Thiruvananthapuram , 31 ഓഗസ്റ്റ് (H.S.)

തിരുവനന്തപുരം: ഇസ്ലാമിക ആഘോഷവേദികളിലും പൊതുനിരത്തുകളിലും സ്ത്രീകളെ പ്രദർശിപ്പിക്കരുതെന്ന കാന്തപുരം എ.പി. അബൂബക്കർ മുസ്ലിയാറുടെ പ്രസ്താവനയ്ക്കെതിരെ രൂക്ഷവിമർശനവുമായി വനിതാ ശിശുവികസന വകുപ്പ് മന്ത്രി ബിന്ദു കൃഷ്ണ. ഭരണഘടന ഉറപ്പുനൽകുന്ന തുല്യതയും സ്വാതന്ത്ര്യവും ഉയർത്തിപ്പിടിക്കേണ്ട കാലഘട്ടത്തിൽ ഇത്തരം പിന്തിരിപ്പൻ പരാമർശങ്ങൾ കേരളത്തിനും രാജ്യത്തിനും ഒട്ടും അനുകരണീയമല്ലെന്ന് മന്ത്രി വ്യക്തമാക്കി. തിരുവനന്തപുരത്ത് മാധ്യമങ്ങളോട് സംസാരിക്കുകയായിരുന്നു അവർ.

മതവിശ്വാസം പിന്തുടരാൻ എല്ലാവർക്കും അവകാശമുണ്ടെങ്കിലും രാജ്യത്തിന്റെ പരമോന്നത നിയമമായ ഭരണഘടനയെ മാനിക്കാൻ എല്ലാവരും ബാധ്യസ്ഥരാണെന്ന് മന്ത്രി ഓർമ്മിപ്പിച്ചു. ഒരു ഇരുണ്ട കാലഘട്ടത്തെ അതിജീവിച്ച്, നിരന്തരമായ സാമൂഹിക പോരാട്ടങ്ങളിലൂടെയാണ് സ്ത്രീകൾ ഇന്നത്തെ മുഖ്യധാരയിലേക്കും നേതൃപദവികളിലേക്കും എത്തിയത്. രാജ്യത്തിന്റെ രാഷ്ട്രപതി സ്ഥാനം വരെ അലങ്കരിക്കുന്നത് വനിതയാണ്. അങ്ങനെയുള്ള ഒരു സമൂഹത്തിൽ സ്ത്രീകൾ വീടുകളിൽ അടങ്ങിയിരിക്കണമെന്നും പൊതുഇടങ്ങളിൽ ഇറങ്ങരുതെന്നും പറയുന്നത് ആധുനിക പൊതുസമൂഹത്തിന് ഒട്ടും ഉൾക്കൊള്ളാൻ കഴിയില്ലെന്നും മന്ത്രി പറഞ്ഞു.

കായിക രംഗത്തും ഭരണരംഗത്തും ശാസ്ത്ര സാങ്കേതിക മേഖലകളിലും സ്ത്രീകൾ തങ്ങളുടെ വ്യക്തിമുദ്ര പതിപ്പിച്ച് രാജ്യത്തിന്റെ അഭിമാനസ്തംഭങ്ങളായി മാറിക്കൊണ്ടിരിക്കുകയാണ്. ഇത്തരം മുന്നേറ്റങ്ങൾക്ക് കേരള സർക്കാരും പൊതുസമൂഹവും പൂർണ്ണ പിന്തുണയാണ് നൽകുന്നത്. കൂടുതൽ പെൺകുട്ടികൾ പൊതുരംഗത്തേക്ക് കടന്നുവരികയും സ്വതന്ത്രമായി ചിന്തിക്കുകയും പ്രവർത്തിക്കുകയും ചെയ്യേണ്ടതുണ്ട്. സ്ത്രീകളുടെ അന്തസ്സും തുല്യനീതിയും ഉറപ്പാക്കുന്നതിനാണ് സർക്കാർ മുൻഗണന നൽകുന്നതെന്നും അവർ കൂട്ടിച്ചേർത്തു.

ഇസ്ലാമിക ആഘോഷങ്ങളിലും അനുബന്ധ പരിപാടികളിലും സ്ത്രീകൾ പുരുഷന്മാർക്കിടയിൽ പൊതുവേദികളിലോ നിരത്തുകളിലോ പ്രത്യക്ഷപ്പെടുന്നത് മതപരമായ മാനദണ്ഡങ്ങൾക്ക് നിരക്കുന്നതല്ലെന്നായിരുന്നു സമസ്ത കാന്തപുരം വിഭാഗം പുറത്തിറക്കിയ നിർദ്ദേശം. തുടർന്ന് നടന്ന ഒരു പരിപാടിയിലും സ്ത്രീകൾ പൊതുരംഗത്തിറങ്ങുന്നത് ശരിയല്ലെന്നും വീടുകളിൽ ഒതുങ്ങിക്കഴിയേണ്ടവരാണെന്നും കാന്തപുരം ആവർത്തിച്ചിരുന്നു. ഇസ്ലാം മതം ആഴത്തിൽ പഠിച്ച വ്യക്തിയെന്ന നിലയിൽ ഇത്തരം കാര്യങ്ങളിൽ നിലപാട് വ്യക്തമാക്കാൻ തനിക്ക് അവകാശമുണ്ടെന്നും അദ്ദേഹം ന്യായീകരിച്ചിരുന്നു.

എന്നാൽ കാന്തപുരത്തിന്റെ നിലപാടുകൾക്കെതിരെ വലിയ രീതിയിലുള്ള പ്രതിഷേധമാണ് സാമൂഹിക-രാഷ്ട്രീയ-സാംസ്കാരിക രംഗങ്ങളിൽ നിന്ന് ഉയരുന്നത്. തുല്യതയും ലിംഗനീതിയും ചർച്ച ചെയ്യപ്പെടുന്ന പുരോഗമന സമൂഹത്തിൽ, സ്ത്രീകളെ വീണ്ടും നാലു ചുമരുകൾക്കുള്ളിലേക്ക് തളച്ചിടാനുള്ള ഇത്തരം നീക്കങ്ങൾ ആശങ്കാജനകമാണെന്നാണ് പൊതുവികാരം. സ്ത്രീശാക്തീകരണത്തിന് വിരുദ്ധമായ ഇത്തരം ആശയങ്ങൾക്കെതിരെ കർശന നിലപാട് തുടരുമെന്ന് സർക്കാർ വൃത്തങ്ങളും വ്യക്തമാക്കിയിട്ടുണ്ട്.

---------------

Hindusthan Samachar / Roshith K