Thiruvananthapuram, 25 ഓഗസ്റ്റ് (H.S.)

തിരുവനന്തപുരം: സംസ്ഥാനത്ത് നിയമവിരുദ്ധമായി രൂപമാറ്റം വരുത്തിയ വാഹനങ്ങൾക്കെതിരെ മോട്ടോർ വാഹന വകുപ്പ് നടപടികൾ കർശനമാക്കുന്നു. വാഹനങ്ങളിലെ അനധികൃത മോഡിഫിക്കേഷൻ കണ്ടെത്തി കനത്ത പിഴ ഈടാക്കാനും രൂപമാറ്റം വരുത്തിയ ഭാഗങ്ങൾ പൂർണമായി നീക്കം ചെയ്യിക്കാനും ഗതാഗത കമ്മീഷണർ ഉദ്യോഗസ്ഥർക്ക് കർശന നിർദേശം നൽകി. വിഷയത്തിൽ ഹൈക്കോടതിയുടെ ഭാഗത്തുനിന്നുണ്ടായ രൂക്ഷവിമർശനങ്ങൾക്ക് പിന്നാലെയാണ് ഗതാഗത വകുപ്പിന്റെ അടിയന്തര ഇടപെടൽ.

രൂപമാറ്റം മാറ്റിയെന്ന് ഉറപ്പാക്കണം

റോഡിലെ പരിശോധനകളിൽ പിഴ ഈടാക്കുന്നതുകൊണ്ട് മാത്രം നടപടികൾ അവസാനിപ്പിക്കരുതെന്ന് നിർദേശത്തിൽ വ്യക്തമാക്കുന്നു. അനധികൃതമായി ഘടിപ്പിച്ച ഭാഗങ്ങൾ പൂർണമായി നീക്കം ചെയ്ത് വാഹനം പൂർവസ്ഥിതിയിലാക്കിയെന്ന് എൻഫോഴ്സ്മെന്റ് ഉദ്യോഗസ്ഥർ നേരിട്ട് കണ്ട് ബോധ്യപ്പെടണം. തുടർന്ന് വാഹനം ആർ.ടി.ഒ ഓഫീസിലോ നിർദിഷ്ട കേന്ദ്രങ്ങളിലോ ഹാജരാക്കി ഒറിജിനൽ സ്പെസിഫിക്കേഷനിലേക്ക് മാറ്റിയെന്ന് ഉറപ്പുവരുത്തണം. നിർദേശം പാലിക്കാത്ത വാഹനങ്ങളുടെ രജിസ്ട്രേഷൻ താൽക്കാലികമായി റദ്ദാക്കുന്നത് ഉൾപ്പെടെയുള്ള കടുത്ത നടപടികളിലേക്ക് കടക്കാനാണ് തീരുമാനം.

ഒരാഴ്ചയ്ക്കുള്ളിൽ റിപ്പോർട്ട് സമർപ്പിക്കണം

സംസ്ഥാനവ്യാപകമായി നടക്കുന്ന പരിശോധനകളിൽ ഓരോ എൻഫോഴ്സ്മെന്റ് സ്ക്വാഡും ഈടാക്കിയ പിഴയുടെയും സ്വീകരിച്ച തുടർനടപടികളുടെയും വിശദമായ കണക്കുകൾ ഒരാഴ്ചയ്ക്കുള്ളിൽ കമ്മീഷണറേറ്റിൽ സമർപ്പിക്കണം. പ്രധാനമായും യുവാക്കൾ ഉപയോഗിക്കുന്ന ഇരുചക്ര വാഹനങ്ങൾ, കാറുകൾ, ടൂറിസ്റ്റ് ബസുകൾ എന്നിവ കേന്ദ്രീകരിച്ചായിരിക്കും പരിശോധന ശക്തമാക്കുക.

പ്രധാനമായും പരിശോധിക്കുന്ന ഘടകങ്ങൾ

-

ശബ്ദമലിനീകരണം: അനുവദനീയമായ പരിധി ലംഘിച്ച് അമിത ശബ്ദം പുറപ്പെടുവിക്കുന്ന ആഫ്റ്റർമാർക്കറ്റ് സൈലൻസറുകൾ.

-

അനധികൃത ലൈറ്റുകൾ: എതിരെ വരുന്ന വാഹനങ്ങളുടെ കാഴ്ച മറയ്ക്കുന്ന തരത്തിലുള്ള അമിത വെളിച്ചമുള്ള എൽ.ഇ.ഡി ബാറുകൾ, ലേസർ ലൈറ്റുകൾ, കളർ ഫ്ലാഷറുകൾ.

-

ഘടനയിലെ മാറ്റങ്ങൾ: ടയറുകളുടെ വീതിയും വലിപ്പവും അശാസ്ത്രീയമായി വർധിപ്പിക്കൽ, സസ്പെൻഷൻ ഉയർത്തുകയോ താഴ്ത്തുകയോ ചെയ്യുന്ന പ്രവണതകൾ.

-

സൗണ്ട് സിസ്റ്റങ്ങൾ: വാഹനങ്ങളുടെ ഉൾഭാഗത്ത് അമിത ശേഷിയുള്ള ഡി.ജെ സൗണ്ട് സിസ്റ്റങ്ങളും നിരോധിത എയർ ഹോണുകളും ഘടിപ്പിക്കൽ.

വാഗ്ദാനങ്ങളും നിയമ തടസ്സങ്ങളും

വാഹനപ്രേമികളുടെ നിരന്തര ആവശ്യങ്ങളെ തുടർന്ന്, സുരക്ഷയെ ബാധിക്കാത്ത തരത്തിലുള്ള ചെറിയ മോഡിഫിക്കേഷനുകൾ അനുവദിക്കുന്നത് പരിഗണിക്കാമെന്ന് സർക്കാർ നേരത്തെ നിലപാടെടുത്തിരുന്നു. എന്നാൽ മോട്ടോർ വാഹന നിയമത്തിലെ സെക്ഷൻ 52 പ്രകാരം നിർമാതാക്കൾ നിശ്ചയിച്ച ഘടനയിൽ മാറ്റം വരുത്തുന്നത് നിയമവിരുദ്ധമാണെന്ന സുപ്രീം കോടതി വിധിയും, വിഷയത്തിൽ ഹൈക്കോടതി സ്വീകരിച്ച വിട്ടുവീഴ്ചയില്ലാത്ത സമീപനവുമാണ് കർശന നടപടികളിലേക്ക് വകുപ്പിനെ നയിച്ചത്. റോഡ് സുരക്ഷ മുൻനിർത്തി പരിശോധനകളിൽ ഒട്ടും വിട്ടുവീഴ്ച ഉണ്ടാകില്ലെന്നാണ് അധികൃതർ വ്യക്തമാക്കുന്നത്.

---------------

Hindusthan Samachar / Roshith K