Bengaluru , 30 ഓഗസ്റ്റ് (H.S.)

ബെംഗളൂരു: കര്ണാടക പബ്ലിക് സര്വീസ് കമ്മീഷന് (കെപിഎസ്സി) നടത്തിയ വെറ്ററിനറി ഓഫീസര് നിയമന പരീക്ഷയിലെ അഴിമതിയും ക്രമക്കേടുമായി ബന്ധപ്പെട്ട് മുതിര്ന്ന ഐഎഎസ് ഉദ്യോഗസ്ഥന് ജ്ഞാനേന്ദ്ര കുമാർ ഗാംഗ്വാറിനെ കര്ണാടക ക്രൈം ഇന്വെസ്റ്റിഗേഷന് ഡിപ്പാര്ട്ട്മെന്റ് (സിഐഡി) കസ്റ്റഡിയിലെടുത്തു. നിലവില് സംസ്ഥാന എംഎസ്എംഇ (സൂക്ഷ്മ, ചെറുകിട, ഇടത്തരം സംരംഭങ്ങൾ) ഡയറക്ടറായി സേവനമനുഷ്ഠിച്ചു വരികയായിരുന്ന ഗാംഗ്വാറിനെ മണിക്കൂറുകള് നീണ്ട ചോദ്യം ചെയ്യലിനൊടുവിലാണ് അന്വേഷണ സംഘം കസ്റ്റഡിയിലെടുത്തത്.

മൃഗസംരക്ഷണ വകുപ്പിലെ വെറ്ററിനറി ഓഫീസര് തസ്തികകളിലേക്ക് കെപിഎസ്സി നടത്തിയ പരീക്ഷയില് ഗുരുതരമായ തിരിമറികള് നടന്നു എന്ന ആരോപണം ഉയര്ന്ന സമയത്ത് കമ്മീഷന്റെ എക്സാമിനേഷൻ കൺട്രോളർ (പരീക്ഷാ കണ്ട്രോളര്) പദവി വഹിച്ചിരുന്നത് ജ്ഞാനേന്ദ്ര കുമാര് ഗാംഗ്വാറായിരുന്നു. നിയമന പരീക്ഷാ പ്രക്രിയയില് ഉന്നത ഉദ്യോഗസ്ഥരുടെ ഒത്താശയോടെ വ്യാപക ക്രമക്കേടുകള് നടന്നുവെന്ന വിവരത്തിന്റെ അടിസ്ഥാനത്തിലാണ് സിഐഡി ഇയാളെ കേന്ദ്രീകരിച്ച് വിശദമായ അന്വേഷണം നടത്തിയത്. ചോദ്യം ചെയ്യലുമായി ഉദ്യോഗസ്ഥന് സഹകരിക്കാത്ത സാഹചര്യത്തിലാണ് കസ്റ്റഡിയിലെടുത്തതെന്ന് സിഐഡി വൃത്തങ്ങള് വ്യക്തമാക്കി.

വെറ്ററിനറി ഓഫീസർ പരീക്ഷാ നടത്തിപ്പിൽ ചില കെപിഎസ്സി ഉദ്യോഗസ്ഥർ വഴിവിട്ട ഇടപെടലുകൾ നടത്തിയെന്ന് കാണിച്ച് മഞ്ജുനാഥ് എന്ന വ്യക്തി നല്കിയ പരാതിയിലാണ് കേസിന്റെ തുടക്കം. ആദ്യം വിധാൻ സൗധ പോലീസ് സ്റ്റേഷനിൽ രജിസ്റ്റർ ചെയ്ത കേസ്, വിഷയത്തിന്റെ ഗൗരവം കണക്കിലെടുത്ത് ജൂലൈ 28-നാണ് സിഐഡിക്ക് കൈമാറിയത്. കേസ് ഏറ്റെടുത്തതിന് പിന്നാലെ പരീക്ഷാ നടത്തിപ്പുമായി ബന്ധപ്പെട്ട വിവിധ ഉദ്യോഗസ്ഥരെയും ഇടനിലക്കാരെയും സിഐഡി സംഘം വിശദമായി ചോദ്യം ചെയ്തുവരികയായിരുന്നു. ഇതിന്റെ തുടര്ച്ചയായാണ് മുന് പരീക്ഷാ കൺട്രോളറുടെ പങ്കിലേക്ക് അന്വേഷണം എത്തിയത്.

കഴിഞ്ഞ കുറച്ചു ദിവസങ്ങളായി മറ്റൊരു വിവാദവുമായി ബന്ധപ്പെട്ടും ജ്ഞാനേന്ദ്ര കുമാർ വാർത്തകളിൽ നിറഞ്ഞുനിന്നിരുന്നു. ഓഗസ്റ്റ് 20 മുതൽ രണ്ട് ദിവസത്തോളം ഇയാളെക്കുറിച്ച് യാതൊരു വിവരവുമില്ലാതിരിക്കുകയും തുടർന്ന് സ്വയം സർക്കാരുമായി ബന്ധപ്പെടുകയുമായിരുന്നു. തൊട്ടുപിന്നാലെ ഓഗസ്റ്റ് 23-ന് എൻഫോഴ്സ്മെന്റ് ഡയറക്ടറേറ്റ് (ഇഡി) ഇയാളുടെ ബെംഗളൂരുവിലെ വസതിയിൽ പരിശോധന നടത്തുകയും ചെയ്തിരുന്നു. ഇതിന് പിന്നാലെയാണ് ഇപ്പോൾ സംസ്ഥാന സിഐഡിയുടെ നിർണായക നടപടി ഉണ്ടായിരിക്കുന്നത്.

പരീക്ഷാ ചോദ്യപേപ്പർ ചോർച്ച, മാർക്ക് തിരുത്തൽ തുടങ്ങി വലിയ തോതിലുള്ള അഴിമതികളാണ് കെപിഎസ്സി പരീക്ഷയുമായി ബന്ധപ്പെട്ട് നിലവിൽ ഉയർന്നിട്ടുള്ളത്. ഉന്നത ഉദ്യോഗസ്ഥർ തന്നെ നിയമവിരുദ്ധ പ്രവർത്തനങ്ങൾക്ക് കൂട്ടുനിന്നെന്ന വിവരം സംസ്ഥാന ഭരണവൃത്തങ്ങളിലും വലിയ ചർച്ചയായിട്ടുണ്ട്. സംഭവത്തിൽ കൂടുതൽ ഉദ്യോഗസ്ഥർക്ക് പങ്കുണ്ടോയെന്നും സാമ്പത്തിക ഇടപാടുകൾ നടന്നിട്ടുണ്ടോയെന്നും സിഐഡി കൂടുതൽ വിശദമായി പരിശോധിച്ചുവരികയാണ്. വരും ദിവസങ്ങളിൽ കേസിൽ കൂടുതൽ അറസ്റ്റുകൾ ഉണ്ടാകുമെന്നാണ് അന്വേഷണ സംഘം നൽകുന്ന സൂചന.

---------------

Hindusthan Samachar / Roshith K