Thrishur, 15 ഓഗസ്റ്റ് (H.S.)

തൃശൂർ: ചരിത്രപ്രസിദ്ധമായ വടക്കുംനാഥ ക്ഷേത്ര മൈതാനിയിൽ ഹൈക്കോടതി ഉത്തരവ് ലംഘിച്ച് സമാന്തര സ്വാതന്ത്ര്യദിനാഘോഷവും പ്രതിഷേധ പരിപാടിയും സംഘടിപ്പിച്ച ബിജെപിക്കെതിരെ കർശന നടപടിയുമായി കൊച്ചിൻ ദേവസ്വം ബോർഡ്. വടക്കുംനാഥ ക്ഷേത്രത്തിന്റെ അധീനതയിലുള്ള തേക്കിൻകാട് മൈതാനിയിൽ അനധികൃതമായി കടന്നുകയറി പരിപാടി സംഘടിപ്പിച്ചതിനെതിരെ കൊച്ചിൻ ദേവസ്വം ബോർഡ് പോലീസിൽ ഔദ്യോഗികമായി പരാതി നൽകി.

തേക്കിൻകാട് മൈതാനം രാഷ്ട്രീയ പരിപാടികൾക്കോ സമ്മേളനങ്ങൾക്കോ വേദിയാകരുതെന്ന് ബഹുമാനപ്പെട്ട ഹൈക്കോടതിയുടെ കർശന ഉത്തരവുണ്ട്. ഈ നിർദ്ദേശങ്ങൾ പൂർണ്ണമായും കാറ്റിൽപ്പറത്തിയാണ് ബിജെപി പ്രവർത്തകർ ക്ഷേത്ര മൈതാനത്തിനകത്ത് പ്രവേശിക്കുകയും പരിപാടികൾ സംഘടിപ്പിക്കുകയും ചെയ്തത്. കോടതി ഉത്തരവ് നിലനിൽക്കെ മൈതാനത്തിന്റെ പവിത്രതയും പൊതുനിയമങ്ങളും ലംഘിച്ച് നടത്തിയ രാഷ്ട്രീയ നീക്കത്തിനെതിരെയാണ് ദേവസ്വം ബോർഡ് നിയമനടപടികളിലേക്ക് നീങ്ങിയത്.

സ്വാതന്ത്ര്യദിനത്തിന്റെ പവിത്രത കളങ്കപ്പെടുത്തി: മന്ത്രി ഒ.ജെ. ജനീഷ്

വന്ദേമാതരത്തിന്റെ പേര് പറഞ്ഞ് തൃശൂരിൽ ബിജെപി നടത്തിയ പ്രതിഷേധ പരിപാടി രാജ്യത്തിന്റെ സ്വാതന്ത്ര്യദിനാഘോഷത്തിന്റെ മഹത്വവും പവിത്രതയും കളങ്കപ്പെടുത്തുന്നതാണെന്ന് കായിക മന്ത്രി ഒ.ജെ. ജനീഷ് രൂക്ഷമായി വിമർശിച്ചു. ദേശീയ പ്രാധാന്യമുള്ള ഒരു ദിനത്തിൽ ബോധപൂർവ്വം രാഷ്ട്രീയ മുതലെടുപ്പിനും സംഘർഷാവസ്ഥയ്ക്കും ശ്രമിക്കുന്നത് അംഗീകരിക്കാനാവില്ലെന്നും അദ്ദേഹം വ്യക്തമാക്കി.

നിയമലംഘനം നടത്തിയ ബിജെപി നേതാക്കൾക്കെതിരെ കേസെടുക്കണം: സിപിഐഎം

ബിജെപിയുടെ ഈ നടപടി അങ്ങേയറ്റം പ്രതിഷേധാർഹമാണെന്ന് സിപിഐഎം തൃശൂർ ജില്ലാ നേതൃത്വം വ്യക്തമാക്കി. സാധാരണ നിലയിൽ രാജ്യത്ത് ഒരു രാഷ്ട്രീയ പാർട്ടിയും സ്വാതന്ത്ര്യദിനാഘോഷ ചടങ്ങുകളെ അലങ്കോലപ്പെടുത്തുന്ന തരത്തിലുള്ള സമാന്തര പരിപാടികളോ പ്രതിഷേധങ്ങളോ സംഘടിപ്പിക്കാറില്ലെന്ന് സിപിഐഎം തൃശൂർ ജില്ലാ സെക്രട്ടറി കെ.വി. അബ്ദുൾ ഖാദർ ചൂണ്ടിക്കാട്ടി.

കോടതി വിധിയെ വെല്ലുവിളിച്ചും നാടിന്റെ സമാധാന അന്തരീക്ഷം തകർക്കാൻ ശ്രമിച്ചും നിയമലംഘനം നടത്തിയ ബിജെപി നേതാക്കൾക്കെതിരെ പോലീസ് അടിയന്തരമായി ക്രിമിനൽ കേസെടുക്കണമെന്നും സിപിഐഎം ആവശ്യപ്പെട്ടു.

വടക്കുംനാഥ ക്ഷേത്ര മൈതാനത്തിന്റെ സുരക്ഷയും കോടതി ഉത്തരവുകളുടെ പവിത്രതയും ഉറപ്പുവരുത്താൻ കർശന നടപടികൾ സ്വീകരിക്കണമെന്ന ആവശ്യം ഇതോടെ ശക്തമായിരിക്കുകയാണ്. ദേവസ്വം ബോർഡിന്റെ പരാതിയിൽ പോലീസ് തുടർനടപടികൾ ആരംഭിച്ചിട്ടുണ്ട്.

---------------

Hindusthan Samachar / Roshith K