Tiruvalla , 04 ഓഗസ്റ്റ് (H.S.)

തിരുവല്ല: കനത്ത മഴയെത്തുടർന്ന് തിരുവല്ലയിലും സമീപത്തുള്ള അപ്പർ കുട്ടനാട് മേഖലകളിലും പ്രളയസമാനമായ വെള്ളക്കെട്ട് തുടരുന്നു. താഴ്ന്ന പ്രദേശങ്ങളിലെയും തിരുവല്ല ടൗണിനോട് ചേർന്നുള്ള ജനവാസ മേഖലകളിലെയും വീടുകളിലേക്ക് കയറിയ വെള്ളം ഇപ്പോഴും ഇറങ്ങിത്തുടങ്ങിയിട്ടില്ല. മഴയ്ക്ക് നേരിയ ശമനമുണ്ടെങ്കിലും നദികളിൽ നിന്നുള്ള വെള്ളത്തിന്റെ വരവ് ശക്തമായി തുടരുന്നതാണ് പ്രളയസ്ഥിതി സങ്കീർണ്ണമാക്കുന്നത്.

ദുരിതാശ്വാസ ക്യാമ്പുകൾ സജീവം

വെള്ളപ്പൊക്കം രൂക്ഷമായതോടെ തിരുവല്ല താലൂക്കിൽ മാത്രം ആറായിരത്തിലധികം ആളുകളെയാണ് വിവിധ ദുരിതാശ്വാസ ക്യാമ്പുകളിലേക്ക് മാറ്റിപ്പാർപ്പിച്ചിരിക്കുന്നത്. വീടുകളിൽ വെള്ളം കയറി വാസയോഗ്യമല്ലാതായതോടെ ഭൂരിഭാഗം കുടുംബങ്ങളും സർക്കാരിന്റെയും തദ്ദേശ സ്വയംഭരണ സ്ഥാപനങ്ങളുടെയും നേതൃത്വത്തിൽ തുറന്ന ക്യാമ്പുകളിൽ അഭയം തേടുകയായിരുന്നു. ക്യാമ്പുകളിൽ ആവശ്യമായ ഭക്ഷണവും കുടിവെള്ളവും മരുന്നും ഉറപ്പാക്കാൻ റവന്യൂ വകുപ്പും സന്നദ്ധ പ്രവർത്തകരും രംഗത്തുണ്ട്. മുതിർന്ന പൗരന്മാർക്കും കുട്ടികൾക്കും പ്രത്യേക പരിചരണ സൗകര്യങ്ങളും ഇവിടെ ഒരുക്കിയിട്ടുണ്ട്.

വ്യാപക വെള്ളക്കെട്ട്

അപ്പർ കുട്ടനാടൻ മേഖലകളായ കടപ്ര, എടത്വ, വീയപുരം പ്രദേശങ്ങളിൽ ഭൂരിഭാഗം വാർഡുകളും പൂർണ്ണമായും വെള്ളത്തിനടിയിലാണ്. ഇതിനുപുറമേ ചെങ്ങന്നൂർ താലൂക്കിന്റെ പരിധിയിൽ വരുന്ന പാണ്ടനാട്, തിരുവൻവണ്ടൂർ മേഖലകളിലും സ്ഥിതി അതീവ ഗുരുതരമായി തുടരുന്നു. മേഖലയിലെ പ്രധാന ഗ്രാമീണ റോഡുകളും ഇടവഴികളും വെള്ളത്തിനടിയിലായതോടെ പല കുടുംബങ്ങളും ഒറ്റപ്പെട്ട അവസ്ഥയിലാണ്. ബോട്ടുകളും വള്ളങ്ങളും ഉപയോഗിച്ചാണ് അത്യാവശ്യക്കാർ പുറത്തേക്ക് എത്തുന്നത്.

എം ജി റോഡിൽ രൂക്ഷമായ ഗതാഗതക്കുരുക്ക്

പ്രധാന പാതയായ എം സി റോഡിൽ തിരുവല്ല തിരുമൂലപുരം ഭാഗത്ത് വെള്ളക്കെട്ട് രൂപപ്പെട്ടതിനെ തുടർന്ന് മണിക്കൂറുകളോളം നീളുന്ന രൂക്ഷമായ ഗതാഗതക്കുരുക്കാണ് അനുഭവപ്പെടുന്നത്. റോഡിൽ വലിയ രീതിയിൽ വെള്ളം കയറിയതോടെ ചെറിയ വാഹനങ്ങളുടെ സഞ്ചാരം പൂർണ്ണമായും തടസ്സപ്പെട്ടു. കെഎസ്ആർടിസി ബസുകളും വലിയ ചരക്ക് വാഹനങ്ങളും മാത്രമാണ് വളരെ സാവധാനത്തിൽ കടന്നുപോകുന്നത്. തിരക്ക് നിയന്ത്രിക്കാനും ഗതാഗതം സുഗമമാക്കാനും പോലീസും മോട്ടോർ വാഹന വകുപ്പ് ഉദ്യോഗസ്ഥരും സ്ഥലത്ത് ക്യാമ്പ് ചെയ്യുന്നുണ്ട്.

താഴ്ന്ന പ്രദേശങ്ങളിൽ നിന്ന് മാറിനിൽക്കാൻ ജനങ്ങൾക്ക് ഭരണകൂടം കർശന മുന്നറിയിപ്പ് നൽകിയിട്ടുണ്ട്. അടിയന്തര സാഹചര്യങ്ങൾ നേരിടാൻ താലൂക്ക് കൺട്രോൾ റൂമുകളും എൻഡിആർഎഫ് (NDRF) സംഘങ്ങളും പൂർണ്ണ സജ്ജമാണ്.

---------------

Hindusthan Samachar / Roshith K