Newdelhi, 04 ഓഗസ്റ്റ് (H.S.)

ന്യൂഡൽഹി: അടുത്തിടെ നടന്ന നിയമസഭാ ഉപതിരഞ്ഞെടുപ്പുകളിൽ ബിജെപിയുടെ ശക്തമായ കോട്ടകളായിരുന്ന രണ്ട് മണ്ഡലങ്ങളിൽ നേരിടേണ്ടി വന്ന അപ്രതീക്ഷിത തോൽവിക്ക് പിന്നാലെ പ്രതികരണവുമായി ബിജെപി ദേശീയ അധ്യക്ഷൻ നിതിൻ നവീൻ. ബിഹാർ കേന്ദ്രീകരിച്ച് പ്രവർത്തിക്കുന്ന ജൻ സൂരാജ് പാർട്ടി ബാങ്കിപ്പൂരിലും, കോൺഗ്രസ് മധ്യപ്രദേശിലെ ദതിയയിലും വിജയം നേടിയ പശ്ചാത്തലത്തിൽ, തോൽവിയെക്കുറിച്ച് പാർട്ടി തലത്തിൽ ഗൗരവമായ ആത്മപരിശോധന നടത്തുമെന്ന് അദ്ദേഹം വ്യക്തമാക്കി.

ജനവിധി പൂർണ്ണമായി അംഗീകരിക്കുന്നുവെന്ന് വ്യക്തമാക്കിയ നിതിൻ നവീൻ, ഗുജറാത്തിലെ മഞ്ജൽപൂർ മണ്ഡലത്തിൽ ബിജെപി നേടിയ ആശ്വാസ ജയത്തിന് വോട്ടർമാർക്കും പാർട്ടി പ്രവർത്തകർക്കും നന്ദി അറിയിക്കുകയും ചെയ്തു.

ജനവിധി ശിരസ്സാവഹിക്കുന്നു: നിതിൻ നവീൻ

ഉപതിരഞ്ഞെടുപ്പ് ഫലം പുറത്തുവന്നതിന് തൊട്ടുപിന്നാലെ എക്സ് (ട്വിറ്റർ) പ്ലാറ്റ്ഫോമിലൂടെയായിരുന്നു നിതിൻ നവീന്റെ ആദ്യ പ്രതികരണം. മൂന്ന് മണ്ഡലങ്ങളിലെയും ജനവിധി പൂർണ്ണ മനസ്സോടെ സ്വികരിക്കുന്നുവെന്ന് അദ്ദേഹം കുറിച്ചു.

ഗുജറാത്തിലെ മഞ്ജൽപൂർ നിയമസഭാ മണ്ഡലത്തിൽ ഭാരതീയ ജനതാ പാർട്ടിയിൽ വീണ്ടും വിശ്വാസം അർപ്പിച്ച ജനങ്ങളോട് ഞങ്ങൾ ഹൃദയംഗമമായ നന്ദി രേഖപ്പെടുത്തുന്നു. ഈ വിജയത്തിനായി അഹോരാത്രം പ്രയത്നിച്ച എല്ലാ ബിജെപി പ്രവർത്തകരെയും ഭാരവാഹികളെയും അനുമോദിക്കുന്നു.

എന്നാൽ, മറ്റ് രണ്ട് മണ്ഡലങ്ങളിലെ ഫലം പ്രതീക്ഷിച്ച രീതിയിലല്ല വന്നതെന്ന് അദ്ദേഹം സമ്മതിച്ചു.

ബാങ്കിപ്പൂരിലും ദതിയയിലും ഞങ്ങൾക്ക് പ്രതീക്ഷിച്ച ജനവിധി ലഭിച്ചില്ല. ഈ രണ്ട് പ്രദേശങ്ങളിലെയും തിരഞ്ഞെടുപ്പ് ഫലങ്ങളെക്കുറിച്ച് ഞങ്ങൾ തികഞ്ഞ ഗൗരവത്തോടെ വിശദമായ ആത്മപരിശോധന നടത്തും. പുതിയ ഊർജ്ജത്തോടും ദൃഢനിശ്ചയത്തോടും കൂടി ഞങ്ങൾ വീണ്ടും ജനങ്ങളിലേക്ക് ഇറങ്ങിച്ചെല്ലുകയും അവരുടെ വിശ്വാസം വീണ്ടെടുക്കാൻ അവിശ്രമം പ്രവർത്തിക്കുകയും ചെയ്യും.

ബാങ്കിപ്പൂരിൽ പ്രശാന്ത് കിഷോറിന്റെ ചരിത്ര വിജയം

ബിജെപിയെ സംബന്ധിച്ചിടത്തോളം ഏറ്റവും വലിയ ആഘാതമുണ്ടായത് ബിഹാറിലെ ബാങ്കിപ്പൂർ മണ്ഡലത്തിലാണ്. രാഷ്ട്രീയ തന്ത്രജ്ഞനിൽ നിന്ന് ജനകീയ നേതാവായി മാറിയ പ്രശാന്ത് കിഷോർ സ്ഥാപിച്ച ജൻ സൂരാജ് പാർട്ടി തിരഞ്ഞെടുപ്പ് അരങ്ങേറ്റത്തിൽ തന്നെ ബാങ്കിപ്പൂർ പിടിച്ചെടുത്തു. ബിജെപിയുടെ സ്ഥാനാർത്ഥിയായ നീരജ് കുമാറിനെ 19,323 വോട്ടുകളുടെ ഭൂരിപക്ഷത്തിലാണ് പ്രശാന്ത് കിഷോർ പരാജയപ്പെടുത്തിയത്. പ്രശാന്ത് കിഷോർ 64,151 വോട്ടുകൾ നേടിയപ്പോൾ നീരജ് കുമാറിന് 44,827 വോട്ടുകൾ മാത്രമേ നേടാനായുള്ളൂ.

നിലവിലെ ബിജെപി ദേശീയ അധ്യക്ഷൻ നിതിൻ നവീൻ തന്നെ തുടർച്ചയായി നാല് തവണ പ്രതിനിധീകരിച്ച മണ്ഡലമായിരുന്നു ബാങ്കിപ്പൂർ. 1995-ൽ മുൻപ് പട്ന വെസ്റ്റ് എന്നറിയപ്പെട്ടിരുന്ന കാലം മുതൽ ബിജെപിയുടെ ഉറച്ച കോട്ടയായിരുന്ന ബാങ്കിപ്പൂർ നഷ്ടപ്പെട്ടത് പാർട്ടി നേതൃത്വത്തെ ഞെട്ടിച്ചിട്ടുണ്ട്.

ദതിയയിലെയും മഞ്ജൽപൂരിലെയും ഫലങ്ങൾ

മധ്യപ്രദേശിലെ ദതിയ മണ്ഡലത്തിലെ തോൽവിയും ബിജെപിക്ക് കനത്ത തിരിച്ചടിയാണ്. മുൻ ആഭ്യന്തര മന്ത്രിയും ബിജെപി മുതിർന്ന നേതാവുമായ നരോത്തം മിശ്ര 2008 മുതൽ മൂന്ന് തവണ തുടർച്ചയായി വിജയിച്ച മണ്ഡലമായിരുന്നു ഇത്. 2023-ലെ നിയമസഭാ തിരഞ്ഞെടുപ്പിൽ കോൺഗ്രസിലെ രാജേന്ദ്ര കുമാർ ഭാരതിയോട് നരോത്തം മിശ്ര പരാജയപ്പെട്ടിരുന്നു. ഇത്തവണ ഉപതിരഞ്ഞെടുപ്പിലും മണ്ഡലം തിരിച്ചുപിടിക്കാൻ ബിജെപിക്ക് സാധിച്ചില്ല.

ഗുജറാത്തിലെ മഞ്ജൽപൂർ മണ്ഡലത്തിൽ ലഭിച്ച വിജയം മാത്രമാണ് ബിജെപിക്ക് ഉപതിരഞ്ഞെടുപ്പിൽ ആശ്വസിക്കാൻ വകനൽകുന്നത്.

പാർട്ടിയുടെ ഭൂരിപക്ഷം ഉറപ്പിച്ചിരുന്ന പരമ്പരാഗത മണ്ഡലങ്ങളിൽ പ്രാദേശിക ഘടകങ്ങളിലുണ്ടായ വീഴ്ചകളും വോട്ടർമാരുടെ അതൃപ്തിയുമാണോ തോൽവിക്ക് കാരണമെന്ന കാര്യത്തിൽ വരും ദിവസങ്ങളിൽ ബിജെപി ഉന്നതതല യോഗങ്ങളിൽ വിശദമായ ചർച്ചകൾ നടക്കും.

---------------

Hindusthan Samachar / Roshith K