Kochi, 01 സെപ്റ്റംബര് (H.S.)

**കൊച്ചി:** 'റിട്ടയർ ഇൻ കേരള' (Retire in Kerala) എന്ന നൂതന ആശയത്തിലൂന്നി കേരളത്തെ ആഗോളതലത്തിലുള്ള വിനോദസഞ്ചാര, വിജ്ഞാന, ആരോഗ്യ ഹബ്ബാക്കി മാറ്റുമെന്ന് മുഖ്യമന്ത്രി വി.ഡി. സതീശൻ. കൊച്ചിയിൽ നടന്ന 'ഇന്തോ-അറബ് കണക്റ്റ് 2026' ഉച്ചകോടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. അറബ് രാജ്യങ്ങളും കേരളവും തമ്മിലുള്ള നൂറ്റാണ്ടുകളുടെ ചരിത്രപരമായ ബന്ധം കൂടുതൽ ദൃഢമാക്കാനും വൻതോതിലുള്ള നിക്ഷേപങ്ങൾ ആകർഷിക്കാനും ലക്ഷ്യമിട്ടുള്ള സുപ്രധാന വികസന പദ്ധതികൾക്ക് സർക്കാർ രൂപം നൽകിയതായി മുഖ്യമന്ത്രി വ്യക്തമാക്കി.

പ്രായമായ വിദേശികൾക്കും പ്രവാസികൾക്കും വിശ്രമജീവിതം നയിക്കാൻ അനുയോജ്യമായ ആഗോള കേന്ദ്രമാക്കി കേരളത്തെ മാറ്റുകയാണ് പദ്ധതിയിലൂടെ ലക്ഷ്യമിടുന്നത്. ഇതിന്റെ ഭാഗമായി യുകെ, ജർമ്മനി, ഓസ്ട്രേലിയ തുടങ്ങിയ വിദേശ രാജ്യങ്ങളിലെ സിലബസ് മാതൃകയിലുള്ള അന്താരാഷ്ട്ര നിലവാരത്തിലുള്ള കെയർഗിവർ കോഴ്സുകളും അത്യാധുനിക ജെറിയാട്രിക് കെയർ സെന്ററുകളും സംസ്ഥാനത്ത് ആരംഭിക്കും.

### 'നോളജ് വാലി'യും സംയോജിത ചികിത്സാ രീതികളും

വിജ്ഞാന-ആരോഗ്യ മേഖലയിൽ വിപ്ലവകരമായ മാറ്റങ്ങൾ കൊണ്ടുവരുന്നതിനായി 'നോളജ് വാലി' (Knowledge Valley) പദ്ധതി നടപ്പിലാക്കും. അന്താരാഷ്ട്ര തലത്തിൽ പ്രശസ്തമായ വിദേശ സർവകലാശാലകളെ കേരളത്തിലേക്ക് സ്വാഗതം ചെയ്യും. യൂറോപ്യൻ ആരോഗ്യ മാതൃകകളെ അടിസ്ഥാനമാക്കി ആയുർവേദത്തെയും അലോപ്പതിയെയും സമന്വയിപ്പിച്ചുകൊണ്ടുള്ള സംയോജിത പുനരധിവാസ കേന്ദ്രങ്ങൾ സ്ഥാപിക്കാനും സർക്കാർ തീരുമാനിച്ചിട്ടുണ്ട്.

മെഡിക്കൽ, നഴ്സിംഗ് കോളേജുകൾ വഴി അന്താരാഷ്ട്ര നിലവാരമുള്ള പരിശീലനം നൽകി ആഗോള തൊഴിൽ വിപണിയിലേക്ക് വിദഗ്ദ്ധരായ ആരോഗ്യ പ്രവർത്തകരെ വാർത്തെടുക്കുമെന്നും മുഖ്യമന്ത്രി പറഞ്ഞു.

### 'മിഷൻ സമുദ്ര'യും ഏവിയേഷൻ ഹബ്ബും

ടൂറിസം വികസനത്തിന് ആക്കം കൂട്ടുന്നതിനായി 'മിഷൻ സമുദ്ര' എന്ന സമഗ്ര പദ്ധതിയും പ്രഖ്യാപിച്ചു. തീരദേശങ്ങളെയും ചെറുകിട-വൻകിട തുറമുഖങ്ങളെയും ബന്ധിപ്പിച്ച് കേരളത്തെ പൂർണ്ണമായും ഒരു 'പോർട്ട് സിറ്റി' മാതൃകയിലേക്ക് ഉയർത്തും. പദ്ധതിയുടെ രണ്ടാം ഘട്ടത്തിൽ 44 നദികളെയും പ്രധാന കായലുകളെയും ഉൾപ്പെടുത്തി ഉൾനാടൻ ജലഗതാഗതവും ക്രൂയിസ് ടൂറിസവും വിപുലീകരിക്കും. കൊച്ചിയെ ഗൾഫ് രാജ്യങ്ങളുമായും ഗോവയുമായും ബന്ധിപ്പിക്കുന്ന ക്രൂയിസ് സർവീസുകളും കാസർഗോഡ് മുതൽ തിരുവനന്തപുരം വരെയുള്ള തീരദേശ ക്രൂയിസ് സർവീസുകളും ആരംഭിക്കാൻ പദ്ധതിയുണ്ട്.

നാല് അന്താരാഷ്ട്ര വിമാനത്താവളങ്ങളുടെ സാധ്യതകൾ പ്രയോജനപ്പെടുത്തി കേരളത്തെ ഒരു 'ഏവിയേഷൻ ഹബ്ബ്' ആക്കി മാറ്റും. വിമാനങ്ങളുടെ അറ്റകുറ്റപ്പണികൾക്കായുള്ള എം.ആർ.ഒ സൗകര്യങ്ങളും പൈലറ്റ് പരിശീലന സ്ഥാപനങ്ങളും ആരംഭിക്കും. കൂടാതെ കൊച്ചി വിമാനത്താവളത്തിന് സമീപം ആധുനിക സൗകര്യങ്ങളോടെയുള്ള അന്താരാഷ്ട്ര കൺവെൻഷൻ സെന്ററും സ്ഥാപിക്കും.

ഇന്ത്യയിലെ ആദ്യത്തെ ഓഷ്യനേറിയം സ്ഥാപിക്കുന്നതിനായി കൊച്ചിയിൽ 30 ഏക്കർ ഭൂമി വിട്ടുനൽകാൻ സർക്കാർ തയ്യാറാണെന്നും, കേരളത്തിന്റെ 2000 വർഷത്തെ സമുദ്ര വ്യാപാര പാരമ്പര്യം വിളിച്ചോതുന്ന മാരിടൈം മ്യൂസിയം ഒരുക്കുമെന്നും മുഖ്യമന്ത്രി കൂട്ടിച്ചേർത്തു. ഉച്ചകോടി വഴി വരും വർഷങ്ങളിൽ വിനോദസഞ്ചാര മേഖലയിൽ 25,000 കോടി രൂപയുടെ വ്യാപാര-നിക്ഷേപ സാധ്യതകളാണ് പ്രതീക്ഷിക്കുന്നത്.

---------------

Hindusthan Samachar / Roshith K