Palakkad , 23 ഓഗസ്റ്റ് (H.S.)

പാലക്കാട്: മംഗളൂരു റെയിൽവേ മേഖലയെ പാലക്കാട് ഡിവിഷനിൽ നിന്ന് അടർത്തിമാറ്റാനുള്ള കേന്ദ്ര റെയിൽവേ മന്ത്രാലയത്തിന്റെ നീക്കത്തിനെതിരെ ശക്തമായ രാഷ്ട്രീയ പോരാട്ടത്തിനൊരുങ്ങി യുഡിഎഫ്. ദക്ഷിണ റെയിൽവേയുടെ പരിധിയിലുള്ള സുപ്രധാന റൂട്ടുകൾ വെട്ടിമാറ്റി കർണാടകയിലെ ഡിവിഷനുകൾക്ക് കീഴിലാക്കാനുള്ള തീരുമാനം സംസ്ഥാനത്തിന്റെ റെയിൽവേ വികസനത്തിന് കനത്ത തിരിച്ചടിയാണെന്ന് യുഡിഎഫ് എംപിമാർ ചൂണ്ടിക്കാട്ടി.

കർണാടകയിലെ രാഷ്ട്രീയ ലക്ഷ്യം

കർണാടക നിയമസഭാ തെരഞ്ഞെടുപ്പ് മുന്നിൽക്കണ്ട് ബിജെപി നടത്തുന്ന രാഷ്ട്രീയ നീക്കങ്ങളുടെ ഭാഗമായാണ് റെയിൽവേയുടെ ഈ ഏകപക്ഷീയ തീരുമാനമെന്ന് കോൺഗ്രസ് എംപിമാർ ആരോപിച്ചു. മംഗളൂരു മേഖല പാലക്കാട് ഡിവിഷന്റെ കീഴിൽ നിന്ന് ഒഴിവാക്കപ്പെടുന്നതോടെ ഡിവിഷന്റെ വരുമാനത്തിലും വികസന പദ്ധതികളിലും കാര്യമായ ഇടിവുണ്ടാകും. ഇത് കേരളത്തിന് അർഹതപ്പെട്ട റെയിൽവേ വികസനങ്ങളെ അട്ടിമറിക്കാനുള്ള ആസൂത്രിത നീക്കമാണ്. വടക്കൻ കേരളത്തിലെ യാത്രക്കാരെയും ചരക്കുനീക്കത്തെയും ദോഷകരമായി ബാധിക്കുന്ന ഇത്തരം തീരുമാനങ്ങൾ അംഗീകരിക്കാനാവില്ലെന്നും യുഡിഎഫ് വ്യക്തമാക്കി.

സുരേഷ് ഗോപി നിലപാട് വ്യക്തമാക്കണം

കേരളത്തിൽ നിന്നുള്ള ഏക കേന്ദ്രമന്ത്രിയെന്ന നിലയിൽ സുരേഷ് ഗോപി ഈ വിഷയത്തിൽ അടിയന്തരമായി ഇടപെടണമെന്നും തന്റെ നിലപാട് വ്യക്തമാക്കണമെന്നും എംപിമാർ ആവശ്യപ്പെട്ടു. സംസ്ഥാനത്തിന്റെ വികസന താൽപ്പര്യങ്ങൾക്ക് വിരുദ്ധമായി റെയിൽവേ നടത്തുന്ന ഇത്തരം വിഭജന നീക്കങ്ങൾക്കെതിരെ കേന്ദ്ര മന്ത്രിസഭയിൽ ശബ്ദമുയർത്താൻ അദ്ദേഹം തയ്യാറാകണം. കേരളത്തിന്റെ പൊതുവായ ആവശ്യങ്ങളെ അവഗണിച്ച് അയൽ സംസ്ഥാനത്തെ രാഷ്ട്രീയ നേട്ടത്തിനായി കേന്ദ്രം നടത്തുന്ന നീക്കങ്ങൾക്ക് മന്ത്രി മൗനാനുവാദം നൽകുകയാണോ എന്ന് വ്യക്തമാക്കണമെന്നും നേതാക്കൾ ചോദിച്ചു.

പ്രക്ഷോഭത്തിലേക്ക് യുഡിഎഫ്

പാലക്കാട് ഡിവിഷനെ ദുർബലപ്പെടുത്താനുള്ള നീക്കത്തിനെതിരെ പാർലമെന്റിനകത്തും പുറത്തും ശക്തമായ പ്രതിഷേധം സംഘടിപ്പിക്കാനാണ് യുഡിഎഫിന്റെ തീരുമാനം. സംസ്ഥാനത്തിന്റെ താല്പര്യങ്ങൾ സംരക്ഷിക്കുന്നതിനായി ജനങ്ങളെ അണിനിരത്തി ബഹുജന പ്രക്ഷോഭം ആരംഭിക്കുമെന്നും എംപിമാർ അറിയിച്ചു. റെയിൽവേയുടെ ഭാഗത്തുനിന്ന് അനുകൂലമായ പുനർവിചിന്തനം ഉണ്ടാകുന്നതുവരെ വിഷയം സജീവമായി നിലനിർത്തുമെന്നാണ് യുഡിഎഫ് നേതൃത്വം നൽകുന്ന മുന്നറിയിപ്പ്.

അതേസമയം സമാന വാദവുമായി കേരളത്തിലെ ഇടതുപക്ഷ നേതാക്കളും രംഗത്ത് വന്നിട്ടുണ്ട്. റെയിൽവേയുടെ പാലക്കാട് ഡിവിഷൻ വിഭജിക്കാനുള്ള കേന്ദ്ര നീക്കം ബിജെപി സർക്കാർ കേരളത്തോട് കാണിക്കുന്ന കടുത്ത വിവേചനമാണെന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ പ്രസ്താവിച്ചു . സംസ്ഥാനത്തിന്റെ പൊതുതാല്പര്യങ്ങളെ പാടേ അവഗണിച്ചുകൊണ്ട് കേന്ദ്രം നടത്തുന്ന ഇത്തരം വിവേചനപരമായ നിലപാടുകൾ ഒരു കാരണവശാലും അംഗീകരിക്കാൻ കഴിയില്ലെന്നും, ഇതിനെതിരെ ശക്തമായ ബഹുജന പ്രതിഷേധങ്ങളുമായി മുന്നോട്ട് പോകുമെന്നും അദ്ദേഹം വാർത്താസമ്മേളനത്തിൽ വ്യക്തമാക്കി.

കേരളത്തിന്റെ റെയിൽവേ വികസനത്തെയും യാത്രക്കാരുടെ സൗകര്യങ്ങളെയും കാര്യമായി ബാധിക്കുന്ന നടപടിയാണിതെന്ന് അദ്ദേഹം ചൂണ്ടിക്കാട്ടി. ദക്ഷിണ റെയിൽവേയുടെ പരിധിയിലുള്ള പാലക്കാട് ഡിവിഷൻ വിഭജിക്കപ്പെടുന്നതോടെ സംസ്ഥാനത്തിന് അർഹതപ്പെട്ട വികസന പദ്ധതികളും പുതിയ ട്രെയിൻ സർവീസുകളും വരുമാനവും നഷ്ടപ്പെടുന്ന സാഹചര്യമുണ്ടാകും. രാജ്യത്തെ റെയിൽവേ ശൃംഖലയിൽ തന്നെ മികച്ച വരുമാനവും കാര്യക്ഷമതയും പുലർത്തുന്ന ഡിവിഷനുകളിലൊന്നായ പാലക്കാടിനെ വെട്ടിമുറിക്കുന്നത് സംസ്ഥാനത്തിന്റെ റെയിൽവേ വികസനത്തെ വർഷങ്ങളോളം പിന്നോട്ടടിപ്പിക്കും. അദ്ദേഹം പറഞ്ഞു.

---------------

Hindusthan Samachar / Roshith K