Newdelhi, 30 ഓഗസ്റ്റ് (H.S.)

ന്യൂഡൽഹി: സാങ്കേതികവിദ്യയുടെ വളർച്ചയ്ക്കൊപ്പം ശക്തിപ്രാപിക്കുന്ന ‘ഡിജിറ്റൽ അറസ്റ്റ്’ പോലുള്ള പുതിയ തട്ടിപ്പുകൾ തടയാൻ പാർലമെന്റിന്റെ നിയമനിർമ്മാണത്തിനായി കാത്തുനിൽക്കാതെ ഇന്ത്യൻ നീതിന്യായ വ്യവസ്ഥ സജീവമായി ഇടപെടുകയാണെന്ന് സുപ്രീം കോടതി ചീഫ് ജസ്റ്റിസ് സൂര്യകാന്ത് വ്യക്തമാക്കി. ലണ്ടനിൽ നടന്ന സാമ്പത്തിക കുറ്റകൃത്യങ്ങളെക്കുറിച്ചുള്ള 43-ാമത് അന്താരാഷ്ട്ര സിമ്പോസിയത്തിന്റെ (International Symposium on Economic Crime) സമാപന സമ്മേളനത്തിൽ സംസാരിക്കുകയായിരുന്നു അദ്ദേഹം.

വർധിച്ചുവരുന്ന സൈബർ സാമ്പത്തിക തട്ടിപ്പുകളിൽ സുപ്രീം കോടതി സ്വമേധയാ (suo motu) കേസെടുത്തിട്ടുണ്ടെന്ന് ചീഫ് ജസ്റ്റിസ് ചൂണ്ടിക്കാട്ടി. പൊലീസ് ഉദ്യോഗസ്ഥരോ ജഡ്ജിമാരോ ഉന്നത ഉദ്യോഗസ്ഥരോ ആണെന്ന് നടിച്ച് വീഡിയോ കോളുകൾ വഴി സാധാരണക്കാരെ ഭീഷണിപ്പെടുത്തി പണം തട്ടുന്നതാണ് 'ഡിജിറ്റൽ അറസ്റ്റ്' രീതി. ഈ പ്രശ്നത്തിന്റെ വ്യാപ്തി പരിശോധിക്കാൻ കേന്ദ്ര-സംസ്ഥാന സർക്കാരുകളോട് പരമോന്നത കോടതി നിർദ്ദേശിച്ചിട്ടുണ്ട്. കൂടാതെ, വരുത്തിവെക്കുന്ന നഷ്ടത്തിന് ആനുപാതികമായ ശിക്ഷ ഉറപ്പാക്കുന്ന പ്രത്യേക വകുപ്പുകൾ ഇത്തരം കുറ്റകൃത്യങ്ങൾക്കായി രൂപീകരിക്കണമെന്നും കോടതി ആവശ്യപ്പെട്ടിട്ടുണ്ട്.

സാമ്പത്തിക കുറ്റകൃത്യങ്ങളും നിയമവ്യവസ്ഥയും

സാമ്പത്തിക കുറ്റകൃത്യങ്ങൾക്കെതിരെയുള്ള ഇന്ത്യയുടെ പ്രതിരോധം ഏതെങ്കിലും ഒരു പ്രത്യേക നിയമത്തിൽ ഒതുങ്ങുന്നതല്ലെന്നും, കഴിഞ്ഞ ദശാബ്ദങ്ങളിലൂടെ വികസിച്ചുവന്ന നിയമസംവിധാനമാണിതെന്നും അദ്ദേഹം പറഞ്ഞു. കള്ളപ്പണം വെളുപ്പിക്കൽ തടയൽ നിയമം (PMLA), പിടികിട്ടാപ്പുള്ളികളായ സാമ്പത്തിക കുറ്റവാളികളുടെ നിയമം (Fugitive Economic Offenders Act) തുടങ്ങിയവ ഇതിന്റെ ഭാഗമാണ്. അതേസമയം, ഇത്തരം നിയമങ്ങൾ ദുരുപയോഗം ചെയ്യപ്പെടുന്നതായി പരാതികൾ ഉയരുമ്പോൾ പൗരന്മാരുടെ മൗലികാവകാശങ്ങൾ സംരക്ഷിക്കാൻ കോടതി ഇടപെട്ടിട്ടുണ്ടെന്നും അദ്ദേഹം വ്യക്തമാക്കി.

വ്യക്തികളെ അറസ്റ്റ് ചെയ്യുമ്പോൾ അതിന്റെ കാരണങ്ങൾ രേഖാമൂലം വ്യക്തമാക്കണമെന്ന നിർണ്ണായക വിധിയും, വിചാരണ നീണ്ടുപോകുന്നത് ശിക്ഷയായി മാറരുതെന്ന നിലപാടും ചീഫ് ജസ്റ്റിസ് ഓർമ്മിപ്പിച്ചു. നിയമങ്ങളും സാങ്കേതികവിദ്യയും മാറുമ്പോഴും, 'കുറ്റം തെളിയുന്നതുവരെ നിരപരാധി' എന്ന തത്ത്വത്തിലും നടപടിക്രമങ്ങളുടെ സുതാര്യതയിലും സുപ്രീം കോടതി വിട്ടുവീഴ്ച ചെയ്തിട്ടില്ലെന്ന് അദ്ദേഹം അടിവരയിട്ടു.

കൗടില്യന്റെ അർത്ഥശാസ്ത്രവും ആഗോള കള്ളപ്പണവും

പ്രാചീന ഇന്ത്യൻ രാഷ്ട്രതന്ത്രജ്ഞനായ കൗടില്യന്റെ 'അർത്ഥശാസ്ത്ര'ത്തെ ഉദ്ധരിച്ചാണ് ചീഫ് ജസ്റ്റിസ് സാമ്പത്തിക തിരിമറികളെ വിശദീകരിച്ചത്. നാവിൻതുമ്പിൽ തേനോ വിഷമോ വെച്ച ഒരാൾക്ക് അതിന്റെ രുചി അറിയാതിരിക്കാൻ സാധിക്കാത്തതുപോലെ, പൊതുഖജനാവ് കൈകാര്യം ചെയ്യുന്ന ഉദ്യോഗസ്ഥർ പണത്തിൽ കൈവെക്കാതിരിക്കുക പ്രയാസമാണെന്ന കൗടില്യന്റെ നിരീക്ഷണം അദ്ദേഹം പരാമർശിച്ചു.

ആഗോളതലത്തിൽ നടക്കുന്ന കള്ളപ്പണം വെളുപ്പിക്കലിന്റെ ഭീകരതയും അദ്ദേഹം ചൂണ്ടിക്കാട്ടി. ഒരു വർഷം ലോകത്താകമാനം വെളുപ്പിക്കുന്ന കള്ളപ്പണത്തിന്റെ വ്യാപ്തി പരിശോധിച്ചാൽ, ഭൂമിയിലെ 800 കോടി ജനങ്ങൾക്കും ഓരോ ലാപ്ടോപ്പ് വാങ്ങി നൽകാൻ സാധിക്കുന്നത്ര തുകയുണ്ടാകും. എന്നാൽ അനധികൃതമായി സമ്പാദിക്കുന്ന സ്വത്തിന്റെ ഒരു ശതമാനം പോലും കണ്ടുകെട്ടാൻ നിലവിലെ സംവിധാനങ്ങൾക്ക് കഴിയുന്നില്ലെന്നും അദ്ദേഹം ആശങ്ക പ്രകടിപ്പിച്ചു. സാമ്പത്തിക കുറ്റകൃത്യങ്ങൾ അതിർത്തികൾ മാനിക്കാത്ത സാഹചര്യത്തിൽ അന്താരാഷ്ട്ര സഹകരണവും നിയമവാഴ്ചയും ശക്തിപ്പെടുത്തേണ്ടത് അനിവാര്യമാണെന്ന് അദ്ദേഹം ഓർമ്മിപ്പിച്ചു.

---------------

Hindusthan Samachar / Roshith K