Kannur, 26 ഓഗസ്റ്റ് (H.S.)

കണ്ണൂർ: ദേശീയപാത വികസനത്തിന്റെ ഭാഗമായി എളയാവൂർ സൗത്തിൽ കൂറ്റൻ സംരക്ഷണഭിത്തി തകർന്നുണ്ടായ മണ്ണിടിച്ചിലിൽ ദേശീയപാത അതോറിറ്റിക്കെതിരെ (എൻ.എച്ച്.എ.ഐ) രൂക്ഷവിമർശനവുമായി നേതാക്കൾ രംഗത്ത്. നിർമ്മാണത്തിലെയും രൂപകൽപ്പനയിലെയും ഗുരുതരമായ പാളിച്ചകളാണ് അപകടത്തിന് കാരണമായതെന്നും മുൻപുണ്ടായ അനുഭവങ്ങളിൽ നിന്ന് അധികൃതർ പാഠം പഠിച്ചില്ലെന്നും പിണറായി വിജയൻ കുറ്റപ്പെടുത്തി. ജനങ്ങളുടെ സുരക്ഷ ഉറപ്പാക്കണമെന്നും ഭാവിയിൽ ഇത്തരം അപകടങ്ങൾ ആവർത്തിക്കാതിരിക്കാൻ അടിയന്തര നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു.

തിങ്കളാഴ്ച രാത്രിയോടെയാണ് എളയാവൂർ സൗത്തിൽ നിർമ്മാണം പുരോഗമിക്കുന്ന പാതയോരത്ത് മണ്ണ് അമർന്നുതുടങ്ങിയത്. ചൊവ്വാഴ്ച പുലർച്ചെ ആറുമണിയോടെ ഏകദേശം 75 മീറ്ററോളം നീളത്തിൽ 15 അടിയോളം താഴ്ചയിലേക്ക് കൂറ്റൻ സംരക്ഷണഭിത്തി പൂർണമായും തകർന്നു വീഴുകയായിരുന്നു. വൻ ശബ്ദത്തോടെ ഭിത്തി തകർന്നുവീണത് സമീപവാസികളിൽ വലിയ ഭീതി പരത്തി. ആളപായമൊന്നും റിപ്പോർട്ട് ചെയ്തിട്ടില്ലെങ്കിലും പ്രദേശം അതീവ അപകടാവസ്ഥയിലാണ്.

2023-ലും ഇതേ പ്രദേശത്ത് സമാനമായ രീതിയിൽ വലിയ തോതിൽ മണ്ണിടിച്ചിൽ ഉണ്ടായിരുന്നു. എന്നാൽ അന്ന് അപകടമുണ്ടായിട്ടും ദേശീയപാത അതോറിറ്റിയും കരാർ കമ്പനിയും ആവശ്യമായ മുൻകരുതലുകളോ ശാശ്വത പരിഹാരങ്ങളോ നടപ്പാക്കാൻ തയാറായില്ലെന്ന് അദ്ദേഹം ചൂണ്ടിക്കാട്ടി. ശാസ്ത്രീയമായ പഠനങ്ങളില്ലാതെയും പ്രദേശത്തിന്റെ ഭൂപ്രകൃതി കണക്കിലെടുക്കാതെയുമാണ് നിർമ്മാണ പ്രവർത്തനങ്ങൾ നടത്തുന്നതെന്ന പരാതി നേരത്തെ തന്നെ ശക്തമായിരുന്നു. നിലവിലെ തകർച്ച അതോറിറ്റിയുടെയും നിർമ്മാണ കമ്പനിയുടെയും കടുത്ത അനാസ്ഥയാണ് വ്യക്തമാക്കുന്നത്.

മഴ കനക്കുന്നതോടെ കൂടുതൽ ഭാഗങ്ങളിൽ ഇടിവുണ്ടാകുമോ എന്ന ആശങ്കയിലാണ് പ്രദേശവാസികൾ. നിർമ്മാണത്തിലെ അപാകതകൾ പരിശോധിച്ച് സമഗ്രമായ സുരക്ഷാ ഓഡിറ്റ് നടത്തണമെന്നും കുറ്റക്കാർക്കെതിരെ കർശന നടപടി വേണമെന്നും ആവശ്യമുയർന്നിട്ടുണ്ട്. തകർന്ന ഭാഗത്ത് ഗതാഗത നിയന്ത്രണം ഏർപ്പെടുത്തുകയും കൂടുതൽ അപകടങ്ങൾ ഒഴിവാക്കാൻ താത്കാലിക സുരക്ഷാ സംവിധാനങ്ങൾ ഒരുക്കുകയും ചെയ്തിട്ടുണ്ട്. വിദഗ്ധ സംഘമെത്തി സ്ഥലം സന്ദർശിച്ച ശേഷം മാത്രമേ പുനർനിർമ്മാണ പ്രവർത്തനങ്ങൾ സംബന്ധിച്ച് അന്തിമ തീരുമാനമെടുക്കൂ.

---------------

Hindusthan Samachar / Roshith K