Thiruvananthapuram, 30 ഓഗസ്റ്റ് (H.S.)

തിരുവനന്തപുരം: സംസ്ഥാന രാഷ്ട്രീയത്തിൽ ഭരണ-പ്രതിപക്ഷ ചേരികളിൽ പുതിയ ചർച്ചകൾക്ക് വഴിതുറന്ന് യുഡിഎഫ് കൺവീനർ അടൂർ പ്രകാശിന്റെ പ്രതികരണം. പ്രതിപക്ഷ ഉപനേതൃസ്ഥാനത്തെ ചൊല്ലി ഇടതുമുന്നണിയിലെ പ്രധാന ഘടകകക്ഷികളായ സിപിഐഎമ്മും സിപിഐയും തമ്മിലുള്ള തർക്കങ്ങൾ രൂക്ഷമായി തുടരുന്നതിനിടയിലാണ്, സിപിഐക്ക് അനുകൂലമായ നിലപാടുമായി പ്രതിപക്ഷ ഐക്യമുന്നണി രംഗത്തെത്തിയിരിക്കുന്നത്. എൽഡിഎഫിൽ നിരന്തരമായ അവഗണനയും അടിച്ചമർത്തലുമാണ് സിപിഐ നേരിടുന്നതെന്നും അവർക്ക് ആത്മാഭിമാനത്തോടെ മുന്നോട്ട് പോകാൻ യുഡിഎഫാണ് അനുയോജ്യമായ വേദിയെന്നും അടൂർ പ്രകാശ് തുറന്നടിച്ചു.

സിപിഐഎമ്മിന്റെ 'വല്യേട്ടൻ മനോഭാവം' മുന്നണിയിലെ ജനാധിപത്യപരമായ തുല്യതയെ പൂർണ്ണമായും ഇല്ലാതാക്കിയിരിക്കുകയാണെന്ന് അദ്ദേഹം ചൂണ്ടിക്കാട്ടി. ഇടതുമുന്നണിക്കുള്ളിൽ സിപിഐ വെറും ചവിട്ടും തൊഴിയും കൊള്ളുന്ന ഒരു പാർട്ടിയായി തരംതാഴ്ത്തപ്പെട്ടിരിക്കുകയാണ്. അർഹമായ സ്ഥാനങ്ങളും രാഷ്ട്രീയ പരിഗണനകളും നിഷേധിച്ച് സിപിഐയെ നിരന്തരം അപമാനിക്കുന്ന സമീപനമാണ് സിപിഐഎം നേതൃത്വം സ്വീകരിക്കുന്നത്. മുന്നണിയിലെ രണ്ടാമത്തെ വലിയ കക്ഷിയായിട്ടും അവരുടെ ന്യായമായ ആവശ്യങ്ങളെപ്പോലും മുഖവിലയ്ക്കെടുക്കാൻ സിപിഐഎം തയ്യാറാകുന്നില്ലെന്നത് ഗൗരവമുള്ള രാഷ്ട്രീയ വിഷയമാണ്.

യുഡിഎഫ് കൺവീനറായി ചുമതലയേറ്റ ആദ്യ ഘട്ടത്തിൽ തന്നെ സിപിഐയെ യുഡിഎഫിലേക്ക് സ്വാഗതം ചെയ്തിരുന്ന കാര്യം അടൂർ പ്രകാശ് ഓർമ്മിപ്പിച്ചു. എന്നാൽ അന്ന് മുന്നണി മാറ്റത്തിന് തയ്യാറാകാതെ അവർ എൽഡിഎഫിൽ തന്നെ തുടരാനാണ് തീരുമാനിച്ചത്. അതിൻ്റെ തിക്തഫലമാണ് ഇപ്പോൾ പാർട്ടി അനുഭവിക്കുന്നത്. നിരന്തരമായ ആക്ഷേപങ്ങളും രാഷ്ട്രീയമായ അവഗണനകളും സഹിച്ച് എത്രകാലം സിപിഐക്ക് ആ മുന്നണിയിൽ തുടരാൻ സാധിക്കുമെന്നത് കണ്ടറിയേണ്ട കാര്യമാണെന്നും അദ്ദേഹം പറഞ്ഞു.

പാർട്ടി പ്രവർത്തകരുടെ വികാരം മാനിക്കാതെ സിപിഐഎം നടത്തുന്ന ഏകാധിപത്യപരമായ നീക്കങ്ങൾ ഇടതുപക്ഷത്തിൻ്റെ അടിത്തറ ഇളക്കുന്നതാണെന്ന വിലയിരുത്തലിലാണ് യുഡിഎഫ് കേന്ദ്രങ്ങൾ. മുന്നണിയിലെ ആഭ്യന്തര ജനാധിപത്യം തകർന്ന അവസ്ഥയിൽ, രാഷ്ട്രീയ അസ്തിത്വം നിലനിർത്താൻ സിപിഐക്ക് മുന്നണി മാറ്റം അനിവാര്യമായി മാറുമെന്ന സൂചനയാണ് പുതിയ സംഭവവികാസങ്ങൾ നൽകുന്നത്.

നിയമസഭയിലെയും മുന്നണിയിലെയും അധികാര സമവാക്യങ്ങളിൽ സിപിഐയെ പൂർണ്ണമായും ഒതുക്കാനുള്ള സിപിഐഎം നീക്കങ്ങൾക്കെതിരെ രാഷ്ട്രീയമായ കടന്നാക്രമണം ശക്തമാക്കാനാണ് യുഡിഎഫിന്റെ തീരുമാനം. എൽഡിഎഫിലെ ആഭ്യന്തര വിള്ളലുകൾ രാഷ്ട്രീയമായി പ്രയോജനപ്പെടുത്താനും, വരും ദിവസങ്ങളിൽ സിപിഐയെ സമ്മർദ്ദത്തിലാക്കി രാഷ്ട്രീയ പുനർവിചിന്തനത്തിന് പ്രേരിപ്പിക്കാനും ഈ നിലപാട് പ്രതിപക്ഷത്തിന് പുതിയ ഊർജ്ജം പകരും. വരും നാളുകളിൽ കേരള രാഷ്ട്രീയത്തിൽ വലിയ പുനഃക്രമീകരണങ്ങൾക്ക് ഇത് വഴിതുറക്കുമോ എന്നാണ് രാഷ്ട്രീയ നിരീക്ഷകർ ഉറ്റുനോക്കുന്നത്.

---------------

Hindusthan Samachar / Roshith K