Idukki , 29 ഓഗസ്റ്റ് (H.S.)

ഇടുക്കി: മൂവാറ്റുപുഴ കേന്ദ്രീകരിച്ച് പുതിയ ജില്ല രൂപീകരിക്കണമെന്ന ആവശ്യത്തിൽ ശക്തമായ വിയോജിപ്പുമായി കേരള കോൺഗ്രസ്. ഇടുക്കി ജില്ലയുടെ ആത്മാവും ഹൃദയവുമാണ് തൊടുപുഴയെന്നും അതിനെ ഇടുക്കിയിൽ നിന്ന് അടർത്തിമാറ്റിക്കൊണ്ടുള്ള ഒരു നീക്കവും അനുവദിക്കില്ലെന്നും മന്ത്രി മോൻസ് ജോസഫ് വ്യക്തമാക്കി. മൂവാറ്റുപുഴ ജില്ലാ രൂപീകരണ ചർച്ചകൾ വീണ്ടും സജീവമാകുന്നതിനിടെയാണ് യുഡിഎഫിനുള്ളിലെ പ്രമുഖ ഘടകകക്ഷിയായ കേരള കോൺഗ്രസ് തങ്ങളുടെ കർക്കശമായ നിലപാട് പരസ്യമാക്കിയത്.

പുതിയ ജില്ല രൂപീകരിക്കുന്നത് സംബന്ധിച്ച പാർട്ടിയുടെ എതിർപ്പ് നേരത്തെ തന്നെ മുന്നണിയെ ഔദ്യോഗികമായി അറിയിച്ചിട്ടുള്ളതാണെന്ന് മോൻസ് ജോസഫ് പറഞ്ഞു. ഭരണപരമോ പ്രാദേശികമോ ആയ ഇത്തരം സുപ്രധാന തീരുമാനങ്ങൾ ഏകപക്ഷീയമായി നടപ്പാക്കാനാകില്ലെന്നും വിഷയം യുഡിഎഫ് യോഗത്തിൽ വിശദമായി ചർച്ച ചെയ്യേണ്ടതുണ്ടെന്നും അദ്ദേഹം ആവശ്യപ്പെട്ടു. മുന്നണിയിലെ ഘടകകക്ഷികളുമായി കൂടിയാലോചിക്കാതെ ഇത്തരം കാര്യങ്ങളിൽ അന്തിമ തീരുമാനത്തിലേക്ക് പോകുന്നത് മുന്നണി മര്യാദയ്ക്ക് നിരക്കുന്നതല്ലെന്ന സൂചനയും അദ്ദേഹം നൽകി.

വിഷയത്തിന് വർഷങ്ങളുടെ പഴക്കമുണ്ടെന്ന് ചൂണ്ടിക്കാട്ടിയ മോൻസ് ജോസഫ് മുൻകാല സംഭവങ്ങളും ഓർമ്മിപ്പിച്ചു. മുൻപ് മൂവാറ്റുപുഴ എംഎൽഎയായിരുന്ന ജോസഫ് വാഴക്കൻ ഇതേ വിഷയം നിയമസഭയിൽ സബ്മിഷനായി ഉന്നയിച്ചിരുന്നതാണ്. എന്നാൽ അക്കാലത്തുതന്നെ ഈ ആവശ്യം തത്വത്തിൽ അംഗീകരിക്കാൻ കഴിയില്ലെന്ന വ്യക്തമായ മറുപടിയാണ് സർക്കാർ നിയമസഭയിൽ നൽകിയിരുന്നത്. എന്നിട്ടും വിഷയം വീണ്ടും ഉയർത്തിക്കൊണ്ടുവരുന്നത് അനാവശ്യമായ ആശയക്കുഴപ്പങ്ങൾക്ക് മാത്രമേ വഴിവെക്കൂ എന്ന് അദ്ദേഹം കൂട്ടിച്ചേർത്തു.

തൊടുപുഴ ഉൾപ്പെടുന്ന പ്രധാന മേഖലകളെ ഇടുക്കി ജില്ലയിൽ നിന്ന് വേർപെടുത്തി പുതിയ ജില്ല രൂപീകരിക്കാനുള്ള നീക്കം ഇടുക്കിയുടെ വികസനത്തെയും നിലനിൽപ്പിനെയും സാരമായി ബാധിക്കുമെന്നാണ് കേരള കോൺഗ്രസിന്റെ പ്രാദേശിക നേതൃത്വത്തിന്റെ പൊതുവികാരം. മലയോര മേഖലയുടെ വികസനത്തിനും ഭൂമിശാസ്ത്രപരമായ സന്തുലിതാവസ്ഥയ്ക്കും തൊടുപുഴ ഇടുക്കിയുടെ ഭാഗമായി നിലനിൽക്കേണ്ടത് അനിവാര്യമാണെന്നാണ് പാർട്ടിയുടെ വാദം. വരും ദിവസങ്ങളിൽ യുഡിഎഫ് വേദിയിൽ ഈ വിഷയം സജീവ ചർച്ചയാകുമെന്നും മുന്നണിക്കുള്ളിൽ പുതിയ രാഷ്ട്രീയ സംവാദങ്ങൾക്ക് ഇത് തിരികൊളുത്തുമെന്നുമാണ് രാഷ്ട്രീയ കേന്ദ്രങ്ങൾ വിലയിരുത്തുന്നത്.

ഡിലിമിറ്റേഷൻ കമ്മിഷൻ പ്രഖ്യാപനം: മൂവാറ്റുപുഴയിൽ നടന്ന ഓണാഘോഷ പരിപാടികൾക്കിടെയാണ് പ്രതിപക്ഷ നേതാവ് വി.ഡി. സതീശൻ, 40 വർഷത്തെ പഴക്കമുള്ള ഈ ആവശ്യത്തെക്കുറിച്ച് ഗൗരവമായി പരിശോധിക്കുമെന്ന് അറിയിച്ചത്. ഇതേ തുടർന്ന് ഭരണപരമായ പുനഃസംഘടനകൾ വിലയിരുത്തുന്നതിനും ഈ മേഖലയിലെ ജനസംഖ്യാ-വിഭവ ആവശ്യങ്ങൾ പരിഹരിക്കുന്നതിനുമായി ഒരു ഡിലിമിറ്റേഷൻ കമ്മിഷൻ രൂപീകരിക്കാൻ സംസ്ഥാനം പദ്ധതിയിടുന്നു എന്ന തരത്തിൽ വാർത്തകൾ പുറത്തു വന്നിരുന്നു.

രാഷ്ട്രീയ സമവായത്തിനായുള്ള നീക്കം: പുതിയ ജില്ല രൂപീകരിക്കുന്ന വിഷയം യു.ഡി.എഫിൽ (UDF) ചർച്ച ചെയ്ത് ഔദ്യോഗിക രാഷ്ട്രീയ സമവായമുണ്ടാക്കാൻ മൂവാറ്റുപുഴ എം.എൽ.എ മാത്യു കുഴൽനാടൻ നിർദ്ദേശിച്ചു. ഇതിനെ തുടർന്നാണ് മൂവാറ്റുപുഴ ജില്ലാ ഇടുക്കിയുടെ അവിഭാജ്യ ഘടകമാണെന്ന് വ്യക്തമാക്കി മോൻസ് ജോസഫ് രംഗത്ത് വന്നിരിക്കുന്നത്.

---------------

Hindusthan Samachar / Roshith K