Pathanamthitta , 06 ഓഗസ്റ്റ് (H.S.)

ശബരിമലയിൽ അരവണ നിർമാണത്തിനും മറ്റ് ആവശ്യങ്ങൾക്കുമായി മിൽമയിൽ നിന്ന് നെയ് വാങ്ങിയതിലെ വൻ ക്രമക്കേടുമായി ബന്ധപ്പെട്ട് തിരുവിതാംകൂർ ദേവസ്വം ബോർഡ് മുൻ പ്രസിഡന്റ് പി.എസ്. പ്രശാന്തിനെയും മുൻ ബോർഡ് അംഗം അജികുമാറിനെയും കേസിൽ പ്രതിചേർക്കാൻ തീരുമാനം. ഇതിനുപുറമെ, കേസിൽ പങ്കുണ്ടെന്ന് കണ്ടെത്തിയതും അടുത്തിടെ അന്തരിച്ചതുമായ മുൻ അഡ്മിനിസ്ട്രേറ്റീവ് ഓഫീസർ മുരാരി ബാബുവിനെയും പ്രതിപ്പട്ടികയിൽ ഉൾപ്പെടുത്തും. ദേവസ്വം വിജിലൻസ് നടത്തിയ പ്രാഥമിക അന്വേഷണത്തിന് പിന്നാലെയാണ് കേസിൽ നിർണായക നീക്കം.

ക്രമക്കേട് സംശയിക്കുന്ന ടെൻഡർ ഇടപാടുകൾക്കും തീരുമാനങ്ങൾക്കും മുന്നിൽ നിന്ന് നേതൃത്വം വഹിച്ചത് ഇവരാണെന്നാണ് വിജിലൻസ് സംഘത്തിന്റെ വിലയിരുത്തൽ. വിപണി നിരക്കിലും കുറഞ്ഞ തുകയ്ക്ക് ഉയർന്ന ഗുണനിലവാരമുള്ള നെയ് വിതരണം ചെയ്യാൻ മറ്റു കമ്പനികൾ സന്നദ്ധത അറിയിച്ചിട്ടും, അത് തള്ളി ഉയർന്ന നിരക്കിൽ മിൽമയ്ക്ക് കരാർ നൽകാൻ ഇവർ മുൻകൈ എടുത്തതായി കണ്ടെത്തിയിട്ടുണ്ട്. കൂടാതെ, മിൽമയിൽ നിന്ന് ഓർഡർ ചെയ്ത നെയ്യ് മുഴുവനായും സന്നിധാനത്ത് എത്തിയിട്ടുണ്ടോ എന്ന കാര്യത്തിലും വലിയ ക്രമക്കേടുകൾ സംശയിക്കുന്നു.

വിജിലൻസ് അന്വേഷണവും കണ്ടെത്തലുകളും

ദേവസ്വം വിജിലൻസ് നടത്തിയ അന്വേഷണത്തിൽ ഉദ്യോഗസ്ഥരുടെയും അന്നത്തെ ഭരണസമിതിയുടെയും ഭാഗത്തുനിന്ന് ഗുരുതര വീഴ്ചകളും ക്രമക്കേടുകളും ഉണ്ടായതായി വ്യക്തമായിട്ടുണ്ട്. അന്നത്തെ ദേവസ്വം കമ്മീഷണറുടെ എതിർപ്പ് മറികടന്നാണ് ഭരണസമിതി നെയ്യ് വാങ്ങുന്നതിനുള്ള വിവാദ തീരുമാനങ്ങൾ കൈക്കൊണ്ടത്. ഈ ഇടപാടിലൂടെ ദേവസ്വം ബോർഡിന് ഭീമമായ സാമ്പത്തിക നഷ്ടമുണ്ടായെന്നും സാമ്പത്തിക അട്ടിമറി നടന്നെന്നുമാണ് വിജിലൻസ് റിപ്പോർട്ടിലുള്ളത്. അന്വേഷണ റിപ്പോർട്ട് ഹൈക്കോടതിയുടെ പരിഗണനയ്ക്ക് നൽകിയ ശേഷമാണ് തുടർനടപടികളിലേക്ക് വിജിലൻസ് കടക്കുന്നത്.

സ്വർണക്കൊള്ള കേസിലെയും പ്രതികൾ

അഴിമതി ആരോപണ നിഴലിലുള്ള പി.എസ്. പ്രശാന്ത്, അജികുമാർ, മുരാരി ബാബു എന്നിവർ ശബരിമലയിലെ പ്രശസ്തമായ സ്വർണക്കൊള്ള കേസിലും പ്രധാന പ്രതികളാണ്. ശ്രീകോവിലിന് മുന്നിലെ ദ്വാരപാലക ശിൽപ്പങ്ങളിലെയും പീഠങ്ങളിലെയും സ്വർണപ്പാളികൾ ക്രമക്കേട് നടത്തി പുറത്തേക്ക് കടത്തിയ കേസിൽ പ്രത്യേക അന്വേഷണ സംഘം (എസ്.ഐ.ടി) അടുത്തിടെ ഇവരെ അറസ്റ്റ് ചെയ്തിരുന്നു. ഹൈക്കോടതി അനുമതിയില്ലാതെ സ്വർണപ്പാളികൾ അറ്റകുറ്റപ്പണിക്കായി നൽകിയതിലും മുൻപ് നടന്ന സ്വർണ അപഹരണം മറച്ചുവെക്കാൻ ഗൂഢാലോചന നടത്തിയതിലും ഇവർക്ക് നേരിട്ട് പങ്കുണ്ടെന്ന് കണ്ടെത്തിയിരുന്നു.

തന്ത്രിയുടെയും ഉദ്യോഗസ്ഥരുടെയും നിലപാടുകൾ മറികടന്ന് കൈക്കൊണ്ട ഏകപക്ഷീയമായ തീരുമാനങ്ങളാണ് തുടർച്ചയായ അഴിമതിക്കേസുകളിലേക്ക് അന്നത്തെ ദേവസ്വം ഭാരവാഹികളെ എത്തിച്ചത്. സ്വർണക്കൊള്ള കേസിനു പിന്നാലെ മിൽമ നെയ് ഇടപാടിലും വിജിലൻസ് പ്രതിചേർക്കുന്നതോടെ ദേവസ്വം ബോർഡിന്റെ മുൻ ഭരണസമിതിയിലെ പ്രമുഖർ കൂടുതൽ നിയമക്കുരുക്കിലായിരിക്കുകയാണ്.

---------------

Hindusthan Samachar / Roshith K