Newdelhi , 15 ഓഗസ്റ്റ് (H.S.)

ന്യൂഡൽഹി: രാജ്യത്തിന്റെ വികസനത്തിനും സുരക്ഷയ്ക്കും ഭീഷണിയുയർത്തുന്ന 'ദിമാഗി നക്സലുകളെ' (മാവോയിസ്റ്റ് പ്രത്യയശാസ്ത്രം പേറുന്നവരെ) തിരിച്ചറിഞ്ഞ് ഒറ്റപ്പെടുത്തണമെന്ന് ആഹ്വാനം ചെയ്ത് പ്രധാനമന്ത്രി നരേന്ദ്ര മോദി. രാജ്യത്തിന്റെ 80-ാം സ്വാതന്ത്ര്യദിനാഘോഷ വേളയിൽ ചെങ്കോട്ടയിൽ വെച്ച് രാജ്യത്തെ അഭിസംബോധന ചെയ്യവെയാണ് പ്രധാനമന്ത്രി ഇക്കാര്യം വ്യക്തമാക്കിയത്. അരാജകത്വം സൃഷ്ടിക്കാൻ അവസരം കാത്തിരിക്കുന്ന ഇത്തരം പ്രത്യയശാസ്ത്ര നക്സലുകൾ അധികാര ഇടനാഴികളിലും നയരൂപീകരണ സമിതികളിലും ഇടംപിടിച്ചിട്ടുണ്ടെന്നും രാജ്യം വികസന പാതയിൽ മുന്നേറാൻ ഇവരെ പൂർണ്ണമായും മാറ്റിനിർത്തേണ്ടതുണ്ടെന്നും അദ്ദേഹം പറഞ്ഞു.

പ്രധാനമന്ത്രിയുടെ പ്രസംഗത്തിലെ പ്രധാന വശങ്ങൾ

വനാതിർത്തികളിൽ ആയുധമേന്തിയ നക്സലൈറ്റുകളെ രാജ്യം വിജയകരമായി പ്രതിരോധിക്കുകയും ഭീഷണി ഇല്ലാതാക്കുകയും ചെയ്തിട്ടുണ്ട്. എന്നാൽ കാടുകളിലെ ആയുധധാരികളായ നക്സലുകളെക്കാൾ അപകടകരമായ രീതിയിൽ നയരൂപീകരണ സമിതികളിലും ഉപദേശക സ്ഥാനങ്ങളിലും നക്സൽ ചിന്താഗതിക്കാർ സ്വാധീനം ചെലുത്തുന്നുണ്ടെന്ന് അദ്ദേഹം ചൂണ്ടിക്കാട്ടി.

-

അരാജകത്വം പുനരുജ്ജീവിപ്പിക്കാനുള്ള ശ്രമം: അക്രമത്തിന്റെയും അരാജകത്വത്തിന്റെയും പാത വീണ്ടും തുറക്കാനും സമൂഹത്തെ തെറ്റായ ദിശയിലേക്ക് നയിക്കാനും ഇത്തരക്കാർ നിരന്തരം ശ്രമിക്കുകയാണെന്ന് പ്രധാനമന്ത്രി വ്യക്തമാക്കി.

-

ബലിദാനികളുടെ ത്യാഗം: മാവോയിസത്തിനെതിരായ പോരാട്ടത്തിൽ 3,500-ലധികം സുരക്ഷാ ഉദ്യോഗസ്ഥർക്കാണ് ജീവൻ നഷ്ടമായത്. യുദ്ധങ്ങളിൽ കൊല്ലപ്പെട്ടതിനേക്കാൾ വലിയ സംഖ്യയാണിതെന്നും നക്സലിസം ആയിരക്കണക്കിന് യുവാക്കളുടെ ഭാവിയാണ് തകർത്തതെന്നും അദ്ദേഹം ഓർമ്മിപ്പിച്ചു.

ആധുനിക യുദ്ധമുറകളും 'മിഷൻ സുദർശന ചക്ര'യും

യുദ്ധങ്ങൾ ഇനി അതിർത്തികളിൽ മാത്രമായി പരിമിതപ്പെടില്ലെന്നും രാജ്യം ആഭ്യന്തരമായി നേരിടുന്ന ഇത്തരം വെല്ലുവിളികളെ ശക്തമായി നേരിടാൻ പൂർണ്ണ സജ്ജമാണെന്നും പ്രധാനമന്ത്രി വ്യക്തമാക്കി. സൈബർ ആക്രമണങ്ങൾ, റിഫൈനറികൾ, ബാങ്കിംഗ് മേഖല, ഡാറ്റാ സെന്ററുകൾ, വ്യാവസായിക അടിസ്ഥാന സൗകര്യങ്ങൾ എന്നിവയെ ലക്ഷ്യമിട്ട് പുതിയ രീതിയിലുള്ള ആധുനിക യുദ്ധമുറകളാണ് ഇപ്പോൾ രൂപപ്പെടുന്നത്. ഈ ഭീഷണികൾ നേരിടാൻ കഴിഞ്ഞ വർഷം പ്രഖ്യാപിച്ച 'മിഷൻ സുദർശന ചക്ര'യുടെ പ്രവർത്തനങ്ങൾ ദ്രുതഗതിയിൽ പുരോഗമിക്കുകയാണെന്ന് അദ്ദേഹം കൂട്ടിച്ചേർത്തു.

യുവതലമുറയ്ക്കുള്ള പ്രഖ്യാപനങ്ങൾ

വികസിത ഭാരതം (Viksit Bharat) എന്ന ലക്ഷ്യം കൈവരിക്കാൻ യുവാക്കളുടെ കാര്യക്ഷമത പൂർണ്ണമായി ഉപയോഗപ്പെടുത്തണമെന്ന് പ്രധാനമന്ത്രി പറഞ്ഞു. മത്സരപരീക്ഷകൾക്ക് തയ്യാറെടുക്കുന്ന ഉദ്യോഗാർത്ഥികൾക്കായി സൗജന്യ ഓൺലൈൻ കോച്ചിംഗ് സംവിധാനം ഏർപ്പെടുത്തുമെന്നും അദ്ദേഹം പ്രഖ്യാപിച്ചു. 35 വർഷത്തിന് ശേഷം നടപ്പിലാക്കിയ പുതിയ ദേശീയ വിദ്യാഭ്യാസ നയത്തിലൂടെ ഉന്നത വിദ്യാഭ്യാസ രംഗത്ത് വലിയ മാറ്റങ്ങൾ വന്നതായും 650-ലധികം പുതിയ സർവകലാശാലകൾ സ്ഥാപിച്ചതായും വിദേശ സർവകലാശാലകൾ ഇന്ത്യയിലേക്ക് എത്തുന്നതോടെ വിദ്യാർത്ഥികൾക്ക് രാജ്യത്തുതന്നെ അന്താരാഷ്ട്ര ബിരുദങ്ങൾ നേടാൻ സാധിക്കുമെന്നും അദ്ദേഹം പ്രസംഗത്തിൽ എടുത്തുപറഞ്ഞു.

---------------

Hindusthan Samachar / Roshith K