Newdelhi, 26 ഓഗസ്റ്റ് (H.S.)

ന്യൂഡൽഹി: 'ഒരു രാജ്യം, ഒരു തിരഞ്ഞെടുപ്പ്' എന്ന നിർദ്ദേശത്തിനെതിരെ മുൻ കേന്ദ്രമന്ത്രിയും മുതിർന്ന കോൺഗ്രസ് നേതാവുമായ പി. ചിദംബരം ഉന്നയിച്ച വിമർശനങ്ങൾക്ക് ശക്തമായ മറുപടിയുമായി കേന്ദ്രമന്ത്രി ശിവ്രാജ് സിംഗ് ചൗഹാൻ രംഗത്ത്. സ്വതന്ത്ര ഇന്ത്യയിൽ ലോക്സഭയിലേക്കും നിയമസഭകളിലേക്കും മുൻപ് ഒരേസമയത്താണ് തിരഞ്ഞെടുപ്പുകൾ നടന്നിരുന്നതെന്നും, തെരഞ്ഞെടുക്കപ്പെട്ട പ്രതിപക്ഷ സർക്കാരുകളെ അട്ടിമറിച്ച് ആ സംവിധാനം തകർത്തത് മുൻ കോൺഗ്രസ് സർക്കാരുകളാണെന്നും ചൗഹാൻ ആരോപിച്ചു.

'ഒരു രാജ്യം, ഒരു തിരഞ്ഞെടുപ്പ്' ഭരണഘടനാ വിരുദ്ധമാണെന്നും കോൺഗ്രസിന്റെ മനസ്സാക്ഷി ഇത് അംഗീകരിക്കാൻ അനുവദിക്കില്ലെന്നുമുള്ള ചിദംബരത്തിന്റെ പ്രസ്താവനയെ ചൗഹാൻ രൂക്ഷമായി പരിഹസിച്ചു. 1952, 1957, 1962, 1967 വർഷങ്ങളിൽ രാജ്യത്ത് ഒരേസമയത്താണ് പൊതുതിരഞ്ഞെടുപ്പുകളും നിയമസഭാ തിരഞ്ഞെടുപ്പുകളും നടന്നിരുന്നത്. എന്നാൽ എഴുപതുകളിൽ കോൺഗ്രസ് ഭരണഘടനാ വിരുദ്ധമായ മാർഗ്ഗങ്ങളിലൂടെ സംസ്ഥാന സർക്കാരുകളെ താഴെയിറക്കിയതോടെയാണ് ഈ ക്രമം തെറ്റിയതെന്നും അദ്ദേഹം വ്യക്തമാക്കി.

ലോ കമ്മീഷനും മുൻ രാഷ്ട്രപതി രാംനാഥ് കോവിന്ദിന്റെ നേതൃത്വത്തിലുള്ള ഉന്നതതല സമിതിയും ഒരേസമയം തിരഞ്ഞെടുപ്പ് നടത്തുന്നതിനെ ശക്തമായി അനുകൂലിച്ചിട്ടുണ്ടെന്ന് കേന്ദ്രമന്ത്രി ചൂണ്ടിക്കാട്ടി. 1983-ലും 2018-ലും ലോ കമ്മീഷനും കേന്ദ്ര തിരഞ്ഞെടുപ്പ് കമ്മീഷനും ഈ നിർദ്ദേശം മുന്നോട്ടുവെച്ചിരുന്നു. നിയമ വിദഗ്ധരുമായും ബുദ്ധിജീവികളുമായും സമഗ്രമായ ചർച്ചകൾ നടത്തിയ ശേഷമാണ് രാംനാഥ് കോവിന്ദ് സമിതി റിപ്പോർട്ട് തയ്യാറാക്കിയത്. ഈ പശ്ചാത്തലത്തിൽ പദ്ധതി ഭരണഘടനാ വിരുദ്ധമാണെന്ന വാദം അടിസ്ഥാനരഹിതമാണെന്ന് അദ്ദേഹം വ്യക്തമാക്കി.

ഇടയ്ക്കിടെയുള്ള തിരഞ്ഞെടുപ്പുകൾ രാജ്യത്തിന്റെ വികസന പ്രവർത്തനങ്ങളെ സാരമായി ബാധിക്കുന്നുണ്ടെന്നും സാമ്പത്തിക ബാധ്യത വർദ്ധിപ്പിക്കുന്നുണ്ടെന്നും ചൗഹാൻ പറഞ്ഞു. പ്രധാനമന്ത്രിയും മുഖ്യമന്ത്രിമാരും ജനപ്രതിനിധികളും രാഷ്ട്രീയ പ്രവർത്തകരും തിരഞ്ഞെടുപ്പ് പ്രചാരണങ്ങളിൽ കൂടുതൽ സമയം ചെലവഴിക്കാൻ നിർബന്ധിതരാകുന്നു. കൂടാതെ അധ്യാപകരും പോലീസും മറ്റ് ഉദ്യോഗസ്ഥരും തങ്ങളുടെ പ്രധാന ചുമതലകൾ മാറ്റിവെച്ച് നിരന്തരം തിരഞ്ഞെടുപ്പ് ജോലികളിൽ വ്യാപൃതരാകേണ്ടി വരുന്നു. രാജ്യം പൊതുവായി ഒരുമിച്ചുള്ള തിരഞ്ഞെടുപ്പിനെ അനുകൂലിക്കുന്നുണ്ടെന്നും ദേശീയ താല്പര്യമാണ് ഇവിടെ പരമപ്രധാനമെന്നും അദ്ദേഹം കൂട്ടിച്ചേർത്തു.

നേരത്തെ, 2029-ൽ ഒരേസമയം തിരഞ്ഞെടുപ്പ് നടത്താൻ സാധിക്കില്ലെന്നും ഈ ബിൽ ഭരണഘടനയുടെ അടിസ്ഥാന ഘടനയെ ലംഘിക്കുന്നതാണെന്നും ആരോപിച്ച് ചിദംബരം ജോയിന്റ് പാർലമെന്ററി കമ്മിറ്റിക്ക് മുന്നിൽ മൊഴി നൽകിയിരുന്നു. ബിൽ പാസായാൽ പോലും പെട്ടെന്ന് നടപ്പിലാക്കാനാകില്ലെന്നും ഇതിനെതിരെ കോൺഗ്രസും പ്രതിപക്ഷ പാർട്ടികളും രാജ്യവ്യാപക പ്രക്ഷോഭം നടത്തുമെന്നും അദ്ദേഹം വ്യക്തമാക്കിയിരുന്നു. നിലവിൽ 'ഒരു രാജ്യം, ഒരു തിരഞ്ഞെടുപ്പ്' സംബന്ധിച്ച ഭരണഘടനാ ഭേദഗതി ബില്ലുകൾ സംയുക്ത പാർലമെന്ററി സമിതിയുടെ വിശദമായ പരിശോധനയിലാണ്.

---------------

Hindusthan Samachar / Roshith K