Washington , 31 ഓഗസ്റ്റ് (H.S.)

വാഷിംഗ്ടൺ / ടെഹ്റാൻ: പശ്ചിമേഷ്യൻ മേഖലയെ വീണ്ടും യുദ്ധമുനമ്പിലാക്കി ഒരു മാസത്തെ ഇടവേളയ്ക്ക് ശേഷം ഇറാനു നേരെ യുഎസ് സൈന്യത്തിന്റെ ശക്തമായ വ്യോമാക്രമണം. ഹോർമുസ് കടലിടുക്കിലെ ലാരക് ദ്വീപിലുള്ള ഇറാന്റെ റോക്കറ്റ് വിക്ഷേപണ തറകൾ ലക്ഷ്യമിട്ടാണ് അമേരിക്ക ആക്രമണം നടത്തിയത്. ആക്രമണത്തിൽ ആളപായമുണ്ടായതായി വ്യക്തമാക്കിയ ടെഹ്റാൻ, മണിക്കൂറുകൾക്കകം ജോർദാനിലെയും യുഎഇയിലെയും യുഎസ് സൈനിക താവളങ്ങൾക്ക് നേരെ ബാലിസ്റ്റിക് മിസൈലുകളും ഡ്രോണുകളും തൊടുത്ത് തിരിച്ചടിച്ചു. ഇതോടെ ആറുമാസത്തോളമായി തുടരുന്ന യുഎസ്-ഇറാൻ സംഘർഷം പുതിയ തലത്തിലേക്ക് കടന്നിരിക്കുകയാണ്.

ലാരക് ദ്വീപിൽ ആക്രമണം; സമുദ്രപാതയിൽ ഖനികൾ സ്ഥാപിക്കാൻ നീക്കമെന്ന് യുഎസ്

ഹോർമുസ് കടലിടുക്കിലൂടെയുള്ള അന്താരാഷ്ട്ര കപ്പൽ ഗതാഗതം തടസ്സപ്പെടുത്തുന്നതിനായി സമുദ്ര ഖനികൾ (Sea Mines) ഘടിപ്പിച്ച റോക്കറ്റുകൾ വിക്ഷേപിക്കാൻ ഇറാൻ റവല്യൂഷണറി ഗാർഡ് കോർപ്സ് (ഐആർജിസി) തയ്യാറെടുക്കുന്നതായി വിവരം ലഭിച്ചതിനെ തുടർന്നാണ് ആക്രമണം നടത്തിയതെന്ന് യുഎസ് സെൻട്രൽ കമാൻഡ് (സെന്റ്കോം) വക്താവ് ക്യാപ്റ്റൻ ടിം ഹോക്കിൻസ് വ്യക്തമാക്കി. രണ്ട് റോക്കറ്റ് ലോഞ്ചറുകളാണ് അമേരിക്ക തകർത്തത്. അന്താരാഷ്ട്ര ഷിപ്പിംഗ് റൂട്ടുകളുടെ സുരക്ഷ ഉറപ്പാക്കാൻ ശക്തമായ നിരീക്ഷണം തുടരുമെന്നും യുഎസ് വ്യക്തമാക്കി. ജൂലൈ 29-ന് ശേഷമുള്ള ആദ്യത്തെ നേരിട്ടുള്ള യുഎസ് സൈനിക നീക്കമാണിത്.

ജോർദാനിലെയും യുഎഇയിലെയും യുഎസ് താവളങ്ങളിൽ ഇറാൻ മിസൈൽ വർഷം

യുഎസ് ആക്രമണത്തിന് പിന്നാലെ കനത്ത തിരിച്ചടിയുണ്ടാകുമെന്ന് ഐആർജിസി മുന്നറിയിപ്പ് നൽകി. തുടർന്ന് ജോർദാനിലെ കിംഗ് ഹുസൈൻ, അൽ-അസ്റാഖ് (മുവഫാഖ് സാൽതി) എന്നീ വ്യോമതാവളങ്ങളിലെ യുഎസ് സൈനിക കേന്ദ്രങ്ങൾ ലക്ഷ്യമിട്ട് ഇറാൻ ബാലിസ്റ്റിക് മിസൈലുകൾ വിക്ഷേപിച്ചു. യുഎസ് യുദ്ധവിമാനങ്ങളുടെ പാർപ്പിടങ്ങൾ, സാങ്കേതിക അടിസ്ഥാന സൗകര്യങ്ങൾ എന്നിവയ്ക്ക് കനത്ത നാശനഷ്ടം വരുത്തിയതായി ഇറാൻ മാധ്യമങ്ങൾ അവകാശപ്പെട്ടു. തങ്ങളുടെ വ്യോമാതിർത്തിയിലേക്ക് കടന്ന എട്ട് മിസൈലുകൾ തകർത്തതായി ജോർദാൻ സൈന്യവും വ്യക്തമാക്കി.

കൂടാതെ, യുഎഇയിലെ അൽ മിൻഹാദ് വ്യോമതാവളത്തിൽ നിലയുറപ്പിച്ചിരുന്ന യുഎസ് ഹെലികോപ്റ്ററുകളും സൈനികരും നിലയുറപ്പിച്ച കേന്ദ്രങ്ങൾ ലക്ഷ്യമിട്ട് ഡസൻ കണക്കിന് ഡ്രോൺ ആക്രമണം നടത്തിയതായും ഇറാന്റെ സൈനിക കേന്ദ്രങ്ങൾ അറിയിച്ചു. ട്രംപ് ഭരണകൂടം വരുത്തിയ ഗുരുതരമായ തന്ത്രപരമായ തെറ്റാണിതെന്നും ഇതിന് കനത്ത വില നൽകേണ്ടിവരുമെന്നും ഐആർജിസി വക്താവ് ഹുസൈൻ മൊഹെബി പ്രതികരിച്ചു.

ആഗോള എണ്ണവിപണിയിലും സമ്പദ്വ്യവസ്ഥയിലും ആശങ്ക

ലോകത്തെ അഞ്ചിലൊന്ന് ക്രൂഡോയിൽ കടന്നുപോകുന്ന ഏറ്റവും പ്രധാനപ്പെട്ട തന്ത്രപ്രധാന പാതയാണ് ഹോർമുസ് കടലിടുക്ക്. ഇറാൻ ഈ ജലപാത തടസ്സപ്പെടുത്തിയതോടെ ചരക്കുനീക്കവും എണ്ണക്കടത്തും ഇതിനകം തന്നെ ഗണ്യമായി കുറഞ്ഞിട്ടുണ്ട്. നയതന്ത്ര ചർച്ചകളിലൂടെയും സാമ്പത്തിക ഉപരോധങ്ങളിലൂടെയും ഇറാനെ സമ്മർദ്ദത്തിലാക്കാൻ യുഎസ് ശ്രമിക്കുന്നതിനിടെയാണ് വീണ്ടും ആയുധപ്പോര് ആരംഭിച്ചിരിക്കുന്നത്.

അപ്രതീക്ഷിതമായ ഈ തിരിച്ചടികൾ ആഗോള എണ്ണവിപണിയിൽ വൻ വിലക്കയറ്റത്തിനും അനിശ്ചിതത്വത്തിനും കാരണമായിട്ടുണ്ട്. ഒരു തുറന്ന യുദ്ധത്തിലേക്ക് മേഖല വീണ്ടും നീങ്ങുന്നത് ലോക സമ്പദ്വ്യവസ്ഥയെ സാരമായി ബാധിക്കുമെന്നാണ് അന്താരാഷ്ട്ര നിരീക്ഷകരുടെ വിലയിരുത്തൽ.

---------------

Hindusthan Samachar / Roshith K