Thiruvananthapuram, 13 ഓഗസ്റ്റ് (H.S.)

തിരുവനന്തപുരം: എൻഎസ്എസ് (നായർ സർവീസ് സൊസൈറ്റി) ജനറൽ സെക്രട്ടറി ജി. സുകുമാരൻ നായർക്കെതിരെ കടുത്ത ആരോപണങ്ങളുമായും തുറന്ന വെല്ലുവിളിയുമായും മുൻ മന്ത്രിയും പത്തനാപുരം എംഎൽഎയുമായ കെ.ബി. ഗണേഷ് കുമാർ. തന്റെ പദവിയും അധികാരവും ദുരുപയോഗം ചെയ്ത് ജി. സുകുമാരൻ നായർ സ്വന്തം കുടുംബത്തിലെ 43 പേർക്ക് വിവിധ സ്ഥാപനങ്ങളിൽ നിയമനം നൽകിയെന്ന് ഗണേഷ് കുമാർ ആരോപിച്ചു. തനിക്കെതിരെയുള്ള വ്യാജ ആരോപണങ്ങളും വ്യക്തിഹത്യയും തുടരുകയാണെങ്കിൽ തെളിവുകൾ സഹിതം കൂടുതൽ കാര്യങ്ങൾ പൊതുസമക്ഷം തുറന്നുകാട്ടുമെന്നും അദ്ദേഹം മുന്നറിയിപ്പ് നൽകി.

കുടുംബ നിയമനങ്ങളും സാമ്പത്തിക ക്രമക്കേടുകളും

തിരുവനന്തപുരത്ത് വാർത്താസമ്മേളനത്തിൽ സംസാരിക്കവെയാണ് എൻഎസ്എസ് നേതൃത്വത്തെ പ്രതികൂട്ടിലാക്കുന്ന രൂക്ഷ വിമർശനങ്ങൾ ഗണേഷ് കുമാർ ഉന്നയിച്ചത്. സുകുമാരൻ നായരുടെ കൊച്ചുമകന് രണ്ടുമാസം മുൻപാണ് പ്ലസ് ടു സ്കൂളിൽ ലാബ് അസിസ്റ്റന്റായി നിയമനം നൽകിയതെന്ന് ഗണേഷ് കുമാർ ചൂണ്ടിക്കാട്ടി. 'ദേവദാരുവിലെ ഇത്തിൾക്കണ്ണി' എന്ന പുസ്തകത്തിൽ സുകുമാരൻ നായർ നടത്തിയ 43 കുടുംബാംഗങ്ങളുടെ നിയമനത്തെക്കുറിച്ചുള്ള വിവരങ്ങൾ കൃത്യമായ തെളിവുകളോടെ വ്യക്തമാക്കുന്നുണ്ടെന്നും അദ്ദേഹം പറഞ്ഞു.

ഇതിനു പുറമേ, എൻഎസ്എസിന്റെ സാമ്പത്തിക കാര്യങ്ങളിലും ഭരണപരമായ തീരുമാനങ്ങളിലും ദുരൂഹതയുണ്ടെന്ന് അദ്ദേഹം ആരോപിച്ചു. ധനലക്ഷ്മി ബാങ്കിൽ നിന്ന് എൻഎസ്എസിന്റെ പണം എന്തിന് പിൻവലിച്ചു, പിന്നീട് അത് എന്തിന് തിരിച്ചിട്ടു എന്നതിൽ വ്യക്തത വേണം. തമിഴ്നാട്ടിലുണ്ടായിരുന്ന ശ്രീ അയ്യപ്പ കോളേജിന്റെ ഇപ്പോഴത്തെ അവസ്ഥയെന്താണ്, അതിന്റെ മാനേജർ ആരാണ്, ഉടമസ്ഥാവകാശം ആർക്കാണ് തുടങ്ങിയ കാര്യങ്ങൾക്ക് സുകുമാരൻ നായർ മറുപടി പറയണമെന്നും ഗണേഷ് കുമാർ ആവശ്യപ്പെട്ടു.

കോടതിയിലേക്കില്ല, ജനകീയ കോടതിയിൽ വിചാരണ ചെയ്യും

സുകുമാരൻ നായർക്കെതിരെ കോടതിയെ സമീപിക്കാൻ താൻ ആഗ്രഹിക്കുന്നില്ലെന്ന് ഗണേഷ് കുമാർ വ്യക്തമാക്കി. കോടതിയിൽ കേസ് നടത്തിയാൽ നഷ്ടപ്പെടുന്നത് മന്നത്ത് പത്മനാഭൻ പിടിയരി ശേഖരിച്ച് ഉണ്ടാക്കിയ എൻഎസ്എസിന്റെ പണമാണ്. അതിനാൽ സുകുമാരൻ നായർ നടത്തുന്ന ഇത്തരം മര്യാദകേടുകൾ ജനമധ്യത്തിൽ പറയുകയാണ് ചെയ്യുക.

എന്നെക്കൊണ്ട് വായ തുറപ്പിക്കാതിരിക്കുന്നതാണ് സുകുമാരൻ നായർക്ക് നല്ലത്. അദ്ദേഹത്തിന്റെ മകനെയും മകളെയും കൊച്ചുമക്കളെയും കുറിച്ചുള്ള വിവരങ്ങൾ എന്റെ കൈവശമുണ്ട്. 23,000 രൂപ മാത്രം ശമ്പളം വാങ്ങിയിരുന്ന ഒരാൾ മകളെ എങ്ങനെ ലണ്ടനിൽ അയച്ച് പഠിപ്പിച്ചു എന്നത് അന്വേഷിക്കേണ്ട വിഷയമാണ്. എൻഎസ്എസ് ഒരു വ്യക്തിയുടെയും ഔദാര്യമല്ല, അത് മന്നത്ത് പത്മനാഭൻ കരുതിവെച്ച അവകാശമാണ്.

പത്തനാപുരം എൻഎസ്എസ് യൂണിയൻ ഒരു രാത്രി ഇരുട്ടി വെളുത്തപ്പോൾ ജനാധിപത്യവിരുദ്ധമായി പിരിച്ചുവിട്ട നടപടിയെയും ഗണേഷ് കുമാർ വിമർശിച്ചു. ചങ്ങനാശ്ശേരി കരയോഗത്തിലെ അംഗങ്ങൾ വിചാരിച്ചാൽ ജനറൽ സെക്രട്ടറിയെ ആ സ്ഥാനത്തുനിന്ന് ഇറക്കിവിട്ട് സംഘടനയെ രക്ഷിക്കാൻ സാധിക്കുമെന്നും അദ്ദേഹം കൂട്ടിച്ചേർത്തു.

ആരോപണങ്ങൾ തള്ളി സുകുമാരൻ നായർ

അതേസമയം, ഗണേഷ് കുമാറിന്റെ ആരോപണങ്ങൾ തള്ളി ജി. സുകുമാരൻ നായർ രംഗത്തെത്തി. എൻഎസ്എസിനെ തകർക്കാൻ ശ്രമിക്കുന്ന ശക്തികളുടെ വാലായാണ് ഗണേഷ് കുമാർ പ്രവർത്തിക്കുന്നതെന്ന് അദ്ദേഹം പ്രതികരിച്ചു. എൻഎസ്എസ് സ്ഥാപനങ്ങളിൽ നടന്ന എല്ലാ നിയമനങ്ങളും നിലവിലുള്ള ചട്ടങ്ങളും കീഴ്വഴക്കങ്ങളും പാലിച്ചാണെന്നും, സംഘടനയിൽ ജനാധിപത്യമില്ലെന്ന് പരാതിയുള്ളവർക്ക് കോടതിയെ സമീപിക്കാമെന്നും സുകുമാരൻ നായർ വ്യക്തമാക്കി.

ആരോപണങ്ങളും പ്രത്യാരോപണങ്ങളും കടുക്കുന്നതോടെ എൻഎസ്എസ് നേതൃത്വവും കെ.ബി. ഗണേഷ് കുമാറും തമ്മിലുള്ള പോര് കൂടുതൽ രൂക്ഷമായ രാഷ്ട്രീയ-സാമൂഹിക ചർച്ചകൾക്ക് വഴിവെച്ചിരിക്കുകയാണ്

---------------

Hindusthan Samachar / Roshith K