Thiruvananthapuram, 22 ഓഗസ്റ്റ് (H.S.)

കാലാവസ്ഥാ വ്യതിയാനവും എൽ നിനോ പ്രതിഭാസവും കാരണം ഇന്ത്യയിൽ തെക്കുപടിഞ്ഞാറൻ മൺസൂൺ കടുത്ത അനിശ്ചിതത്വത്തിൽ. രാജ്യത്തിൻ്റെ ചില ഭാഗങ്ങളിൽ കനത്ത പ്രളയസമാനമായ സാഹചര്യമുള്ളപ്പോൾ, മറ്റ് ചിലയിടങ്ങൾ കടുത്ത മഴക്കമ്മി നേരിടുകയാണ്. ഡൽഹി അടക്കമുള്ള മെട്രോ നഗരങ്ങളിൽ കനത്ത മഴ പ്രവചിക്കുന്നുണ്ടെങ്കിലും പ്രായോഗികമായി മഴ കുറയുകയും അന്തരീക്ഷ താപനില 34 ഡിഗ്രി സെൽഷ്യസിന് മുകളിൽ തുടരുന്നത് വഴി കടുത്ത ഉഷ്ണം അനുഭവപ്പെടുകയുമാണ്.

സ്കൈമെറ്റ് നിരീക്ഷണം: ഓഗസ്റ്റിൽ 13% മഴക്കമ്മി

പ്രമുഖ സ്വകാര്യ കാലാവസ്ഥാ ഏജൻസിയായ സ്കൈമെറ്റിൻ്റെ കണക്കനുസരിച്ച്, ഓഗസ്റ്റ് മാസത്തിൽ രാജ്യത്ത് 13% മഴക്കമ്മി രേഖപ്പെടുത്തിയിട്ടുണ്ട്. ബംഗാൾ ഉൾക്കടലിലെ ന്യൂനമർദ്ദങ്ങളുടെ കുറവ് കാരണം ഇത്തവണ മൺസൂൺ സാധാരണയേക്കാൾ 15% നേരത്തെ അവസാനിക്കാൻ സാധ്യതയുണ്ടെന്ന് സ്കൈമെറ്റ് മെറ്റീരിയോളജി വൈസ് പ്രസിഡൻ്റ് മഹേഷ് പലാവത് വ്യക്തമാക്കുന്നു. ഇന്ത്യൻ ഓഷ്യൻ ഡൈപോൾ അനുകൂലമാകുമെന്നും അത് എൽ നിനോയുടെ ആഘാതം കുറയ്ക്കുമെന്നും കരുതിയിരുന്നെങ്കിലും, നിലവിൽ അത് ന്യൂട്രൽ അവസ്ഥയിലേക്ക് മാറിയത് തിരിച്ചടിയായി. തന്മൂലം ഓഗസ്റ്റ്, സെപ്റ്റംബർ മാസങ്ങളിലെ ശേഷിക്കുന്ന ദിവസങ്ങളിൽ മികച്ച മഴ ലഭിക്കാൻ സാധ്യത കുറവാണെന്നും അദ്ദേഹം വ്യക്തമാക്കി.

വരൾച്ചാ ഭീതിയിലുള്ള സംസ്ഥാനങ്ങൾ

വരണ്ട വടക്ക്-പടിഞ്ഞാറൻ കാറ്റ് ബംഗാൾ ഉൾക്കടലിൽ നിന്നുള്ള മേഘങ്ങളെ തടയുന്നതിനാൽ രാജസ്ഥാൻ, ഗുജറാത്ത് എന്നീ സംസ്ഥാനങ്ങളിൽ വരും ദിവസങ്ങളിലും വരണ്ട കാലാവസ്ഥ തുടരും. ഇത് വരും മാസങ്ങളിൽ കടുത്ത വരൾച്ചയ്ക്ക് കാരണമായേക്കാം. മൺസൂൺ സീസൺ ആരംഭിച്ച് മൂന്ന് മാസം പിന്നിടുമ്പോഴും പല സംസ്ഥാനങ്ങളിലും മഴ ലഭ്യത തീർത്തും അസമമാണ്.

ഹരിയാന, ബിഹാർ, ആന്ധ്രാപ്രദേശ്: 40% മുതൽ 45% വരെ കടുത്ത മഴക്കമ്മി നേരിടുന്നു.പഞ്ചാബ്: 32% മഴക്കമ്മി.കര്ണാടക: 25% മഴയുടെ കുറവ്.ഈ സംസ്ഥാനങ്ങളിലെ കടുത്ത മഴക്കമ്മി ഖാരിഫ് വിളകളുടെ ജലസേചനത്തെ ബാധിക്കുകയും കർഷകരുടെ ഉപജീവനമാർഗം പ്രതിസന്ധിയിലാക്കുകയും ചെയ്യും. മഹാരാഷ്ട്രയിലും സെപ്റ്റംബർ 4 വരെ സാധാരണയിൽ കുറവ് മഴ മാത്രമേ ലഭിക്കൂ. രാജസ്ഥാനിൽ താപനില 40 ഡിഗ്രി സെൽഷ്യസിനടുത്താണ്. സാധാരണ സെപ്റ്റംബർ 17-ഓടെ പിൻവാങ്ങുന്ന മൺസൂൺ ഇത്തവണ അതിന് മുൻപേ രാജസ്ഥാനിൽ നിന്ന് മടങ്ങാൻ സാധ്യതയേറി.

മറ്റ് ഭാഗങ്ങളിൽ കനത്ത മഴ പ്രവചനം (ഓഗസ്റ്റ് 22 - 27)

ചിലയിടങ്ങളിൽ വരൾച്ചയാണെങ്കിൽ, രാജ്യത്തിൻ്റെ ഭൂരിഭാഗം പ്രദേശങ്ങളിലും ഓഗസ്റ്റ് 27 വരെ ശക്തമായ മൺസൂൺ സജീവമായിരിക്കുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്കുന്നു.

വടക്ക്-പടിഞ്ഞാറൻ ഇന്ത്യ: ഹിമാചൽ പ്രദേശ്, ഉത്തരാഖണ്ഡ്, പഞ്ചാബ്, ഹരിയാന, ഡൽഹി, ഉത്തർപ്രദേശ്, രാജസ്ഥാൻ എന്നീ മേഖലകളിൽ വ്യാപകമായ മഴയും ഒറ്റപ്പെട്ട ശക്തമായ ഇടിയോടുകൂടിയ മഴയും ഉണ്ടാകും.

മധ്യ ഇന്ത്യ: മധ്യപ്രദേശ്, വിദർഭ, ഛത്തീസ്ഗഡ് എന്നിവിടങ്ങളിൽ ഇടിമിന്നലോട് കൂടിയ ശക്തമായ മഴ തുടരും.

കിഴക്കൻ-തെക്കൻ ഇന്ത്യ: ഒഡീഷ, പശ്ചിമ ബംഗാൾ, ജാർഖണ്ഡ്, ബിഹാർ (ഓഗസ്റ്റ് 22-26 വരെ). ആന്ധ്രാപ്രദേശ്, കർണാടക, തെലങ്കാന, തമിഴ്നാട് എന്നീ തെക്കൻ സംസ്ഥാനങ്ങളിൽ 40-50 കി.മീ വേഗതയുള്ള കാറ്റോടും ഇടിയോടും കൂടിയ ശക്തമായ മഴയ്ക്ക് സാധ്യതയുണ്ട്.

വടക്ക്-കിഴക്ക്, പടിഞ്ഞാറൻ തീരം: അസം, മേഘാലയ തുടങ്ങിയ സംസ്ഥാനങ്ങളിൽ അതിശക്തമായ മഴ പെയ്തേക്കാം. കൊങ്കൺ, ഗോവ, മധ്യ മഹാരാഷ്ട്ര, ഗുജറാത്ത് തീരങ്ങളിൽ മണിക്കൂറിൽ 30-60 കി.മീ വേഗതയിൽ വീശിയടിക്കാവുന്ന കാറ്റോടു കൂടിയ കനത്ത മഴ ഈ ആഴ്ച പ്രതീക്ഷിക്കാം.

ഒരിടവേളയ്ക്ക് ശേഷം വീണ്ടും കനക്കുന്നു; ഞായറാഴ്ച മുതൽ കേരളത്തിൽ വ്യാപക മഴയ്ക്ക് സാധ്യത,

സംസ്ഥാനത്ത് ഒരിടവേളയ്ക്ക് ശേഷം മൺസൂൺ മഴ വീണ്ടും സജീവമാകുന്നു. ബംഗാൾ ഉൾക്കടലിലെ ന്യൂനമർദത്തിന്റെയും ചക്രവാതച്ചുഴിയുടെയും പശ്ചാത്തലത്തിൽ ഓഗസ്റ്റ് 23 ഞായറാഴ്ച മുതൽ കേരളത്തിൽ മഴ ശക്തമാകുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. വരും ദിവസങ്ങളിൽ സംസ്ഥാനത്തുടനീളം ഇടിയോടു കൂടിയ വ്യാപകമായ മഴയ്ക്ക് സാധ്യതയുണ്ട്.

ഓഗസ്റ്റ് 23 (ഞായറാഴ്ച): വടക്കൻ കേരളത്തിൽ ജാഗ്രത

വടക്കൻ കേരളത്തിൽ മഴ ശക്തമാകാനുള്ള സാധ്യത കണക്കിലെടുത്ത് ഞായറാഴ്ച നാല് ജില്ലകളിൽ യെല്ലോ അലർട്ട് പ്രഖ്യാപിച്ചു. താഴെ പറയുന്ന ജില്ലകളിലാണ് ജാഗ്രതാ നിർദേശം നൽകിയിരിക്കുന്നത്..

കാസർകോട്

കണ്ണൂർ

കോഴിക്കോട്

വയനാട്

ഓഗസ്റ്റ് 24 (തിങ്കളാഴ്ച): മധ്യ-തെക്കൻ കേരളത്തിലും മഴ ശക്തമാകും

വടക്കൻ ജില്ലകൾക്ക് പുറമെ തിങ്കളാഴ്ചയോടെ മധ്യ, തെക്കൻ കേരളത്തിലും കനത്ത മഴയ്ക്ക് സാധ്യതയുണ്ടെന്നാണ് കാലാവസ്ഥാ പ്രവചനം. തിങ്കളാഴ്ച അഞ്ച് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.

തൃശൂർ

എറണാകുളം

ഇടുക്കി

പത്തനംതിട്ട

കോട്ടയം

ഈ ജില്ലകളിൽ ഒറ്റപ്പെട്ടയിടങ്ങളിൽ ശക്തമായ മഴയ്ക്കുള്ള സാധ്യതയുണ്ട്. കനത്ത മഴയോടൊപ്പം ശക്തമായ കാറ്റിനും ഇടിമിന്നലിനും സാധ്യതയുള്ളതിനാൽ താഴ്ന്ന പ്രദേശങ്ങളിൽ താമസിക്കുന്നവരും മലയോര മേഖലകളിലുള്ളവരും ആവശ്യമായ മുൻകരുതലുകൾ സ്വീകരിക്കണമെന്ന് അധികൃതർ നിർദേശിച്ചു.

തീരദേശവാസികൾക്കും മത്സ്യത്തൊഴിലാളികൾക്കും ജാഗ്രതാ നിർദ്ദേശം

അറബിക്കടലിൽ കാറ്റ് ശക്തമാകാൻ സാധ്യതയുള്ളതിനാൽ കടൽക്ഷോഭത്തിനും ഉയർന്ന തിരമാലകൾക്കും സാധ്യതയുണ്ടെന്ന് കാലാവസ്ഥാ നിരീക്ഷകർ വ്യക്തമാക്കുന്നു.

മത്സ്യബന്ധന വിലക്ക്: കേരളം, ലക്ഷദ്വീപ് തീരങ്ങളിൽ വരും ദിവസങ്ങളിൽ ശക്തമായ ഉപരിതല കാറ്റ് വീശാൻ സാധ്യതയുള്ളതിനാൽ മത്സ്യത്തൊഴിലാളികൾ കടലിൽ പോകരുതെന്ന് മുന്നറിയിപ്പുണ്ട്.

തീരദേശ ജാഗ്രത: കള്ളക്കടൽ പ്രതിഭാസം മൂലമുള്ള കടൽ കയറ്റത്തിനും പെട്ടെന്നുള്ള വെള്ളപ്പൊക്കത്തിനും സാധ്യതയുള്ളതിനാൽ താഴ്ന്ന തീരപ്രദേശങ്ങളിൽ താമസിക്കുന്നവർ അതീവ ജാഗ്രത പുലർത്തണം.

---------------

Hindusthan Samachar / CHANDHU CHANDRASEKHAR