Thiruvananthapuram , 07 ഓഗസ്റ്റ് (H.S.)

തിരുവനന്തപുരം: കേരള പബ്ലിക് സർവീസ് കമ്മീഷൻ (പി.എസ്.സി) നടത്തുന്ന പരീക്ഷകളുടെ സുതാര്യതയെ വീണ്ടും ചോദ്യമുനയിൽ നിർത്തുന്ന സംഭവത്തിൽ വൻ വിവാദം പുകയുന്നു. സാമ്പത്തിക ശാസ്ത്രവും സ്ഥിതിവിവരക്കണക്കും (ഇക്കണോമിക്സ് ആൻഡ് സ്റ്റാറ്റിസ്റ്റിക്സ്) വകുപ്പിലെ റിസർച്ച് ഓഫീസർ തസ്തികയിലേക്കായി (കാറ്റഗറി നമ്പർ: 414/2025) നടത്തിയ പരീക്ഷയുടെ അന്തിമ ഉത്തരസൂചിക (Final Answer Key) പ്രസിദ്ധീകരിച്ചതോടെയാണ് ഉദ്യോഗാർത്ഥികളുടെ പ്രതിഷേധം ശക്തമായിരിക്കുന്നത്.

പരീക്ഷയിൽ തുടർച്ചയായി 54 ചോദ്യങ്ങൾക്ക് 'ബി' (Option B) എന്നത് ശരിയുത്തരമായി വരുന്ന രീതിയിലാണ് ചോദ്യപേപ്പർ തയ്യാറാക്കിയിരുന്നതെന്ന ഗുരുതരമായ ആക്ഷേപമാണ് നേരത്തെ തന്നെ ഉയർന്നത്. എന്നാൽ അന്തിമ ഉത്തരസൂചിക പുറത്തുവന്നപ്പോൾ ഇതിൽ ഒരു ചോദ്യത്തിന്റെ ഉത്തരം മാത്രമാണ് 'ബി' ഓപ്ഷനിൽ നിന്ന് 'എ' (Option A) ആയി മാറ്റാൻ അധികൃതർ തയ്യാറായത്. ബാക്കി 53 ചോദ്യങ്ങൾക്കും 'ബി' ഓപ്ഷൻ തന്നെ ശരിയുത്തരമായി നിലനിർത്തിയിരിക്കുകയാണ്. കൂടാതെ, ആകെയുള്ള 100 ചോദ്യങ്ങളിൽ 4 ചോദ്യങ്ങൾ പൂർണ്ണമായും റദ്ദാക്കുകയും ചെയ്തിട്ടുണ്ട്.

ക്രമക്കേട് സംശയങ്ങളും ഉദ്യോഗാർത്ഥികളുടെ അമർഷവും

എ കോഡ് ചോദ്യപേപ്പർ പരിശോധിക്കുമ്പോൾ 20-ാം നമ്പർ ചോദ്യത്തിന്റെ ഉത്തരമാണ് 'ബി'യിൽ നിന്ന് 'എ' ആയി പി.എസ്.സി തിരുത്തിയത്. എങ്കിലും തുടർച്ചയായ അൻപതിലധികം ചോദ്യങ്ങൾക്ക് ഒരേ ഓപ്ഷൻ തന്നെ ശരിയുത്തരമായി വരുന്നത് സാധാരണ പരീക്ഷാ രീതികൾക്ക് വിരുദ്ധവും അങ്ങേയറ്റം അസ്വാഭാവികവുമാണെന്ന് ഉദ്യോഗാർത്ഥികളും പരിശീലകരും ചൂണ്ടിക്കാണിക്കുന്നു. ഓപ്ഷനുകൾ ക്രമരഹിതമായി നൽകുന്നതിന് പകരം ഒരേ ഓപ്ഷൻ തുടർച്ചയായി വരുന്നത് ക്രമക്കേടുകൾക്ക് വഴിതുറക്കുമെന്നാണ് പ്രധാന വിമർശനം.

ബിരുദാനന്തര ബിരുദം (Post Graduation) അടിസ്ഥാന യോഗ്യതയായി നിശ്ചയിച്ചിട്ടുള്ള ഉയർന്ന ഗസറ്റഡ് തസ്തികയിലേക്കാണ് ഈ പരീക്ഷ നടന്നത്. എന്നാൽ ചോദ്യപേപ്പറിന്റെ നിലവാരം അങ്ങേയറ്റം നിസ്സാരമായിരുന്നുവെന്നും പ്ലസ് ടു തലത്തിലെ ചോദ്യങ്ങൾ മാത്രമാണ് ഉൾപ്പെടുത്തിയിരുന്നതെന്നും ആക്ഷേപമുണ്ട്. അതിനും പുറമെ, പ്രമുഖ സ്വകാര്യ പി.എസ്.സി പരിശീലന കേന്ദ്രത്തിന്റെ റാങ്ക് ഫയലിൽ നിന്നും ഗൈഡുകളിൽ നിന്നും ചോദ്യങ്ങൾ അതേപടി പകർത്തിയതാണെന്ന ആരോപണവും ശക്തമാണ്.

അന്വേഷണം ആവശ്യപ്പെട്ട് പരാതികൾ

നേരത്തെ നടന്ന ചില പി.എസ്.സി പരീക്ഷകളിലെ രീതികളുമായി ബന്ധപ്പെട്ട് ക്രൈംബ്രാഞ്ച് അന്വേഷണം പുരോഗമിക്കുന്നതിനിടെയാണ് ഇത്തരം ഗുരുതരമായ വീഴ്ചകൾ വീണ്ടും ആവർത്തിക്കുന്നത്. സിലബസ് പ്രസിദ്ധീകരിച്ച് പഠിക്കാൻ ആവശ്യമായ സമയം അനുവദിച്ചില്ലെന്ന പരാതി ഉദ്യോഗാർത്ഥികൾ ഉന്നയിച്ചിരുന്നെങ്കിലും അധികൃതർ അത് ഗൗനിച്ചിരുന്നില്ല. പരീക്ഷാ നടത്തിപ്പിലെ ഈ അട്ടിമറി സംശയങ്ങളെക്കുറിച്ച് നിഷ്പക്ഷമായ അന്വേഷണം വേണമെന്ന് ആവശ്യപ്പെട്ട് ഉദ്യോഗാർത്ഥികൾ മുഖ്യമന്ത്രിക്ക് ഉൾപ്പെടെ പരാതി നൽകിയിട്ടുണ്ട്. അന്തിമ ഉത്തരസൂചികയിലെ ഈ അസ്വാഭാവികതയും ചോദ്യപേപ്പർ നിർമ്മാണത്തിലെ അശാസ്ത്രീയതയും റദ്ദാക്കി പരീക്ഷ വീണ്ടും നടത്തണമെന്ന ആവശ്യവും ഉദ്യോഗാർത്ഥികളുടെ ഭാഗത്തുനിന്ന് ഉയരുന്നുണ്ട്.

---------------

Hindusthan Samachar / Roshith K