Kozhikode, 31 ഓഗസ്റ്റ് (H.S.)

കോഴിക്കോട്: താമരശ്ശേരി ചുരത്തിലെ ആറാം വളവിൽ കെഎസ്ആർടിസി ബസ് കേടായി വഴിയിൽ കുടുങ്ങിയതിനെ തുടർന്ന് ചുരം പാതയിൽ അതീവ രൂക്ഷമായ ഗതാഗതക്കുരുക്ക്. രാവിലെ ഏഴേകാലോടെ ചുരം കയറുകയായിരുന്ന ബസ് യന്ത്രത്തകരാറിലായതോടെയാണ് ചുരത്തിലൂടെയുള്ള വാഹനഗതാഗതം പൂർണ്ണമായും താളംതെറ്റിയത്. ഇതോടെ ഇരുവശത്തുനിന്നുമുള്ള ദീർഘദൂര ബസുകളും ചരക്കുലോറികളും ഉൾപ്പെടെ നൂറുകണക്കിന് വലിയ വാഹനങ്ങൾ പാതയിൽ കുടുങ്ങിക്കിടക്കുകയാണ്.

നിലവിൽ ആറാം വളവിലൂടെ ചെറുവാഹനങ്ങൾക്ക് മാത്രമാണ് ഒരു വരിയായി കടന്നുപോകാൻ സാധിക്കുന്നത്. വലിയ വാഹനങ്ങൾക്ക് വളവ് തിരിയാൻ സാധിക്കാത്ത വിധം ബസ് റോഡിന് കുറുകെ കിടക്കുന്നതാണ് ഗതാഗതം പൂർണ്ണമായി സ്തംഭിക്കാൻ കാരണമായത്.

അടിവാരം വരെ നീണ്ട് വാഹനനിര; വലഞ്ഞ് യാത്രക്കാർ

ഓണാവധിക്കുശേഷമുള്ള ആദ്യ പ്രവൃത്തി ദിനമായതിനാൽ പുലർച്ചെ മുതൽ തന്നെ വയനാട്-കോഴിക്കോട് ദേശീയപാതയിൽ വൻ വാഹനത്തിരക്കാണ് അനുഭവപ്പെട്ടിരുന്നത്. ബസ് കേടായതിന് പിന്നാലെ മണിക്കൂറുകൾക്കുള്ളിൽ തന്നെ കുരുക്ക് അടിവാരം വരെ കിലോമീറ്ററുകളോളം നീണ്ടു.

രാവിലെ ഒമ്പത് മണിയോടെ നില അതീവ ഗുരുതരമായി മാറി. ഓഫീസുകളിലേക്കും വിദ്യാലയങ്ങളിലേക്കും ആശുപത്രികളിലേക്കും പോകാനിറങ്ങിയ ആളുകൾ മണിക്കൂറുകളോളം പാതയിൽ കുടുങ്ങി വലഞ്ഞു. ദീർഘനേരം കാത്തിരുന്നിട്ടും ഗതാഗതം പുനഃസ്ഥാപിക്കാൻ സാധിക്കാത്തതിനെ തുടർന്ന് കെഎസ്ആർടിസി ഉൾപ്പെടെയുള്ള ദീർഘദൂര ബസുകളിലെ നിരവധി യാത്രക്കാർ വാഹനങ്ങളിൽനിന്ന് ഇറങ്ങി കാൽനടയായി ചുരം കയറാൻ നിർബന്ധിതരായി.

രക്ഷാപ്രവർത്തനം പുരോഗമിക്കുന്നു

വിവരമറിഞ്ഞ് പോലീസും ചുരം സംരക്ഷണ സമിതി പ്രവർത്തകരും സ്ഥലത്തെത്തി ഗതാഗതം നിയന്ത്രിക്കാനും തകരാറിലായ ബസ് മാറ്റിസ്ഥാപിക്കാനുമുള്ള തീവ്രശ്രമത്തിലാണ്. ക്രെയിൻ അടക്കമുള്ള സന്നാഹങ്ങൾ എത്തിച്ച് ബസ് റോഡരികിലേക്ക് മാറ്റാനുള്ള നടപടികൾ പുരോഗമിക്കുന്നു.

ചുരത്തിൽ ഗതാഗതം ഭാഗികമായിപ്പോലും സാധാരണ നിലയിലാകാൻ ഇനിയും സമയമെടുക്കുമെന്നാണ് പ്രാഥമിക വിവരം. സ്ഥിതിഗതികൾ നിയന്ത്രണവിധേയമാകുന്നതുവരെ കോഴിക്കോട്-വയനാട് റൂട്ടിൽ യാത്ര ചെയ്യുന്നവർ കുറ്റ്യാടി ചുരം അടക്കമുള്ള ബദൽ പാതകൾ ഉപയോഗിക്കണമെന്ന് അധികൃതർ നിർദ്ദേശിച്ചിട്ടുണ്ട്. വീതികുറഞ്ഞ വളവുകളിൽ വലിയ വാഹനങ്ങൾ തകരാറിലാകുന്നത് താമരശ്ശേരി ചുരത്തിൽ പതിവ് ദുരിതമായി മാറുന്നുവെന്ന ആക്ഷേപം ഇതോടെ വീണ്ടും ശക്തമായിരിക്കുകയാണ്.

---------------

Hindusthan Samachar / Roshith K