Mumbai, 24 ഓഗസ്റ്റ് (H.S.)

മുംബൈ: വിനായക ചതുർഥി ആഘോഷങ്ങളുടെ ഭാഗമായി മുംബൈയിൽ നടന്ന ഗണേശ വിഗ്രഹ ഘോഷയാത്രയ്ക്ക് നേരെ അജ്ഞാതർ മുട്ടയെറിഞ്ഞതിനെ തുടർന്ന് വൻ സംഘർഷാവസ്ഥ. ദക്ഷിണ മുംബൈയിലെ മസ്ഗാവ് പ്രദേശത്താണ് ഞായറാഴ്ച അർധരാത്രിയോടെ ക്രമസമാധാന നില തകിടം മറിക്കുന്ന സംഭവങ്ങൾ അരങ്ങേറിയത്. സംഭവത്തെ തുടർന്ന് രണ്ട് വിഭാഗങ്ങൾ തമ്മിൽ നേർക്കുനേർ ഏറ്റുമുട്ടലുണ്ടായതോടെ പ്രദേശത്ത് വൻ പോലീസ് സന്നാഹത്തെ വിന്യസിച്ച് സുരക്ഷ ശക്തമാക്കി.

ഗണേശ വിഗ്രഹം ഘോഷയാത്രയായി കൊണ്ടുവരുന്നതിനിടെ സമീപത്തെ കെട്ടിടത്തിന് മുകളിൽനിന്ന് ചിലർ ഘോഷയാത്രയിലേക്ക് മുട്ടകൾ എറിയുകയായിരുന്നുവെന്നാണ് ലഭിക്കുന്ന വിവരം. പ്രകോപനപരമായ ഈ നീക്കത്തിന് പിന്നാലെ ഘോഷയാത്രയിൽ പങ്കെടുത്ത നൂറുകണക്കിന് ആളുകൾ പ്രദേശത്ത് തടിച്ചുകൂടുകയും മുദ്രാവാക്യം വിളികളുമായി രംഗത്തെത്തുകയും ചെയ്തു. തുടർന്ന് രണ്ട് വിഭാഗങ്ങൾ തമ്മിൽ വാക്കേറ്റവും കയ്യാങ്കളിയും ഉടലെടുത്തതോടെ അന്തരീക്ഷം കലുഷിതമായി.

വിവരമറിഞ്ഞ് വൻ പൊലീസ് സംഘം ഉടൻ തന്നെ സ്ഥലത്തെത്തി ലാത്തിവീശിയും ബാരിക്കേഡുകൾ തീർത്തും സ്ഥിതിഗതികൾ നിയന്ത്രണവിധേയമാക്കി. എന്നാൽ, മതവികാരം വ്രണപ്പെടുത്താനും ക്രമസമാധാനം തകർക്കാനും ശ്രമിച്ച അക്രമികളെ ഉടനടി അറസ്റ്റ് ചെയ്യണമെന്ന് ആവശ്യപ്പെട്ട് നാട്ടുകാരും ഉത്സവക്കമ്മിറ്റി ഭാരവാഹികളും പ്രതിഷേധം ശക്തമാക്കിയിട്ടുണ്ട്.

സംഭവത്തെ ശക്തമായി അപലപിച്ച അഖിൽ പബ്ലിക് ഫെസ്റ്റിവൽ കമ്മിറ്റി പ്രസിഡന്റ് ഹിതേഷ് ജാദവ്, കുറ്റക്കാർക്കെതിരെ 24 മണിക്കൂറിനകം കർശന നടപടിയെടുക്കണമെന്ന് പോലീസിനോട് ആവശ്യപ്പെട്ടു. മഹാരാഷ്ട്ര സാംസ്കാരിക മന്ത്രി ആശിഷ് ഷേലാർ വിഷയത്തിൽ ഇടപെട്ടിട്ടുണ്ടെന്നും അക്രമികൾക്കെതിരെ ശക്തമായ നടപടിയുണ്ടാകുമെന്ന് ഉറപ്പ് ലഭിച്ചിട്ടുണ്ടെന്നും അദ്ദേഹം വ്യക്തമാക്കി.

ഇത്തരമൊരു സംഭവം ഒറ്റപ്പെട്ടതല്ലെന്നും സമാനമായ രീതിയിൽ വർഷങ്ങൾക്ക് മുൻപ് ബൈക്കുള നാഗ്പാഡ പ്രദേശത്തും ഘോഷയാത്രയ്ക്ക് നേരെ അക്രമം നടന്നിരുന്നുവെന്നും നാട്ടുകാർ ചൂണ്ടിക്കാട്ടുന്നു. 2022 ഓഗസ്റ്റിൽ കാമാത്തിപുരയിൽ ഗണേശ വിഗ്രഹം കൊണ്ടുവരുന്നതിനിടെ മുട്ടയെറിഞ്ഞ സംഭവത്തിൽ മതവിദ്വേഷം വളർത്തൽ ഉൾപ്പെടെയുള്ള വകുപ്പുകൾ ചുമത്തി പ്രതിയെ അന്ന് പോലീസ് അറസ്റ്റ് ചെയ്തിരുന്നു.

നിലവിൽ മസ്ഗാവ് പ്രദേശത്ത് ഏത് അടിയന്തര സാഹചര്യവും നേരിടാൻ സായുധ പോലീസ് സേനയെ നിയോഗിച്ചിട്ടുണ്ട്. പ്രദേശത്തെ സിസിടിവി ദൃശ്യങ്ങൾ പരിശോധിച്ച് കെട്ടിടത്തിന് മുകളിൽനിന്ന് അക്രമം നടത്തിയവരെ തിരിച്ചറിയാനുള്ള ഊർജിത ശ്രമത്തിലാണ് പോലീസ്. ജനങ്ങൾ സംയമനം പാലിക്കണമെന്നും വ്യാജപ്രചാരണങ്ങളിൽ വീഴരുതെന്നും അധികൃതർ നിർദേശിച്ചു. ശാന്തത വീണ്ടെടുത്തെങ്കിലും പ്രദേശത്ത് കനത്ത ജാഗ്രത തുടരുകയാണ്.

---------------

Hindusthan Samachar / Roshith K