Thiruvananthapuram , 13 ഓഗസ്റ്റ് (H.S.)

തിരുവനന്തപുരം/ കോഴിക്കോട്: പബ്ലിക് സർവീസ് കമ്മിഷന്റെ (പിഎസ്സി) പ്രവർത്തനങ്ങൾക്കും സുതാര്യതയ്ക്കുമെതിരെ വൻ വിമർശനങ്ങൾ ഉയർന്നുവരുമ്പോൾ, തങ്ങളെ പ്രതിരോധിക്കാൻ കമ്മിഷൻ പുറത്തുവിടുന്നത് ഊതിപ്പെരുപ്പിച്ച കണക്കുകളാണെന്ന് ആരോപണം. പിഎസ്സി നൽകുന്ന നിയമന ശുപാർശയും (Advise Memo) ഉദ്യോഗാർത്ഥിക്ക് ലഭിക്കുന്ന യഥാർത്ഥ നിയമനവും (Appointment) രണ്ടും രണ്ടാണെന്നിരിക്കെ, നിയമന ശുപാർശ നൽകിയവരുടെ എണ്ണം മാത്രം നിയമനമായി കാണിച്ച് ജനങ്ങളെ തെറ്റിദ്ധരിപ്പിക്കാനാണ് പിഎസ്സി ശ്രമിക്കുന്നതെന്നാണ് പ്രധാന വിമർശനം.

കഴിഞ്ഞ 10 വർഷത്തിനിടെ യഥാർത്ഥത്തിൽ എത്ര പേർക്ക് പിഎസ്സി വഴി സർക്കാർ വകുപ്പുകളിൽ ജോലി ലഭിച്ചു എന്നതിന്റെ വ്യക്തവും കൃത്യവുമായ കണക്ക് പുറത്തുവിടണമെന്ന ആവശ്യം ഉദ്യോഗാർത്ഥികൾക്കിടയിലും പൊതുസമൂഹത്തിലും ശക്തമാകുകയാണ്.

എന്താണ് നിയമന ശുപാർശയും നിയമനവും തമ്മിലുള്ള വ്യത്യാസം?

പിഎസ്സി നടത്തുന്ന റാങ്ക് പട്ടികയിൽ ഉൾപ്പെടുന്ന ഉദ്യോഗാർത്ഥികൾക്ക് ഒഴിവുകൾ റിപ്പോർട്ട് ചെയ്യുന്നതിന് അനുസരിച്ച് 'അഡ്വൈസ് മെമ്മോ' അഥവാ നിയമന ശുപാർശ അയക്കുകയാണ് ആദ്യ ഘട്ടം. എന്നാൽ ശുപാർശ ലഭിക്കുന്ന എല്ലാവരും ജോലിയിൽ പ്രവേശിക്കണമെന്നില്ല. തസ്തികകളിൽ ചേരാതിരിക്കുകയോ, മറ്റ് മെച്ചപ്പെട്ട ജോലികൾ ലഭിച്ചു പോകുകയോ ചെയ്യുമ്പോൾ ഈ ഒഴിവുകൾ 'നോട്ട് ജോയിനിങ് ഡ്യൂട്ടി' (NJD) തസ്തികകളായി മാറും.

പിഎസ്സി നിയമപ്രകാരം, ഈ എൻ.ജെ.ഡി ഒഴിവുകളിലേക്ക് റാങ്ക് ലിസ്റ്റിലുള്ള അടുത്ത ഉദ്യോഗാർത്ഥികൾക്ക് വീണ്ടും നിയമന ശുപാർശ നൽകും. ഒരേ തസ്തികയിലേക്കുള്ള ഒഴിവിൽ ഒന്നിലധികം തവണ അഡ്വൈസ് അയക്കുമ്പോൾ, അഡ്വൈസ് മെമ്മോകളുടെ എണ്ണം കൃത്രിമമായി ഉയരുകയാണ് ചെയ്യുന്നത്. ഉദാഹരണത്തിന്, ഒരു ഒഴിവിൽ 3 പേർക്ക് മാറിമാറി അഡ്വൈസ് നൽകിയാൽ പിഎസ്സിയുടെ കണക്കിൽ അത് 3 നിയമനങ്ങളായി രേഖപ്പെടുത്തപ്പെടുമെങ്കിലും യഥാർത്ഥത്തിൽ അവിടെ ഒരു വ്യക്തിക്ക് മാത്രമാണ് ജോലി ലഭിക്കുന്നത്.

എൻ.ജെ.ഡി തസ്തികകളും പെരുപ്പിച്ച കണക്കുകളും

പല വകുപ്പുകളിലും ക്ലർക്ക്, ലാസ്റ്റ് ഗ്രേഡ് സർവന്റ്സ് (LGS), അസിസ്റ്റന്റ് തുടങ്ങിയ ജനപ്രിയ തസ്തികകളിൽ ഇത്തരത്തിൽ ആയിരക്കണക്കിന് എൻ.ജെ.ഡി ഒഴിവുകളാണ് റിപ്പോർട്ട് ചെയ്യപ്പെടുന്നത്. പിഎസ്സി ഔദ്യോഗികമായി തങ്ങളുടെ വാർഷിക റിപ്പോർട്ടുകളിലും വാർത്താക്കുറിപ്പുകളിലും വൻതോതിൽ നിയമനം നടന്നു എന്ന് അവകാശപ്പെടാൻ ഉപയോഗിക്കുന്നത് ഈ എൻ.ജെ.ഡി ഉൾപ്പെടെയുള്ള അഡ്വൈസ് കണക്കുകളാണ്.

ഉദ്യോഗാർത്ഥികളുടെ പ്രധാന ചോദ്യം:

നിയമന ശുപാർശകളുടെ അടിസ്ഥാനത്തിൽ ലക്ഷക്കണക്കിന് ആളുകൾക്ക് ജോലി നൽകിയെന്ന് അവകാശപ്പെടുമ്പോൾ, യഥാർത്ഥത്തിൽ സർവീസിൽ കയറിയവരുടെ സർവീസ് ബുക്കുകളുടെയും ആകെ നിയമന ഉത്തരവുകളുടെയും കണക്ക് എന്തുകൊണ്ട് പുറത്തുവിടുന്നില്ല?

പത്തു വർഷത്തെ കണക്കുകൾ പുറത്തുവിടണം

വിവിധ പരീക്ഷകളിലെ മൂല്യനിർണയ ക്രമക്കേടുകളും ഒഴിവുകൾ റിപ്പോർട്ട് ചെയ്യുന്നതിലെ കാലതാമസവും പിഎസ്സിയുടെ വിശ്വാസ്യത ചോദ്യം ചെയ്യുന്ന ഈ ഘട്ടത്തിൽ, പിഎസ്സി സുതാര്യത പുലർത്തണമെന്ന് ആവശ്യമുയരുന്നു.

കഴിഞ്ഞ ഒരു പതിറ്റാണ്ടിൽ:

-

യഥാർത്ഥത്തിൽ സർവീസിൽ പ്രവേശിച്ചവരുടെ എണ്ണം

-

നോട്ട് ജോയിനിങ് ഡ്യൂട്ടി (NJD) വഴി പുനഃശുപാർശ ചെയ്ത അഡ്വൈസുകൾ

-

താൽക്കാലിക/പിൻവാതിൽ നിയമനങ്ങൾ ഒഴിവാക്കി പിഎസ്സി വഴി സ്ഥിരനിയമനം നേടിയവർ

എന്നിവ വേർതിരിച്ച് വ്യക്തമാക്കുന്ന ധവളപത്രം പുറത്തിറക്കണമെന്നാണ് ഉദ്യോഗാർത്ഥി കൂട്ടായ്മകളും ഉദ്യോഗാർത്ഥി സംഘടനകളും ആവശ്യപ്പെടുന്നത്. ഊതിപ്പെരുപ്പിച്ച സങ്കീർണ്ണ കണക്കുകൾ കാണിച്ച് കണ്ണിൽ പൊടിയിടുന്നതിന് പകരം യഥാർത്ഥ നിയമന വിവരങ്ങൾ പുറത്തുവിട്ടാൽ മാത്രമേ പിഎസ്സിയുടെ പ്രതിച്ഛായ വീണ്ടെടുക്കാൻ സാധിക്കൂ എന്ന് ചൂണ്ടിക്കാണിക്കപ്പെടുന്നു

---------------

Hindusthan Samachar / Roshith K