Thiruvananthapuram , 05 ഓഗസ്റ്റ് (H.S.)

തിരുവനന്തപുരം: സംസ്ഥാനത്ത് തുടരുന്ന കനത്ത മഴയിലും പ്രളയത്തിലും ഉണ്ടായ വ്യാപക നാശനഷ്ടങ്ങളും ദുരിതാശ്വാസ പ്രവർത്തനങ്ങളും ഇന്ന് ചേരുന്ന മന്ത്രിസഭായോഗം വിശദമായി വിലയിരുത്തും. മിക്ക ജില്ലകളിലും കനത്ത മഴ തുടരുന്ന സാഹചര്യത്തിൽ ദുരന്തനിവാരണ പ്രവർത്തനങ്ങൾ ഏകോപിപ്പിക്കുന്നതിനും അടിയന്തര മുൻകരുതൽ നടപടികൾ സ്വീകരിക്കുന്നതിനും മന്ത്രിസഭായോഗത്തിൽ പ്രധാന തീരുമാനങ്ങൾ ഉണ്ടാകും.

കനത്ത മഴയിലും വെള്ളപ്പൊക്കത്തിലും വലിയ തോതിൽ നാശനഷ്ടമുണ്ടായ പത്തനംതിട്ട ജില്ലയിലെ ആറന്മുള, റാന്നി ഉൾപ്പെടെയുള്ള ദുരന്തബാധിത മേഖലകൾക്കായി പ്രത്യേക സഹായ പാക്കേജ് സർക്കാരിന്റെ പരിഗണനയിലുണ്ട്. വെള്ളപ്പൊക്കത്തിൽ വീടുകളും ഉപജീവനമാർഗ്ഗങ്ങളും നഷ്ടപ്പെട്ടവർക്ക് അടിയന്തര സാമ്പത്തിക സഹായവും പുനരധിവാസ പദ്ധതികളും ലഭ്യമാക്കാനാണ് സർക്കാർ ആലോചിക്കുന്നത്.

ദുരന്തബാധിത പ്രദേശങ്ങളിലെ അടിസ്ഥാന സൗകര്യങ്ങൾ അടിയന്തരമായി പുനഃസ്ഥാപിക്കുന്നതിനും തകർന്ന റോഡുകളും പാലങ്ങളും പുനർനിർമ്മിക്കുന്നതിനുമുള്ള ധനസഹായവും ഈ പാക്കേജിൽ ഉൾപ്പെടുത്തിയേക്കും.

മഴക്കെടുതിയിൽ സംസ്ഥാനത്തെ കാർഷിക മേഖലയിലുണ്ടായ കനത്ത നാശനഷ്ടങ്ങൾ കണക്കിലെടുത്ത് കർഷകർക്കുള്ള നഷ്ടപരിഹാര തുക വർദ്ധിപ്പിക്കുന്ന കാര്യവും ഇന്നത്തെ മന്ത്രിസഭായോഗത്തിന്റെ പ്രധാന അജണ്ടയിലുണ്ട്. ഏക്കറുകണക്കിന് കൃഷിഭൂമിയും വിളകളും വെള്ളത്തിനടിയിലായതോടെ കർഷകർ കടുത്ത സാമ്പത്തിക പ്രയാസത്തിലാണ്. നിലവിലുള്ള ദുരന്തസഹായ മാനദണ്ഡങ്ങൾ പുതുക്കി, അർഹമായ നഷ്ടപരിഹാരം കൂടുതൽ വേഗത്തിൽ കർഷകരിലേക്ക് എത്തിക്കാനാണ് ഭരണകൂടം ലക്ഷ്യമിടുന്നത്.

കഴിഞ്ഞ ദിവസങ്ങളിൽ പ്രളയബാധിത പ്രദേശങ്ങളിൽ ജനപ്രതിനിധികളും ബന്ധപ്പെട്ട ഉന്നത ഉദ്യോഗസ്ഥരും നേരിട്ടെത്തി സ്ഥിതിഗതികൾ വിലയിരുത്തിയിരുന്നു. ആറന്മുള, റാന്നി തുടങ്ങിയ മേഖലകളിൽ സന്ദർശനം നടത്തിയ സംഘം ദുരിതബാധിതരുടെ പ്രയാസങ്ങൾ ചോദിച്ചറിയുകയും ദുരിതാശ്വാസ ക്യാമ്പുകളുടെ പ്രവർത്തനം തൃപ്തികരമാണോ എന്ന് പരിശോധിക്കുകയും ചെയ്തു. അടിയന്തര സഹായങ്ങൾ ലഭ്യമാക്കുമെന്നും ജനങ്ങളുടെ ആശങ്കകൾ പരിഹരിക്കുമെന്നും അധികൃതർ ഉറപ്പുനൽകിയിട്ടുണ്ട്.

പല ജില്ലകളിലും കനത്ത മഴ മുന്നറിയിപ്പ് നിലനിൽക്കുന്ന സാഹചര്യത്തിൽ റവന്യൂ വകുപ്പ്, ദുരന്തനിവാരണ സേന, തദ്ദേശ സ്വയംഭരണ സ്ഥാപനങ്ങൾ എന്നിവയെ ഏകോപിപ്പിച്ച് മുൻകരുതലുകൾ ഊർജ്ജിതമാക്കാൻ മന്ത്രിസഭായോഗം നിർദ്ദേശം നൽകും. ദുരിതാശ്വാസ ക്യാമ്പുകളിൽ കഴിയുന്നവർക്ക് ഭക്ഷണവും ആവശ്യമായ വൈദ്യസഹായവും കുടിവെള്ളവും തടസ്സമില്ലാതെ ഉറപ്പാക്കുന്നതിനും അടിയന്തര ആവശ്യങ്ങൾക്കായി ജില്ലാ ഭരണകൂടങ്ങൾക്ക് ആവശ്യമായ സാമ്പത്തിക ഫണ്ട് അനുവദിക്കുന്നതിനും യോഗത്തിൽ തീരുമാനമായേക്കും. നദികളിലെ ജലനിരപ്പ് നിരന്തരം നിരീക്ഷിച്ച് അപകടസാധ്യതയുള്ള പ്രദേശങ്ങളിൽനിന്ന് ആളുകളെ സുരക്ഷിത കേന്ദ്രങ്ങളിലേക്ക് മാറ്റാനും നിർദ്ദേശമുണ്ട്.

---------------

Hindusthan Samachar / Roshith K