആക്രമിച്ചതായി പോലീസ് രജിസ്റ്റർ ചെയ്ത എഫ്.ഐ.ആറിൽ വ്യക്തമാക്കുന്നു. ക്രമസമാധാന പ്രശ്നവും ഗൂഢാലോചനയും കണക്കിലെടുത്ത് കേസ് പിന്നീട് പ്രത്യേക അന്വേഷണ സംഘത്തിന് (SIT) കൈമാറുകയായിരുന്നു.

പ്രോസിക്യൂഷന്റെയും ഇ ഡി യുടെയും വാദങ്ങൾ

ഉദ്യോഗസ്ഥർക്കെതിരെ നടന്നത് ആസൂത്രിതവും സംഘടിതവുമായ അക്രമമാണെന്നും ഹരീഷ് കുമാറിന് ജാമ്യം നൽകുന്നത് അന്വേഷണത്തെ പ്രതികൂലമായി ബാധിക്കുമെന്നുമായിരുന്നു സർക്കാരിന്റെയും ഇ ഡി യുടെയും പ്രധാന വാദം. അക്രമത്തിൽ പ്രതികളുടെ പങ്ക് വ്യക്തമാക്കുന്ന ദൃശ്യങ്ങളുണ്ടെന്നും, പ്രതികളുടെ മൊബൈൽ ഫോണുകൾ ഉൾപ്പെടെയുള്ള ഡിജിറ്റൽ തെളിവുകളുടെ പരിശോധന പുരോഗമിക്കുകയാണെന്നും കോടതിയെ അറിയിച്ചിരുന്നു. എന്നാൽ, 68 ദിവസത്തിലധികമായി വിചാരണത്തടവുകാരായി കഴിയുന്ന സാഹചര്യവും അന്വേഷണം അവസാന ഘട്ടത്തിലെത്തിയതും പരിഗണിച്ച് കീഴ്ക്കോടതികൾ പ്രതികൾക്ക് ജാമ്യം അനുവദിക്കുകയായിരുന്നു.

ഹൈക്കോടതിയുടെ ഈ പുതിയ ഉത്തരവോടെ, കേസിലെ മുഴുവൻ പ്രതികൾക്കും ജാമ്യം ലഭിച്ച സാഹചര്യം നിലവിൽ വരികയും, ജാമ്യം റദ്ദാക്കാനുള്ള സർക്കാരിന്റെയും അന്വേഷണ ഏജൻസിയുടെയും നീക്കം പൂർണ്ണമായി പരാജയപ്പെടുകയും ചെയ്തു.

---------------

Hindusthan Samachar / Roshith K