Neewdelhi , 25 ഓഗസ്റ്റ് (H.S.)

ന്യൂഡൽഹി: ദേശീയ തലസ്ഥാനത്ത് ക്രമസമാധാന പാലനം കൂടുതൽ കാര്യക്ഷമമാക്കുന്നതിന്റെ ഭാഗമായി ഇന്റലിജൻസ് നിരീക്ഷണ സംവിധാനങ്ങൾ സമഗ്രമായി നവീകരിക്കാൻ ഡൽഹി പോലീസ് തീരുമാനിച്ചു. വരും ദിവസങ്ങളിൽ നടക്കാനിരിക്കുന്ന വലിയ പ്രതിഷേധ പ്രകടനങ്ങളും ബഹുജന സംഗമങ്ങളും മുന്നിൽക്കണ്ട് സ്പെഷ്യൽ ബ്രാഞ്ചിന്റെ പ്രവർത്തനങ്ങൾ ശക്തിപ്പെടുത്താനാണ് ഉന്നതതല തീരുമാനം. ഡൽഹി പോലീസ് കമ്മീഷണറുടെ പ്രത്യേക നിർദേശത്തെ തുടർന്നാണ് ഇന്റലിജൻസ് വിഭാഗത്തിന്റെ പ്രവർത്തനരീതികളിൽ സുപ്രധാന മാറ്റങ്ങൾ വരുത്തുന്നത്.

ജന്തർ മന്തർ, കൊണാട്ട് പ്ലേസ് തുടങ്ങിയ പ്രധാന മേഖലകളിൽ സമീപകാലത്തുണ്ടായ വൻ പ്രതിഷേധ പരിപാടികളുടെ പശ്ചാത്തലത്തിലാണ് ഈ നീക്കം. പലപ്പോഴും പരിപാടികൾക്കായി അനുമതി തേടുമ്പോൾ സംഘാടകർ നൽകുന്ന കണക്കുകളേക്കാൾ എത്രയോ ഇരട്ടി ആളുകളാണ് പിന്നീട് സമരവേദികളിലേക്ക് എത്തുന്നതെന്ന് കണ്ടെത്തിയിട്ടുണ്ട്. ഈ സാഹചര്യം മുൻകൂട്ടി കണ്ട്, ഏത് പ്രധാന പ്രക്ഷോഭത്തിന് മുൻപും കൃത്യവും സമഗ്രവുമായ വിവര ശേഖരണം നടത്താൻ രഹസ്യാന്വേഷണ വിഭാഗത്തെയും സ്പെഷ്യൽ ബ്രാഞ്ചിനെയും ചുമതലപ്പെടുത്തി.

പുതിയ ഉത്തരവ് പ്രകാരം, സമരങ്ങളിലെ യഥാർത്ഥ ജനപങ്കാളിത്തം, പങ്കെടുക്കുന്ന സംഘടനകൾ, പ്രമുഖ നേതാക്കൾ, അവരുടെ ആവശ്യങ്ങൾ, സമരത്തിന്റെ ആത്യന്തിക ലക്ഷ്യം എന്നിവയെക്കുറിച്ച് സമഗ്രമായ റിപ്പോർട്ട് തയാറാക്കണം. ഇതിനുപുറമെ പ്രതിഷേധക്കാർ തലസ്ഥാനത്തേക്ക് എത്തുന്ന യാത്രാമാർഗങ്ങൾ, അവരുടെ താമസ സൗകര്യങ്ങൾ, മടക്കയാത്രയ്ക്കുള്ള ക്രമീകരണങ്ങൾ എന്നിവയും സ്പെഷ്യൽ ബ്രാഞ്ച് നിരീക്ഷിക്കും. വിവിധ സംഘടനകൾ തമ്മിലുള്ള ബന്ധം, അവരുടെ സാമ്പത്തിക സ്രോതസ്സുകൾ, ലോജിസ്റ്റിക്സ് വിവരങ്ങൾ, ഡൽഹിയിലെ പ്രാദേശിക ബന്ധങ്ങൾ എന്നിവയും അന്വേഷണ പരിധിയിൽ ഉൾപ്പെടും.

പ്രതിഷേധങ്ങൾ നടക്കുന്ന സമയത്ത് ഗ്രൗണ്ട് ലെവലിൽ നിന്നുള്ള വിവരങ്ങൾ ഉന്നത ഉദ്യോഗസ്ഥരിലേക്ക് വേഗത്തിൽ കൈമാറുന്നതിനും ഏകോപനം ഉറപ്പാക്കുന്നതിനും വയർലെസ് ആശയവിനിമയ സംവിധാനങ്ങളും നവീകരിക്കുന്നുണ്ട്. സമാധാനപരമായ ജനാധിപത്യ പ്രതിഷേധങ്ങളെ തടസ്സപ്പെടുത്തുകയല്ല, മറിച്ച് മുൻകൂട്ടിയുള്ള വ്യക്തമായ വിലയിരുത്തലുകളിലൂടെ സുരക്ഷാ വിന്യാസം കാര്യക്ഷമമാക്കാനും നഗരത്തിൽ ക്രമസമാധാന പ്രശ്നങ്ങൾ ഉണ്ടാകാതിരിക്കാനും വേണ്ടിയാണ് ഈ നടപടികളെന്ന് പോലീസ് വ്യക്തമാക്കി. കൃത്യമായ മുന്നൊരുക്കങ്ങൾ സാധ്യമാകുന്നതോടെ തലസ്ഥാന നഗരിയിലെ ദൈനംദിന ജീവിതത്തെ ബാധിക്കാത്ത വിധം സ്ഥിതിഗതികൾ നിയന്ത്രണവിധേയമാക്കാൻ സാധിക്കുമെന്നാണ് അധികൃതരുടെ വിലയിരുത്തൽ.

---------------

Hindusthan Samachar / Roshith K