Newdelhi, 22 ഓഗസ്റ്റ് (H.S.)

ന്യൂഡൽഹി: മഹാരാഷ്ട്ര സർക്കാർ നടപ്പിലാക്കാനൊരുങ്ങുന്ന ‘മഹാരാഷ്ട്ര മതസ്വാതന്ത്ര്യ നിയമം 2026’ (Maharashtra Freedom of Religion Act 2026) ഭരണഘടന ഉറപ്പുനൽകുന്ന മതസ്വാതന്ത്ര്യം, വ്യക്തിസ്വാതന്ത്ര്യം, സ്വകാര്യത എന്നിവയ്ക്ക് മേലുള്ള കടന്നുകയറ്റമാണെന്ന് പ്രമുഖ മുസ്ലിം സംഘടനയായ ജംഇയ്യത്തുൽ ഉലമായെ ഹിന്ദ് പ്രസിഡന്റ് മൗലാന മഹ്മൂദ് അസദ് മദനി വ്യക്തമാക്കി. രാജ്യത്തിന്റെ യഥാർത്ഥ കരുത്ത് വിവിധ മത-സാംസ്കാരിക സ്വത്വങ്ങളിലാണെന്നും, ഇഷ്ടമുള്ള മതം തിരഞ്ഞെടുക്കാനും വിശ്വസിക്കാനും പൗരന് അവകാശമില്ലെങ്കിൽ ഭരണഘടനയിലെ 25-ാം അനുച്ഛേദം അർത്ഥശൂന്യമായി മാറുമെന്നും അദ്ദേഹം ചൂണ്ടിക്കാട്ടി.

ഭരണഘടനാ ആശങ്കകളും അനാവശ്യ നിയന്ത്രണങ്ങളും

ഉത്തർപ്രദേശ്, ഗുജറാത്ത്, മധ്യപ്രദേശ് തുടങ്ങിയ സംസ്ഥാനങ്ങളിൽ കൊണ്ടുവന്ന വിവാദമായ മതപരിവർത്തന നിരോധന നിയമങ്ങളുടെ മാതൃകയിലാണ് മഹാരാഷ്ട്രയും നിയമനിർമ്മാണം നടത്തിയിട്ടുള്ളതെന്ന് മദനി പറഞ്ഞു. ഈ നിയമങ്ങളെല്ലാം ജംഇയ്യത്തുൽ ഉലമായെ ഹിന്ദ് സുപ്രീം കോടതിയിൽ ഇതിനകം തന്നെ ചോദ്യം ചെയ്തിട്ടുണ്ട്.

നിയമത്തിൽ ഉപയോഗിച്ചിരിക്കുന്ന ‘പ്രലോഭനം’ (Allurement), ‘വഞ്ചനാപരം’ (Fraudulent) തുടങ്ങിയ അവ്യക്തമായ വാക്കുകളാണ് ഏറ്റവും വലിയ പ്രശ്നം സൃഷ്ടിക്കുന്നത്. ഇത്തരം അവ്യക്തതകൾ സമാധാനപരമായ മതപ്രബോധന പ്രവർത്തനങ്ങളെപ്പോലും ക്രിമിനൽ കുറ്റങ്ങളുടെ പരിധിയിലേക്ക് കൊണ്ടുവരാൻ ദുരുപയോഗം ചെയ്യപ്പെടും. പരലോകത്തെ പ്രതിഫലങ്ങളെയും മോക്ഷത്തെയും കുറിച്ചുള്ള മതപരമായ വിശ്വാസങ്ങളും പ്രബോധനങ്ങളും പോലും ‘പ്രലോഭനമായി’ വ്യാഖ്യാനിക്കപ്പെടുന്നത് ഏകാദൈവ വിശ്വാസികളുടെ മതപരമായ ആചാരങ്ങൾക്കും അവകാശങ്ങൾക്കും എതിരാണെന്നും അദ്ദേഹം വ്യക്തമാക്കി.

വ്യക്തിസ്വാതന്ത്ര്യത്തിന്മേലുള്ള കടന്നുകയറ്റം

ഒരു വ്യക്തിയുടെ ആന്തരിക ചിന്തകളുടെയോ മതപരമായ തിരഞ്ഞെടുപ്പുകളുടെയോ മേൽനോട്ടക്കാരനാകാൻ ഭരണകൂടത്തിന് അധികാരമില്ലെന്ന് മദനി ഓർമ്മിപ്പിച്ചു. മറ്റ് സംസ്ഥാനങ്ങളിലെ സമാന നിയമങ്ങൾ വഴി നിരവധി ആളുകൾ അന്യായമായി ജയിലിലടയ്ക്കപ്പെട്ട അനുഭവം മുന്നിലുണ്ട്.

മതം മാറുന്നതിന് മുൻപ് നിർബന്ധിത സത്യവാങ്മൂലം സമർപ്പിക്കണം, പോലീസ് വെരിഫിക്കേഷന് വിധേയനാകണം, വ്യക്തിഗത വിവരങ്ങൾ പരസ്യപ്പെടുത്തണം തുടങ്ങിയ നിബന്ധനകൾ സ്വകാര്യതയെയും വ്യക്തിസ്വാതന്ത്ര്യത്തെയും ഹനിക്കുന്നതാണെന്ന് മുൻപ് സുപ്രീം കോടതി തന്നെ ആശങ്ക രേഖപ്പെടുത്തിയിട്ടുള്ളതാണ്. ഇത്തരം കടുത്ത നിബന്ധനകൾ സാധാരണക്കാർക്ക് അനാവശ്യ ഭാരമാണ് ഉണ്ടാക്കുന്നത്.

ദുരുപയോഗത്തിനെതിരെ മുന്നറിയിപ്പ്

നിർബന്ധിതമോ വഞ്ചനാപരമോ ആയ മതപരിവർത്തനങ്ങൾ തടയുന്നതിനുള്ള യഥാർത്ഥ നീക്കങ്ങളെ ജംഇയ്യത്തുൽ ഉലമായെ ഹിന്ദ് എതിർക്കുന്നില്ലെന്ന് വ്യക്തമാക്കിയ മദനി, എന്നാൽ മതസ്വാതന്ത്ര്യം സംരക്ഷിക്കുക എന്ന പേരിൽ കൊണ്ടുവരുന്ന നിയമങ്ങൾ ആ സ്വാതന്ത്ര്യത്തെ തന്നെ ഇല്ലാതാക്കരുതെന്നും ഒരു പ്രത്യേക വിഭാഗത്തെ വേട്ടയാടാനുള്ള ആയുധമായി മാറരുതെന്നും ആവശ്യപ്പെട്ടു. പ്രഖ്യാപിത ലക്ഷ്യങ്ങൾക്കപ്പുറം ഇത്തരം നിയമങ്ങളുടെ ഘടനയും പ്രയോഗവും ദുരുപയോഗ സാധ്യതകളും ജനാധിപത്യ സ്ഥാപനങ്ങളും കോടതികളും ഗൗരവമായി പരിശോധിക്കണമെന്നും അദ്ദേഹം കൂട്ടിച്ചേർത്തു.

---------------

Hindusthan Samachar / Roshith K