Bishkek, 31 ഓഗസ്റ്റ് (H.S.)

ബിഷ്കെക് (കിർഗിസ്ഥാൻ): കിർഗിസ്ഥാനിലെ ബിഷ്കെകിൽ നടക്കുന്ന ഇരുപത്തിയാറാമത് ഷാങ്ഹായ് കോ-ഓപ്പറേഷൻ ഓർഗനൈസേഷൻ (SCO) ഉച്ചകോടിയുടെ ഭാഗമായി പ്രധാനമന്ത്രി നരേന്ദ്ര മോദി ഇന്ന് റഷ്യൻ പ്രസിഡന്റ് വ്ലാദിമിർ പുടിനുമായി നിർണായക ഉഭയകക്ഷി ചർച്ച നടത്തും. ഉച്ചകോടിയുടെ വേദിയിൽ ചൈനീസ് പ്രസിഡന്റ് ഷി ജിൻപിങ്ങുമായും പ്രധാനമന്ത്രി കൂടിക്കാഴ്ച നടത്തിയേക്കുമെന്നാണ് റിപ്പോർട്ടുകൾ.

റഷ്യൻ പ്രസിഡന്റുമായുള്ള കൂടിക്കാഴ്ച ഔദ്യോഗികമായി സ്ഥിരീകരിച്ചിട്ടുണ്ടെങ്കിലും ചൈനീസ് പ്രസിഡന്റുമായുള്ള ചർച്ച സംബന്ധിച്ച് അന്തിമ സ്ഥിരീകരണം വന്നിട്ടില്ല. എങ്കിലും ഇരുനേതാക്കളും തമ്മിലുള്ള കൂടിക്കാഴ്ചയ്ക്ക് ശക്തമായ സാധ്യതയുണ്ടെന്നാണ് നയതന്ത്ര വൃത്തങ്ങൾ നൽകുന്ന സൂചന.

പ്രതിരോധം, ഊർജ്ജം, വ്യാപാരം: നിർണായക വിഷയങ്ങൾ ചർച്ചയിൽ

അമേരിക്കൻ രാഷ്ട്രീയത്തിലെ മാറ്റങ്ങളുടെയും ആഗോള സാമ്പത്തിക-സുരക്ഷാ അനിശ്ചിതത്വങ്ങളുടെയും പശ്ചാത്തലത്തിൽ മോദി-പുടിൻ കൂടിക്കാഴ്ച അതീവ പ്രാധാന്യത്തോടെയാണ് ലോകം ഉറ്റുനോക്കുന്നത്. പ്രതിരോധം, ഊർജ്ജം, സാങ്കേതികവിദ്യ, ഉഭയകക്ഷി വ്യാപാരം തുടങ്ങിയ തന്ത്രപ്രധാന മേഖലകളിലെ സഹകരണം കൂടുതൽ ശക്തമാക്കുന്നത് ഇരുനേതാക്കളും ചർച്ച ചെയ്യും. പശ്ചിമേഷ്യയിലെ സംഘർഷഭരിതമായ സാഹചര്യം, ഇറാൻ യുദ്ധം, റഷ്യ-യുക്രൈൻ പ്രതിസന്ധി എന്നിവയും യോഗത്തിൽ പ്രധാന ചർച്ചാവിഷയങ്ങളാകും.

അതേസമയം, ഷി ജിൻപിങ്ങുമായുള്ള ചർച്ച യാഥാർഥ്യമായാൽ യഥാർത്ഥ നിയന്ത്രണ രേഖയിലെ (LAC) അതിർത്തി തർക്കങ്ങൾ പരിഹരിക്കുന്നതിനും ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം മെച്ചപ്പെടുത്തുന്നതിനും അത് വഴിയൊരുക്കും. ഉച്ചകോടിക്ക് തൊട്ടുമുമ്പായി വിദേശകാര്യ മന്ത്രി ഡോ. എസ്. ജയ്ശങ്കർ റഷ്യയും ദേശീയ സുരക്ഷാ ഉപദേഷ്ടാവ് അജിത് ദോവൽ ചൈനയും സന്ദർശിച്ച് പ്രാഥമിക ചർച്ചകൾ നടത്തിയിരുന്നു.

ബിഷ്കെകിൽ ഊഷ്മള സ്വീകരണം

രണ്ടുദിവസത്തെ ഉസ്ബെക്കിസ്ഥാൻ സന്ദർശനം പൂർത്തിയാക്കിയാണ് പ്രധാനമന്ത്രി നരേന്ദ്ര മോദി ഞായറാഴ്ച കിർഗിസ്ഥാനിൽ എത്തിയത്. ഉസ്ബെക്കിസ്ഥാനുമായുള്ള നയതന്ത്രബന്ധം സമഗ്ര തന്ത്രപ്രധാന പങ്കാളിത്തത്തിലേക്ക് ഉയർത്താനും 2030-ഓടെ ഉഭയകക്ഷി വ്യാപാരം 500 കോടി ഡോളറിലെത്തിക്കാനും ഇരുരാജ്യങ്ങളും തമ്മിൽ ധാരണയായിരുന്നു.

ബിഷ്കെക് വിമാനത്താവളത്തിലെത്തിയ പ്രധാനമന്ത്രിയെ കിർഗിസ്ഥാൻ കാബിനറ്റ് മന്ത്രിമാരുടെ ചെയർമാൻ കാസിമാലിയേവ് അദിൽബെക് അലേഷോവിച്ചിന്റെ നേതൃത്വത്തിൽ സ്വീകരിച്ചു. പരമ്പരാഗത കിർഗിസ് നൃത്തത്തോടെയായിരുന്നു സ്വീകരണം. തുടർന്ന് താമസസ്ഥലത്തെത്തിയ പ്രധാനമന്ത്രിയെ ഇന്ത്യൻ സമൂഹം 'വന്ദേമാതരം' വിളികളോടെയാണ് വരവേറ്റത്. ബിഷ്കെകിലെത്തിയതിൽ സന്തോഷമുണ്ടെന്നും ഉച്ചകോടിയിൽ വിവിധ ലോകനേതാക്കളുമായി കൂടിക്കാഴ്ചകൾ നടത്തുമെന്നും പ്രധാനമന്ത്രി എക്സിൽ (ട്വിറ്റർ) കുറിച്ചു.

എസ്.സി.ഒയുടെ 25-ാം വാർഷികം

ഷാങ്ഹായ് കോ-ഓപ്പറേഷൻ ഓർഗനൈസേഷൻ രൂപീകരണത്തിന്റെ 25-ാം വാർഷിക വേളയിലാണ് ബിഷ്കെക് ഉച്ചകോടി നടക്കുന്നത്. 2001-ൽ റഷ്യ, ചൈന, കസാഖ്സ്ഥാൻ, കിർഗിസ്ഥാൻ, താജിക്കിസ്ഥാൻ, ഉസ്ബെക്കിസ്ഥാൻ എന്നീ രാജ്യങ്ങൾ ചേർന്ന് രൂപീകരിച്ച കൂട്ടായ്മയിൽ 2017-ൽ ഇന്ത്യയും പാകിസ്ഥാനും പൂർണ്ണ അംഗങ്ങളായി. തുടർന്ന് 2023-ൽ ഇറാനും 2024-ൽ ബെലാറസും അംഗത്വം നേടി. നിലവിൽ പത്ത് രാജ്യങ്ങളാണ് ഈ ആഗോള സംഘടനയിലുള്ളത്.

---------------

Hindusthan Samachar / Roshith K