Newdelhi , 22 ഓഗസ്റ്റ് (H.S.)

ന്യൂഡൽഹി: സാമ്പത്തിക വളർച്ചയും നിയമവാഴ്ചയും പരസ്പരം ബന്ധപ്പെട്ടിരിക്കുന്നുവെന്ന് അടിവരയിട്ട്, ബ്രിക്സ് പ്ലസ് (BRICS Plus) കൂട്ടായ്മയിലെ ജുഡീഷ്യൽ സഹകരണം ശക്തിപ്പെടുത്തുന്നതിനായി 'ന്യായോണോമിക്സ്' (Nyanomics), 'ന്യായ സേതു' (Nyay Setu) എന്നീ നൂതന ആശയങ്ങൾ അവതരിപ്പിച്ച് സുപ്രീം കോടതി ചീഫ് ജസ്റ്റിസ് സൂര്യകാന്ത്. ന്യൂഡൽഹിയിൽ സംഘടിപ്പിച്ച പതിനൊന്നാമത് ബ്രിക്സ് പ്ലസ് ലീഗൽ ഫോറത്തിന്റെ ഉദ്ഘാടന പ്ലീനറിയിൽ സംസാരിക്കുകയായിരുന്നു അദ്ദേഹം.

നിയമവാഴ്ചയും സാമ്പത്തിക സമൃദ്ധിയും തമ്മിലുള്ള അഭേദ്യമായ ബന്ധത്തെ വ്യക്തമാക്കാനാണ് 'ന്യായോണോമിക്സ്' അഥവാ നീതിയുടെ സാമ്പത്തികശാസ്ത്രം എന്ന പദം ചീഫ് ജസ്റ്റിസ് മുന്നോട്ടുവെച്ചത്. വെറും ഭൂമിശാസ്ത്രപരമായ നേട്ടങ്ങളോ പ്രകൃതിവിഭവങ്ങളോ കൊണ്ട് മാത്രം സുസ്ഥിര സാമ്പത്തിക വളർച്ച കൈവരിക്കാനാവില്ലെന്നും, വിശ്വസനീയമായ ശക്തമായ സ്ഥാപനങ്ങളാണ് അതിന്റെ അടിത്തറയെന്നും അദ്ദേഹം നിരീക്ഷിച്ചു. ലോകജനസംഖ്യയുടെ 40 ശതമാനത്തിലധികവും ആഗോള വാങ്ങൽ ശേഷിയുടെ (PPP) ഏകദേശം 40 ശതമാനവും പ്രതിനിധീകരിക്കുന്ന ബ്രിക്സ് പ്ലസ് രാജ്യങ്ങളുടെ ദ്രുതഗതിയിലുള്ള സാമ്പത്തിക പുരോഗതിക്ക് ശക്തമായ നീതിന്യായ വ്യവസ്ഥ അത്യന്താപേക്ഷിതമാണെന്ന് അദ്ദേഹം ചൂണ്ടിക്കാട്ടി.

ബ്രിക്സ് പ്ലസ് രാജ്യങ്ങളിലെ 11 വ്യത്യസ്ത നിയമ പാരമ്പര്യങ്ങളെ പരസ്പരം ബന്ധിപ്പിക്കുന്ന പാലമായി 'ന്യായ സേതു' പ്രവർത്തിക്കണമെന്ന് അദ്ദേഹം നിർദ്ദേശിച്ചു. ഇതിന്റെ ഭാഗമായി രണ്ട് പ്രധാന പദ്ധതികൾ അദ്ദേഹം ഫോറത്തിന് മുന്നിൽ അവതരിപ്പിച്ചു:

-

ബ്രിക്സ് പ്ലസ് ജുഡീഷ്യൽ ഫെലോഷിപ്പ്: അംഗരാജ്യങ്ങളിലെ ജഡ്ജിമാർക്ക് പരസ്പരം കോടതികളിൽ ഹ്രസ്വകാലത്തേക്ക് ഇരിക്കാനും വ്യത്യസ്ത നിയമവ്യവസ്ഥകളെക്കുറിച്ച് ആഴത്തിൽ മനസ്സിലാക്കാനും അവസരമൊരുക്കുന്ന സംവിധാനം.

-

ഡിജിറ്റൽ ലീഗൽ റെപ്പോസിറ്ററി (Shared Jurisprudence Repository): കോടതി വിധികളും നിയമ രേഖകളും പരസ്പരം പങ്കുവെക്കാനുള്ള ഡിജിറ്റൽ സംവിധാനം. ന്യൂഡൽഹിയിലോ പ്രിട്ടോറിയയിലോ ബ്രസീലിയയിലോ പുറപ്പെടുവിക്കുന്ന ഒരു വിധി മറ്റ് അംഗരാജ്യങ്ങളിലെ സമാന കേസുകൾ കൈകാര്യം ചെയ്യുന്ന കോടതികൾക്ക് റഫറൻസായി ഉപയോഗിക്കാൻ ഇത് സഹായിക്കും.

രാജ്യങ്ങൾ തമ്മിലുള്ള വ്യാപാര–നിക്ഷേപ ബന്ധങ്ങൾ അതിവേഗം വളരുമ്പോൾ ഉയർന്നുവരുന്ന സാമ്പത്തിക തർക്കങ്ങൾ പരിഹരിക്കുന്നതിന് ഫലപ്രദവും വേഗതയേറിയതുമായ ഒരു ജുഡീഷ്യൽ ചട്ടക്കൂട് അനിവാര്യമാണെന്ന് ഫോറത്തിൽ പങ്കെടുത്ത നിയമ വിദഗ്ധരും അഭിപ്രായപ്പെട്ടു. തർക്ക പരിഹാരങ്ങൾ സുതാര്യവും വേഗതയുള്ളതുമാക്കുന്നത് നിക്ഷേപകരുടെ ആത്മവിശ്വാസം വർദ്ധിപ്പിക്കുമെന്നും അത് ആത്യന്തികമായി ആഗോള സാമ്പത്തിക വളർച്ചയ്ക്ക് കരുത്തുപകരുമെന്നും ഫോറം വിലയിരുത്തി.

---------------

Hindusthan Samachar / Roshith K