Bengaluru, 25 ഓഗസ്റ്റ് (H.S.)

ബെംഗളൂരു: അതീവ വിഷാംശമുള്ള സസ്യമായ ഉമ്മത്തിന്റെ (Datura) കായ്കളും വിത്തുകളും ഭക്ഷ്യവസ്തുവെന്ന വ്യാജേന ഓൺലൈനിലൂടെ വിറ്റഴിച്ചതിനെത്തുടർന്ന് പ്രമുഖ ഇ-കൊമേഴ്സ്, ക്വിക്ക് കൊമേഴ്സ് പ്ലാറ്റ്ഫോമുകൾക്കെതിരെ കർശന നടപടിയുമായി കർണാടക സർക്കാർ. ആമസോൺ, സ്വിഗ്ഗി ഇൻസ്റ്റാമാർട്ട്, ബിഗ്ബാസ്കറ്റ് എന്നീ പ്രമുഖ കമ്പനികളുടെ ഫുഡ് ലൈസൻസുകൾ കർണാടക ഭക്ഷ്യസുരക്ഷാ-ഡ്രഗ് അഡ്മിനിസ്ട്രേഷൻ വകുപ്പ് അടിയന്തരമായി സസ്പെൻഡ് ചെയ്തു. വകുപ്പിന്റെ അടുത്ത ഉത്തരവുണ്ടാകുന്നതുവരെ ഈ സസ്പെൻഷൻ തുടരും.

പരിശോധനയും കണ്ടെത്തലുകളും

ഭക്ഷ്യസുരക്ഷാ വകുപ്പ് നടത്തിയ വിപുലമായ പരിശോധനയിലാണ് അതീവ ഗുരുതരമായ ഈ ക്രമക്കേട് വെളിച്ചത്തുവന്നത്. മനുഷ്യർക്ക് ഭക്ഷിക്കാൻ അനുയോജ്യമായ വസ്തുക്കൾ എന്ന രീതിയിലാണ് ഈ പ്ലാറ്റ്ഫോമുകളിൽ ഉമ്മത്തിന്റെ വിത്തുകളും കായ്കളും ലിസ്റ്റ് ചെയ്തിരുന്നത്. ഇതിൽ ചില പാക്കറ്റുകളിൽ ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യയുടെ (FSSAI) ലൈസൻസ് നമ്പറോ രജിസ്ട്രേഷൻ നമ്പറോ പോലും രേഖപ്പെടുത്തിയിരുന്നതായി ഉദ്യോഗസ്ഥർ കണ്ടെത്തി. ആരോഗ്യത്തിന് വലിയ ഭീഷണിയാകുന്ന ഒരു വിഷച്ചെടി എങ്ങനെ ഭക്ഷ്യവസ്തുവായി ലിസ്റ്റ് ചെയ്യപ്പെട്ടു എന്നത് ഗൗരവകരമായ സുരക്ഷാവീഴ്ചയായാണ് അധികൃതർ വിലയിരുത്തുന്നത്.

നടപടികൾ കടുപ്പിച്ച് ഭരണകൂടം

ഉമ്മത്തിന്റെ ഉപയോഗം ഗുരുതരമായ ആരോഗ്യപ്രശ്നങ്ങൾക്കും ജീവഹാനിക്കും വരെ കാരണമായേക്കാമെന്ന് വ്യക്തമാക്കിയ വകുപ്പ്, ഇതുമായി ബന്ധപ്പെട്ട എല്ലാ പരസ്യങ്ങളും ലിസ്റ്റിംഗുകളും പ്ലാറ്റ്ഫോമുകളിൽ നിന്ന് ഉടനടി നീക്കം ചെയ്യാൻ കർശന നിർദേശം നൽകി. ഉമ്മം വിതരണം ചെയ്യുന്നതിനും വിൽക്കുന്നതിനും പ്രദർശിപ്പിക്കുന്നതിനും സമ്പൂർണ വിലക്കേർപ്പെടുത്തിയിട്ടുണ്ട്. പ്രമുഖ ഇ-കൊമേഴ്സ് പ്ലാറ്റ്ഫോമുകൾക്ക് പുറമെ, ഇവർക്ക് ഉൽപന്നം വിതരണം ചെയ്ത വെണ്ടർമാർക്കും വിതരണ കമ്പനികൾക്കുമെതിരെ നടപടി വ്യാപിപ്പിക്കുകയും അവരുടെ ലൈസൻസുകൾ റദ്ദാക്കാൻ ഉത്തരവിടുകയും ചെയ്തിട്ടുണ്ട്.

കമ്പനികളുടെ പ്രതികരണം

നോട്ടീസിന് ആമസോൺ ഇതുവരെ ഔദ്യോഗികമായി മറുപടി നൽകിയിട്ടില്ലെന്ന് അധികൃതർ അറിയിച്ചു. ആവശ്യമായ രേഖകൾ സമർപ്പിക്കാൻ കൂടുതൽ സമയം വേണമെന്നാണ് സ്വിഗ്ഗി ഇൻസ്റ്റാമാർട്ട് ആവശ്യപ്പെട്ടിരിക്കുന്നത്. അതേസമയം, തങ്ങളുടെ പ്ലാറ്റ്ഫോമിൽ നിന്ന് ഉൽപന്നത്തിന്റെ വിൽപന പൂർണമായി നിർത്തിവെച്ചതായി ബിഗ്ബാസ്കറ്റ് വ്യക്തമാക്കി. ഭാവിയിൽ ഇത്തരം ഉൽപന്നങ്ങൾ ലിസ്റ്റ് ചെയ്യുകയാണെങ്കിൽ ‘മനുഷ്യ ഉപഭോഗത്തിന് അനുയോജ്യമല്ല’ (Not For Human Consumption) എന്ന ലേബൽ വ്യക്തമായി പതിപ്പിക്കുമെന്നും കമ്പനി അറിയിച്ചു.

ശ്രാവണ മാസത്തിലെ പൂജകൾക്കായി ശിവക്ഷേത്രങ്ങളിൽ ഉമ്മപ്പൂവും കായ്കളും വഴിപാടായി സമർപ്പിക്കുന്ന ആചാരമുള്ളതിനാൽ ഈ സമയങ്ങളിൽ ഇതിന്റെ ആവശ്യകത വർധിക്കാറുണ്ട്. എന്നാൽ പൂജാ ആവശ്യങ്ങൾക്കുള്ള ഇത്തരം വസ്തുക്കൾ നിയന്ത്രണമില്ലാതെ ഭക്ഷ്യവസ്തുക്കളുടെ വിഭാഗത്തിൽ ഉൾപ്പെടുത്തി വിറ്റഴിക്കുന്നത് പൊതുജനാരോഗ്യത്തിന് വലിയ അപകടമുണ്ടാക്കുമെന്നാണ് ഭക്ഷ്യസുരക്ഷാ വകുപ്പിന്റെ മുന്നറിയിപ്പ്. ഉത്തരവുകൾ ലംഘിച്ചാൽ കൂടുതൽ കടുത്ത നിയമനടപടികൾ സ്വീകരിക്കുമെന്നും അധികൃതർ അറിയിച്ചു.

---------------

Hindusthan Samachar / Roshith K