Thiruvananthapuram, 18 ഓഗസ്റ്റ് (H.S.)

തിരുവനന്തപുരം: ഫുട്ബോൾ ഇതിഹാസം ലയണൽ മെസ്സിയെ കേരളത്തിലേക്ക് കൊണ്ടുവരുന്നതുമായി ബന്ധപ്പെട്ട് ഉയർന്ന സാമ്പത്തിക ഇടപാടുകളിലും ജിഎസ്ടി തട്ടിപ്പിലും വിട്ടുവീഴ്ചയില്ലാത്ത നടപടിയുണ്ടാകുമെന്ന് മുഖ്യമന്ത്രി വി.ഡി. സതീശൻ. മെസ്സിയുടെ സന്ദർശനവുമായി ബന്ധപ്പെട്ട മുഴുവൻ ഇടപാടുകളും പരിശോധിച്ച് കായികവകുപ്പ് സെക്രട്ടറി സമർപ്പിച്ച പ്രത്യേക അന്വേഷണ റിപ്പോർട്ടിന്മേലുള്ള സർക്കാരിന്റെ പരിശോധന പൂർത്തിയായി. റിപ്പോർട്ടിന്റെ അടിസ്ഥാനത്തിൽ സ്വീകരിക്കേണ്ട തുടർനടപടികൾ ഉടൻ തീരുമാനിക്കുമെന്നും ബന്ധപ്പെട്ട വകുപ്പുകൾക്ക് കൈമാറുമെന്നും മുഖ്യമന്ത്രി വ്യക്തമാക്കി.

മെസ്സിയുടെ കേരള സന്ദർശനത്തിന്റെ മറവിൽ നടന്ന സാമ്പത്തിക ക്രമക്കേടുകൾ വഴി സംസ്ഥാന സർക്കാരിന് 22 കോടി രൂപയുടെ ഭീമമായ നികുതി നഷ്ടമുണ്ടായതായാണ് പ്രാഥമിക വിലയിരുത്തൽ.

ഉദ്യോഗസ്ഥ വീഴ്ചയും പരിശോധിക്കും

മുൻ എൽഡിഎഫ് സർക്കാരിന്റെ കാലത്താണ് വലിയ രീതിയിലുള്ള ജിഎസ്ടി ക്രമക്കേട് ആദ്യമായി കണ്ടെത്തിയതെന്ന് മുഖ്യമന്ത്രി ചൂണ്ടിക്കാട്ടി. എന്നാൽ കണ്ടെത്തലുകൾക്ക് പിന്നാലെ നടപടികൾ അകാരണമായി മരവിപ്പിക്കപ്പെടുകയായിരുന്നു.

-

തുടർനടപടി മരവിപ്പിച്ചതിലെ ദുരൂഹത: മുൻ സർക്കാർ കണ്ടെത്തിയ സാമ്പത്തിക തിരിമറിയിൽ അന്നത്തെ ഉദ്യോഗസ്ഥർ എന്ത് നടപടിയെടുത്തു എന്നതും അന്വേഷണ പരിധിയിൽ വരും.

-

ഉദ്യോഗസ്ഥ പങ്കാളിത്തം: കേസ് മരവിപ്പിക്കാൻ ഉദ്യോഗസ്ഥരുടെ ഭാഗത്തുനിന്ന് മനഃപൂർവ്വമായ വീഴ്ചയോ ഒത്തുകളിയോ നടന്നിട്ടുണ്ടോ എന്നത് പ്രത്യേകമായി പരിശോധിക്കും.

-

നികുതി വീണ്ടെടുക്കൽ: സർക്കാരിന് നഷ്ടമായ 22 കോടി രൂപ പലിശ സഹിതം തിരിച്ചുപിടിക്കാൻ റവന്യൂ റിക്കവറി ഉൾപ്പെടെയുള്ള നിയമനടപടികൾ സ്വീകരിക്കും.

സ്പോൺസർഷിപ്പും സാമ്പത്തിക സ്രോതസ്സും നിരീക്ഷണത്തിൽ

അന്താരാഷ്ട്ര താരത്തെ കൊണ്ടുവരാൻ തയ്യാറാക്കിയ കരാറുകളിലെ സുതാര്യതക്കുറവ്, ഇവന്റ് മാനേജ്മെന്റ് കമ്പനികളുടെ പണമിടപാടുകൾ, സ്പോൺസർഷിപ്പ് വഴി സ്വരൂപിച്ച കോടിക്കണക്കിന് രൂപയുടെ യഥാർത്ഥ കണക്കുകൾ എന്നിവയാണ് കായികവകുപ്പ് സെക്രട്ടറിയുടെ റിപ്പോർട്ടിലെ പ്രധാന ഭാഗങ്ങൾ. പ്രസ്തുത ഫണ്ടുകൾ എങ്ങോട്ടേക്കാണ് കൈമാറ്റം ചെയ്യപ്പെട്ടതെന്നും ഇതിൽ സ്വകാര്യ വ്യക്തികൾ വഴിവിട്ട സാമ്പത്തിക നേട്ടം ഉണ്ടാക്കിയിട്ടുണ്ടോയെന്നും പ്രത്യേക അന്വേഷണ ഏജൻസികളെക്കൊണ്ട് പരിശോധിപ്പിക്കാൻ സാധ്യതയുണ്ട്.

സ്പോർട്സ് മേഖലയുടെ വികസനത്തിന്റെ മറവിൽ നടക്കുന്ന ഇത്തരം തട്ടിപ്പുകൾ വെച്ചുപൊറുപ്പിക്കില്ലെന്നും, കായിക വകുപ്പ് സെക്രട്ടറിയുടെ റിപ്പോർട്ട് നിയമവകുപ്പും ധനവകുപ്പും പരിശോധിച്ച ശേഷം കുറ്റക്കാർക്കെതിരെ ശക്തമായ ക്രിമിനൽ നടപടികളിലേക്ക് കടക്കുമെന്നും മുഖ്യമന്ത്രി കൂട്ടിച്ചേർത്തു. വരും ദിവസങ്ങളിൽ സംസ്ഥാന രാഷ്ട്രീയത്തിൽ വലിയ കൊടുങ്കാറ്റ് ഉയർത്തുന്ന ഒന്നായി ഈ സാമ്പത്തിക വിവാദം മാറും.

---------------

Hindusthan Samachar / Roshith K