Katmandhu, 29 ഓഗസ്റ്റ് (H.S.)

കാഠ്മണ്ഡു: നേപ്പാളിൽ വൻ നാശനഷ്ടം വിതച്ച മിന്നൽ പ്രളയത്തിലും മണ്ണിടിച്ചിലിലും ദുരിതമനുഭവിക്കുന്ന ജനങ്ങൾക്ക് താങ്ങായി നിന്ന ഇന്ത്യയുടെ സമയോചിതമായ ഇടപെടലിനെ പ്രശംസിച്ച് നേപ്പാൾ സർക്കാർ. പ്രതിസന്ധി ഘട്ടത്തിൽ പ്രധാനമന്ത്രി നരേന്ദ്ര മോദിയും ഇന്ത്യൻ സർക്കാരും കാണിച്ച അസാധാരണമായ ഔദാര്യവും പിന്തുണയും ഏറെ വിലപ്പെട്ടതാണെന്ന് നേപ്പാൾ ധനമന്ത്രി സ്വർണിം വാഗ്ലെ വ്യക്തമാക്കി. ദുരന്തബാധിത പ്രദേശങ്ങളിൽ രക്ഷാപ്രവർത്തനം പുരോഗമിക്കുന്നതിനിടെയാണ് ഇന്ത്യ നൽകുന്ന അടിയന്തര സഹായങ്ങളെ അഭിനന്ദിച്ച് നേപ്പാൾ രംഗത്തെത്തിയത്.

നേപ്പാൾ-തിബത്ത് അതിർത്തിയിലുണ്ടായ ഹിമാനിയുടെ തകർച്ചയെ തുടർന്നുണ്ടായ മണ്ണൊഴുക്കും മലവെള്ളപ്പാച്ചിലുമാണ് മധ്യ നേപ്പാളിൽ വൻ ദുരന്തം വിതച്ചത്. ദുരന്തത്തിൽ ഇതുവരെ 600-ലധികം ആളുകൾക്ക് ജീവൻ നഷ്ടപ്പെടുകയും 2,400-ലധികം ആളുകളെ കാണാതാവുകയും ചെയ്തു. നിരവധി ഗ്രാമങ്ങളും റോഡുകളും പാലങ്ങളും ഒലിച്ചുപോയതിനൊപ്പം പ്രധാന ജലവൈദ്യുത പദ്ധതികൾക്കും സാരമായ കേടുപാടുകൾ സംഭവിച്ചു. ദുരന്തമുഖത്ത് അടിയന്തര രക്ഷാപ്രവർത്തനത്തിനായി 57.6 ടൺ അവശ്യ ദുരിതാശ്വാസ സാമഗ്രികളാണ് ഇന്ത്യ ഇതിനകം നേപ്പാളിലേക്ക് എത്തിച്ചത്. കൂടാതെ, നേപ്പാളിന്റെ അഭ്യർത്ഥന മാനിച്ച് ആരോഗ്യ വിദഗ്ധരും ടണൽ രക്ഷാപ്രവർത്തന വിദഗ്ധരും അടങ്ങുന്ന 11 അംഗ ഇന്ത്യൻ സംഘം നേപ്പാളിലെത്തി ദുരന്തനിവാരണ പ്രവർത്തനങ്ങളിൽ പങ്കുചേരുന്നുണ്ട്.

ഘട്ടംഘട്ടമായാണ് രാജ്യം ഈ പ്രതിസന്ധിയെ നേരിടുന്നതെന്ന് വ്യക്തമാക്കിയ ധനമന്ത്രി, കുടുങ്ങിക്കിടക്കുന്ന ആളുകളെ കണ്ടെത്താനും രക്ഷിക്കാനുമാണ് നിലവിൽ പ്രഥമ പരിഗണന നൽകുന്നതെന്നും അറിയിച്ചു. 5,000 സൈനികർ ഉൾപ്പെടെ 11,000-ലധികം സുരക്ഷാ ഉദ്യോഗസ്ഥരെയാണ് തെരച്ചിലിനായി വിന്യസിച്ചിട്ടുള്ളത്. റോഡ് ഗതാഗതം തടസ്സപ്പെട്ട ദുരന്തമേഖലകളിലേക്ക് ഹെലികോപ്റ്ററുകൾ വഴിയാണ് അവശ്യസാധനങ്ങൾ എത്തിക്കുന്നത്. രക്ഷാപ്രവർത്തനത്തിന് ശേഷം താൽക്കാലിക പുനരധിവാസം ഉറപ്പാക്കുമെന്നും തുടർന്ന് വൻതോതിലുള്ള പുനർനിർമ്മാണ പ്രവർത്തനങ്ങളിലേക്ക് കടക്കുമെന്നും അദ്ദേഹം കൂട്ടിച്ചേർത്തു.

നേപ്പാളിന്റെ പുനർനിർമ്മാണ പ്രവർത്തനങ്ങളിലും ഉദാരമായ സഹായം നൽകുമെന്ന് ഇന്ത്യ ഉറപ്പുനൽകിയിട്ടുണ്ടെന്ന് സ്വർണിം വാഗ്ലെ പറഞ്ഞു. 2015-ലെ ഭൂകമ്പ സമയത്തും ഇന്ത്യ വലിയ തോതിലുള്ള പിന്തുണ നൽകിയിരുന്നുവെന്ന് അദ്ദേഹം അനുസ്മരിച്ചു. പ്രതിസന്ധി ഘട്ടങ്ങളിലെല്ലാം അയൽപക്ക ബന്ധത്തിന്റെ ഊഷ്മളത കാത്തുസൂക്ഷിച്ചുകൊണ്ട് ഇന്ത്യ നൽകുന്ന പിന്തുണ ഇരുരാജ്യങ്ങളും തമ്മിലുള്ള ആഴത്തിലുള്ള സൗഹൃദത്തെയാണ് അടിവരയിടുന്നത്. നേപ്പാളിലെ ജനജീവിതം സാധാരണ നിലയിലേക്ക് എത്തിക്കുന്നതിന് അന്താരാഷ്ട്ര സമൂഹത്തിന്റെ പിന്തുണയും സഹകരണവും ആവശ്യമാണെന്ന് അദ്ദേഹം വ്യക്തമാക്കി.

---------------

Hindusthan Samachar / Roshith K