Kozhikode, 23 ഓഗസ്റ്റ് (H.S.)

കോഴിക്കോട്: നഗരമധ്യത്തിൽ ലൈസൻസില്ലാതെ വിദ്യാർഥികൾ അമിതവേഗതയിൽ ഓടിച്ച കാർ ഇടിച്ച് സ്കൂട്ടർ യാത്രികരായ യുവതിക്കും കുട്ടികൾക്കും നേരെ അപകടം. വയനാട് റോഡിലൂടെ അമിതവേഗത്തിൽ നഗരത്തിലേക്ക് പാഞ്ഞെത്തിയ കാർ ഇന്നലെ വൈകിട്ടോടെ ഇംഗ്ലീഷ് പള്ളി ജംക്ഷന് സമീപത്തുവെച്ചാണ് കുട്ടികളുമായി സഞ്ചരിക്കുകയായിരുന്ന യുവതിയുടെ സ്കൂട്ടറിൽ തട്ടിയത്. തലനാരിഴയ്ക്കാണ് വലിയൊരു ദുരന്തം ഒഴിവായത്.

സംഭവം നടക്കുമ്പോൾ അതുവഴി എത്തിയ റോഡ് സുരക്ഷാ വിഭാഗം പൊലീസ് വാഹനം തടഞ്ഞുനിർത്തുകയും കാറിലുണ്ടായിരുന്നവരെ വിശദമായി ചോദ്യം ചെയ്യുകയുമായിരുന്നു. തുടർന്ന് നടത്തിയ പരിശോധനയിലാണ് കാറോടിച്ച ആളടക്കം വാഹനത്തിലുണ്ടായിരുന്ന രണ്ട് വിദ്യാർത്ഥികൾക്കും ഡ്രൈവിങ് ലൈസൻസ് ഇല്ലെന്ന ഗുരുതരമായ വിവരം വ്യക്തമായത്. ഇരുവരും പ്രായപൂർത്തിയായ വിദ്യാർഥികളാണെന്ന് പൊലീസ് സ്ഥിരീകരിച്ചു.

അപകടത്തിൽ സ്കൂട്ടർ യാത്രികരായ യുവതിക്കോ കുട്ടികൾക്കോ പരുക്കുകളൊന്നും ഏൽക്കാത്തതിനാൽ അവർ തുടർയാത്ര തിരിച്ചുപോയി. എന്നാൽ ലൈസൻസില്ലാതെ അശ്രദ്ധമായി വാഹനം ഓടിച്ചതിന് വിദ്യാർഥികൾക്കെതിരെ കർശന നടപടി സ്വീകരിക്കാൻ പൊലീസ് ഒരുങ്ങി. ഇതേത്തുടർന്ന് തങ്ങൾക്ക് തെറ്റുപറ്റിയെന്ന് സമ്മതിച്ച വിദ്യാർഥികൾ പൊലീസിനോട് അപേക്ഷിച്ചു.

തുടർന്ന് ഇവരുടെ ലൈസൻസുള്ള ബന്ധുവിനെ വിളിച്ചുവരുത്താൻ പൊലീസ് നിർദേശിച്ചു. സ്ഥലത്തെത്തിയ ബന്ധുവിന്റെ സാന്നിധ്യത്തിൽ കാർ വിട്ടുകൊടുക്കുകയും, ലൈസൻസില്ലാത്തവർക്ക് വാഹനം ഓടിക്കാൻ നൽകിയതിന് കാർ ഉടമയ്ക്കെതിരെ മോട്ടോർ വാഹന നിയമപ്രകാരം പിഴ ചുമത്തുകയും ചെയ്തു.

നഗരത്തിലെ തിരക്കേറിയ റോഡുകളിൽ വിദ്യാർഥികളും യുവാക്കളും ഉൾപ്പെടുന്ന സംഘങ്ങൾ അമിതവേഗത്തിലും കൃത്യമായ രേഖകളില്ലാതെയും വാഹനം ഓടിക്കുന്നത് വർധിച്ചുവരുന്ന സാഹചര്യത്തിൽ വരും ദിവസങ്ങളിൽ വാഹന പരിശോധന കൂടുതൽ കർശനമാക്കാനാണ് ട്രാഫിക് പൊലീസിന്റെ തീരുമാനം. അനധികൃത ഡ്രൈവിങ്ങും നിയമലംഘനങ്ങളും ശ്രദ്ധയിൽപ്പെട്ടാൽ കർശന നടപടിയുണ്ടാകുമെന്നും അധികൃതർ മുന്നറിയിപ്പ് നൽകി.

മോട്ടോർ വാഹന നിയമത്തിലെ വകുപ്പ് 199A പ്രകാരം, പ്രായപൂർത്തിയാകാത്തവർ ലൈസൻസില്ലാതെ വാഹനം ഓടിച്ചാൽ കേരള മോട്ടോർ വാഹന വകുപ്പും (MVD) പോലീസും കർശനമായ ശിക്ഷാനടപടികളാണ് സ്വീകരിക്കുന്നത്.

മാതാപിതാക്കൾക്കും വാഹന ഉടമയ്ക്കുമുള്ള ശിക്ഷകൾ

-

പിഴ: ₹25,000 രൂപ പിഴ.

-

തടവുശിക്ഷ: രക്ഷിതാവിനോ വാഹന ഉടമയ്ക്കോ 3 വർഷം വരെ തടവ്.

-

വാഹന രജിസ്ട്രേഷൻ റദ്ദാക്കൽ: കുറ്റകൃത്യത്തിന് ഉപയോഗിച്ച വാഹനത്തിന്റെ രജിസ്ട്രേഷൻ സർട്ടിഫിക്കറ്റ് (RC) 1 വർഷത്തേക്ക് റദ്ദാക്കും.

പ്രായപൂർത്തിയാകാത്ത ഡ്രൈവർക്കുള്ള ശിക്ഷകൾ

-

ജുവനൈൽ ജസ്റ്റിസ് ആക്ട്: കുട്ടിക്കെതിരെ ജുവനൈൽ ജസ്റ്റിസ് (കുട്ടികളുടെ സംരക്ഷണവും പരിപാലനവും) നിയമപ്രകാരം നടപടിയെടുക്കും.

-

ലൈസൻസ് വിലക്ക്: 25 വയസ്സ് പൂർത്തിയാകുന്നതുവരെ ലേണേഴ്സ് ലൈസൻസിനോ ഡ്രൈവിംഗ് ലൈസൻസിനോ അപേക്ഷിക്കാൻ അർഹതയുണ്ടായിരിക്കില്ല.

ഇളവ് ലഭിക്കുന്ന സാഹചര്യം

കുട്ടി വാഹനം ഓടിച്ചത് തങ്ങളുടെ അറിവോടെയല്ലെന്നും, അത് തടയാൻ ആവശ്യമായ എല്ലാ മുൻകരുതലുകളും സ്വീകരിച്ചിരുന്നുവെന്നും കോടതിയിൽ തെളിയിക്കാൻ സാധിച്ചാൽ മാത്രമേ രക്ഷിതാവിനെയോ വാഹന ഉടമയെയോ ശിക്ഷയിൽ നിന്ന് ഒഴിവാക്കുകയുള്ളൂ.

---------------

Hindusthan Samachar / Roshith K