Newdelhi , 05 ഓഗസ്റ്റ് (H.S.)

ന്യൂഡൽഹി: പ്രധാനമന്ത്രി നരേന്ദ്ര മോദിയുടെ ഫെയ്സ്ബുക്ക് പോസ്റ്റ് നീക്കം ചെയ്തതുമായി ബന്ധപ്പെട്ട വിവാദങ്ങൾക്കും സോഷ്യൽ മീഡിയ പ്ലാറ്റ്ഫോമുകളിലെ ഡീപ്പ് ഫേക്ക് ഉള്ളടക്കങ്ങൾക്കും പിന്നാലെ പരസ്യമായ ഖേദപ്രകടനവുമായി മെറ്റ ചീഫ് എക്സിക്യൂട്ടീവ് ഓഫീസർ (സി.ഇ.ഒ) മാർക്ക് സക്കർബർഗ്. പ്ലാറ്റ്ഫോം പ്രവർത്തനങ്ങളിലുണ്ടായ സാങ്കേതിക വീഴ്ചകൾക്കും, ഡീപ്പ് ഫേക്ക് വീഡിയോകൾ, കുട്ടികൾക്കെതിരായ ലൈംഗികാതിക്രമ ഉള്ളടക്കങ്ങൾ (CSAM) എന്നിവ തടയുന്നതിൽ സംഭവിച്ച പിഴവുകൾക്കും സക്കർബർഗ് ഔദ്യോഗികമായി മാപ്പ് അപേക്ഷിച്ചു.

ഇന്ത്യൻ ഐ.ടി നിയമപ്രകാരം സോഷ്യൽ മീഡിയ പ്ലാറ്റ്ഫോമുകൾക്ക് ലഭിക്കുന്ന 'സേഫ് ഹാർബർ' (Safe Harbour) പരിരക്ഷ ഇനി മെറ്റയ്ക്ക് ബാധകമല്ലെന്ന് കേന്ദ്ര അധികൃതർ വ്യക്തമാക്കിയ പശ്ചാത്തലത്തിലാണ് ഈ നീക്കം. ഇടനിലക്കാർ (Intermediaries) എന്ന നിർവചനത്തിന് കീഴിൽ മെറ്റ ഉൾപ്പെടുന്നില്ലെന്നും, ഉപയോക്താക്കൾക്ക് ഏത് തരം ഉള്ളടക്കങ്ങൾ കാണിക്കണമെന്ന് സ്വയം തീരുമാനിക്കുന്നതിലും പ്രമോട്ട് ചെയ്യുന്നതിലും കമ്പനിക്ക് നേരിട്ട് പങ്കുണ്ടെന്നും കേന്ദ്ര സർക്കാർ ചൂണ്ടിക്കാട്ടിയിരുന്നു.

സാമ്പത്തിക ലാഭത്തിനായി ഉള്ളടക്കങ്ങൾ പ്രമോട്ട് ചെയ്തു

ചില പ്രത്യേക തരത്തിലുള്ള ഉള്ളടക്കങ്ങളും വീഡിയോകളും പ്ലാറ്റ്ഫോമിൽ കൂടുതൽ ആളുകളിലേക്ക് എത്തിക്കുന്നതിനായി (Boosting) വലിയ തുക കൈപ്പറ്റിയതായി മെറ്റ അധികൃതർ സമ്മതിച്ചു. പ്ലാറ്റ്ഫോമിന്റെ സ്വാഭാവികമായ പ്രവർത്തന ശൈലിക്ക് വിപരീതമായി അൽഗോരിതങ്ങളിൽ മാറ്റം വരുത്തുകയും തരംതിരിച്ചുള്ള ഉള്ളടക്കങ്ങൾക്ക് മുൻഗണന നൽകുകയും ചെയ്തത് തെറ്റാണെന്ന് മെറ്റ അംഗീകരിച്ചു.

പ്രധാനമന്ത്രിയുടെ ഔദ്യോഗിക ഉള്ളടക്കങ്ങൾ അബദ്ധവശാൽ നീക്കം ചെയ്തതും സമാനമായ അൽഗോരിതം വീഴ്ചകളുടെ ഭാഗമായാണെന്ന് കമ്പനി വ്യക്തമാക്കി. ഇത്തരം ഗുരുതരമായ തെറ്റുകൾ ഭാവിയിൽ ആവർത്തിക്കാതിരിക്കാൻ കർശനമായ നടപടികൾ സ്വീകരിക്കുമെന്നും സക്കർബർഗ് ഉറപ്പുനൽകി.

ഡീപ്പ് ഫേക്കുകളും ഐ.ടി നിയമ ലംഘനങ്ങളും

അടുത്തിടെയായി എ.ഐ (കൃത്രിമബുദ്ധി) സാങ്കേതികവിദ്യ ഉപയോഗിച്ച് നിർമ്മിക്കുന്ന ഡീപ്പ് ഫേക്ക് വീഡിയോകളും വ്യാജ സന്ദേശങ്ങളും ഫെയ്സ്ബുക്ക്, ഇൻസ്റ്റാഗ്രാം തുടങ്ങിയ പ്ലാറ്റ്ഫോമുകളിൽ വ്യാപകമായി പ്രചരിച്ചിരുന്നു. പ്രമുഖ വ്യക്തികളെയും രാഷ്ട്രീയ നേതാക്കളെയും ലക്ഷ്യമിട്ടുള്ള ഇത്തരം തെറ്റായ പ്രചാരണങ്ങൾ തടയാൻ മെറ്റയുടെ സുരക്ഷാ സംവിധാനങ്ങൾക്ക് സാധിച്ചില്ലെന്ന് വ്യാപകമായ വിമർശനമുയർന്നിരുന്നു.

ഇതുകൂടാതെ, കുട്ടികൾക്കെതിരായ ലൈംഗിക ചൂഷണങ്ങൾ അടങ്ങിയ ഉള്ളടക്കങ്ങൾ നീക്കം ചെയ്യുന്നതിലും മെറ്റയ്ക്ക് വീഴ്ച സംഭവിച്ചതായി ചൂണ്ടിക്കാണിക്കപ്പെട്ടു. ഡിജിറ്റൽ മേഖലയിലെ വ്യക്തിഗത സുരക്ഷ ഉറപ്പാക്കുന്നതിലും രാജ്യത്തെ നിയമങ്ങൾ പാലിക്കുന്നതിലും സോഷ്യൽ മീഡിയ ഭീമന്മാർ കാണിക്കുന്ന വീഴ്ചകളിൽ കേന്ദ്ര സർക്കാർ കടുത്ത അമർഷം രേഖപ്പെടുത്തിയിരുന്നു.

കടുത്ത നിലപാടിൽ സർക്കാർ

ഡിജിറ്റൽ പ്ലാറ്റ്ഫോമുകളിലെ തെറ്റായ വിവരങ്ങളുടെ വ്യാപനത്തിനെതിരെയും ഉപയോക്താക്കളുടെ സുരക്ഷ മുൻനിർത്തിയും കേന്ദ്ര സർക്കാർ ശക്തമായ നിയമനടപടികൾക്കൊരുങ്ങുകയാണ്. പ്ലാറ്റ്ഫോമുകൾ കേവലം സന്ദേശങ്ങൾ കൈമാറുന്ന മാധ്യമങ്ങൾ മാത്രമല്ലെന്നും, സാമ്പത്തിക ലാഭത്തിനായി ഉള്ളടക്കങ്ങളിൽ ഇടപെടുന്നതിനാൽ അവയ്ക്ക് പൂർണ്ണ ഉത്തരവാദിത്തമുണ്ടെന്നും സർക്കാർ വ്യക്തമാക്കി.

സക്കർബർഗിന്റെ മാപ്പപേക്ഷയും തെറ്റുകൾ അംഗീകരിച്ചുള്ള പ്രസ്താവനയും വരും ദിവസങ്ങളിൽ ഇന്ത്യയിലെ സോഷ്യൽ മീഡിയ നിയന്ത്രണ നിയമങ്ങളിൽ നിർണ്ണായകമായ മാറ്റങ്ങൾക്ക് വഴിതെളിച്ചേക്കാം.

---------------

Hindusthan Samachar / Roshith K