Newdelhi , 05 ഓഗസ്റ്റ് (H.S.)

ന്യൂഡൽഹി: ഇന്ത്യയുടെ ഏറ്റവും ശേഷിയേറിയ ഭൂഖണ്ഡാന്തര ബാലിസ്റ്റിക് മിസൈലായ (ICBM) 'അഗ്നി-6' പ്രതിരോധ ഗവേഷണ വികസന കേന്ദ്രം (ഡി.ആർ.ഡി.ഒ) രഹസ്യമായി പരീക്ഷിക്കാൻ ഒരുങ്ങുന്നതായി അഭ്യൂഹങ്ങൾ ശക്തമാകുന്നു. ഇതിന് മുന്നോടിയായി ഇന്ത്യൻ മഹാസമുദ്രത്തിലെ വിപുലമായ വ്യോമ-സമുദ്ര ഇടനാഴികളിൽ കേന്ദ്ര പ്രതിരോധ മന്ത്രാലയം നിയന്ത്രണം ഏർപ്പെടുത്തി. അപകട മേഖല ഒഴിവാക്കുന്നതിനായി വ്യോമഗതാഗതവുമായി ബന്ധപ്പെട്ട് പൈലറ്റുമാർക്കും വ്യോമയാന അധികാരികൾക്കും മുന്നറിയിപ്പ് നൽകുന്ന 'നോട്ടം' (NOTAM - Notice to Airmissions) പുറപ്പെടുവിച്ചിട്ടുണ്ട്.

നാളെയും മറ്റന്നാളുമായി (രണ്ട് ദിവസങ്ങളിലായി) നടക്കുന്ന ഈ പരീക്ഷണത്തിനായി ഏകദേശം 2,530 കിലോമീറ്റർ നീളത്തിലാണ് വലിയ രീതിയിലുള്ള ഗതാഗത നിയന്ത്രണം ഏർപ്പെടുത്തിയിരിക്കുന്നത്. ഇത്രയും ദീർഘദൂര പാതയിൽ നിയന്ത്രണം പ്രഖ്യാപിച്ചതാണ് പുതിയ തലമുറയിൽപ്പെട്ട അഗ്നി-6 മിസൈലിന്റെയോ അല്ലെങ്കിൽ അത്യാധുനിക ദീർഘദൂര ബാലിസ്റ്റിക് മിസൈലിന്റെയോ ആദ്യ പരീക്ഷണത്തിന് കളമൊരുങ്ങുന്നു എന്ന നിഗമനത്തിലേക്ക് പ്രതിരോധ വിദഗ്ധരെ എത്തിച്ചിരിക്കുന്നത്.

എന്താണ് അഗ്നി-6 മിസൈൽ?

ഇന്ത്യൻ പ്രതിരോധ മേഖലയിൽ വിപ്ലവകരമായ മാറ്റങ്ങൾ കൊണ്ടുവരുമെന്ന് പ്രതീക്ഷിക്കുന്ന ഭൂഖണ്ഡാന്തര ബാലിസ്റ്റിക് മിസൈലാണ് അഗ്നി-6. നിലവിൽ ഇന്ത്യയുടെ പക്കലുള്ള ഏറ്റവും പ്രഹരശേഷിയുള്ള അഗ്നി-5 മിസൈലിന്റെ പരിധി 5,000 കിലോമീറ്ററിന് മുകളിലാണ്. എന്നാൽ ഇതിലും ഇരട്ടിയിലധികം ദൂരപരിധിയും സാങ്കേതിക മുന്നേറ്റവുമുള്ള തന്ത്രപ്രധാന ആയുധമായാണ് അഗ്നി-6 വികസിപ്പിക്കുന്നത്.

-

പ്രഹരശേഷിയും ദൂരപരിധിയും: 8,000 മുതൽ 10,000 കിലോമീറ്റർ വരെ ദൂരത്തിലുള്ള ശത്രുലക്ഷ്യങ്ങളെ കൃത്യമായി തകർക്കാൻ ഈ മിസൈലിന് ശേഷിയുണ്ടാകുമെന്നാണ് കരുതപ്പെടുന്നത്. ഇതോടെ ഏഷ്യ, യൂറോപ്പ്, ആഫ്രിക്കൻ വൻകരകളുടെ ഭൂരിഭാഗവും ഇതിന്റെ പരിധിയിലാകും.

-

എം.ഐ.ആർ.വി സങ്കേതികവിദ്യ: ഒരേസമയം ഒന്നിലധികം ആണവ പോർമുനകൾ (MIRV - Multiple Independently Targetable Re-entry Vehicles) വഹിച്ച് വ്യത്യസ്ത ലക്ഷ്യസ്ഥാനങ്ങളിലേക്ക് അയക്കാൻ അഗ്നി-6-ന് കഴിയും.

-

സെ അന്തർവാഹിനി ശേഷി: കരയിൽ നിന്നും അന്തർവാഹിനികളിൽ നിന്നും (Submarine Launched Ballistic Missile) ഒരുപോലെ വിക്ഷേപിക്കാൻ പാകത്തിലുള്ള സാങ്കേതിക രൂപകൽപ്പനയാണ് ഇതിനുള്ളത്.

തന്ത്രപ്രധാന പ്രാധാന്യം

ഇന്ത്യൻ മഹാസമുദ്രത്തിൽ ചൈനീസ് കപ്പലുകളുടെയും അന്തർവാഹിനികളുടെയും സാന്നിധ്യം വർദ്ധിച്ചുവരുന്ന സാഹചര്യത്തിലാണ് ഡി.ആർ.ഡി.ഒയുടെ ഈ നിർണ്ണായക നീക്കം. തദ്ദേശീയമായി വികസിപ്പിക്കുന്ന അഗ്നി-6 ഔദ്യോഗികമായി സേനയുടെ ഭാഗമാകുന്നതോടെ ലോകത്തിലെ വൻശക്തി രാജ്യങ്ങളുടെ (അമേരിക്ക, റഷ്യ, ചൈന) മുൻനിര മിസൈൽ ശേഷിക്കൊപ്പം ഇന്ത്യയും നിലയുറപ്പിക്കും.

നോട്ടം (NOTAM) പ്രഖ്യാപിച്ച 2,530 കിലോമീറ്റർ മേഖലയിൽ കപ്പലുകൾക്കോ വിമാനങ്ങൾക്കോ പ്രവേശനമുണ്ടാകില്ല. പരീക്ഷണവുമായി ബന്ധപ്പെട്ട കൂടുതൽ ഔദ്യോഗിക വിവരങ്ങൾ ഡി.ആർ.ഡി.ഒയോ പ്രതിരോധ മന്ത്രാലയമോ ഇതുവരെ പുറത്തുവിട്ടിട്ടില്ലെങ്കിലും, ഇന്ത്യൻ മഹാസമുദ്രത്തിൽ വരാനിരിക്കുന്ന പരീക്ഷണം രാജ്യത്തിന്റെ പ്രതിരോധ രംഗത്ത് വൻ നാഴികക്കല്ലാകുമെന്നാണ് കരുതപ്പെടുന്നത്.

---------------

Hindusthan Samachar / Roshith K