Thiruvananthapuram, 12 സെപ്റ്റംബര് (H.S.)

തിരുവനന്തപുരം: സംസ്ഥാനത്തെ ദീർഘകാല വൈദ്യുതി കരാർ റദ്ദാക്കിയതുമായി ബന്ധപ്പെട്ട് പ്രതിപക്ഷ നേതാവ് പിണറായി വിജയൻ ഉന്നയിച്ച വിമർശനങ്ങൾക്ക് മറുപടിയുമായി കെഎസ്ഇബി മുൻ ചെയർമാൻ ബി. അശോക് രംഗത്ത്. കരാർ റദ്ദാക്കിയ നടപടിയിൽ ഉദ്യോഗസ്ഥരുടെ ഭാഗത്തുനിന്ന് യാതൊരുവിധ വീഴ്ചയും സംഭവിച്ചിട്ടില്ലെന്ന് വ്യക്തമാക്കിയ അദ്ദേഹം, പ്രതിപക്ഷ നേതാവിന്റെ പ്രസ്താവന ഓർമ്മപ്പിശക് മൂലമായിരിക്കാമെന്നും പരിഹസിച്ചു.

വിഷയവുമായി ബന്ധപ്പെട്ട വസ്തുതകൾ കൃത്യമായി മനസ്സിലാക്കാതെയാണ് ഇത്തരമൊരു വിമർശനം ഉന്നയിച്ചിരിക്കുന്നതെന്നും അദ്ദേഹം കുറ്റപ്പെടുത്തി.

കരാറുമായി ബന്ധപ്പെട്ട മുഴുവൻ ഫയലുകളും രേഖകളും ഇപ്പോഴും ലഭ്യമാണ്. അവ പരിശോധിച്ചാൽ കാര്യങ്ങൾ വ്യക്തമാകും. വസ്തുതകൾ പരിശോധിക്കാതെ ഉദ്യോഗസ്ഥരുടെ തലയിൽ പഴിചാരി രാഷ്ട്രീയമായി രക്ഷപ്പെടാനാണ് പ്രതിപക്ഷ നേതാവ് ശ്രമിക്കുന്നത്.

പ്രായമാകുമ്പോൾ സ്വാഭാവികമായി ഉണ്ടാകുന്ന മറവിയോ ഓർമ്മക്കുറവോ ആയിരിക്കാം പ്രതിപക്ഷ നേതാവിനും സംഭവിച്ചിട്ടുള്ളത്. എന്നാൽ ഉത്തരവാദിത്തപ്പെട്ട ഒരു ഭരണഘടനാ പദവിയിലിരിക്കുന്ന വ്യക്തി കാര്യങ്ങൾ ബോധ്യപ്പെടാതെ സംസാരിക്കുന്നത് ശരിയല്ലെന്നും അദ്ദേഹം പറഞ്ഞു.

ദീർഘകാല വൈദ്യുതി കരാർ റദ്ദാക്കപ്പെട്ടതുമായി ബന്ധപ്പെട്ട് ഉയർന്ന എല്ലാ തീരുമാനങ്ങളും നിയമപരമായ നടപടിക്രമങ്ങൾ പാലിച്ചുകൊണ്ട് മാത്രമാണ് എടുത്തിട്ടുള്ളത്. ഇതിൽ ഉദ്യോഗസ്ഥർക്ക് സ്വന്തം നിലയിൽ യാതൊരു തീരുമാനവും എടുക്കാനാകില്ല. പരോക്ഷമായി താനായിരുന്നു അന്ന് സർക്കാർ എന്ന തരത്തിലാണ് പ്രതിപക്ഷ നേതാവിന്റെ പ്രതികരണങ്ങൾ പുറത്തുവരുന്നത്. അത്തരമൊരു അധിക ബഹുമതി തനിക്ക് ആവശ്യമില്ലെന്നും ബി. അശോക് കൂട്ടിച്ചേർത്തു.

സംസ്ഥാനത്ത് നിലവിൽ നേരിടുന്ന വൈദ്യുതി പ്രതിസന്ധിയുടെ യഥാർത്ഥ കാരണം തിരിച്ചറിയാതെ പഴയ കാര്യങ്ങളെക്കുറിച്ച് അനാവശ്യമായി ചർച്ചകൾ നീട്ടിക്കൊണ്ടുപോകുന്നതിൽ അർത്ഥമില്ലെന്നും അദ്ദേഹം ചൂണ്ടിക്കാട്ടി. പകൽ സമയത്ത് ഉത്പാദിപ്പിക്കുന്ന സൗരോർജ്ജം (സോളാർ പവർ) സംഭരിച്ചുവെച്ച് രാത്രിയിലെ പീക്ക് സമയങ്ങളിൽ ഉപയോഗിക്കാനുള്ള സാങ്കേതിക സൗകര്യങ്ങളും സംവിധാനങ്ങളും സമയബന്ധിതമായി ഒരുക്കാത്തതാണ് നിലവിലെ പ്രതിസന്ധിക്ക് പ്രധാന കാരണം. ഭാവി മുന്നിൽക്കണ്ടുള്ള ആസൂത്രണം നടപ്പാക്കുന്നതിൽ വന്ന അപാകതകളാണ് ഇന്ന് കാണുന്ന തരത്തിലുള്ള വൈദ്യുതി പ്രതിസന്ധിയിലേക്ക് കാര്യങ്ങളെ എത്തിച്ചത്.

കൃത്രിമമായി വൈദ്യുതി ക്ഷാമം സൃഷ്ടിച്ച് കെഎസ്ഇബിയെ തകർക്കാനും വൈദ്യുതി മേഖലയെ സ്വകാര്യ കുത്തകകൾക്ക് കൈമാറാനുമാണ് നീക്കങ്ങൾ നടക്കുന്നതെന്ന പ്രതിപക്ഷ നേതാവിന്റെ ആരോപണങ്ങളുടെ പശ്ചാത്തലത്തിലാണ് മുൻ കെഎസ്ഇബി ചെയർമാന്റെ ഈ പ്രതികരണം. നിലവിലെ പ്രതിസന്ധിയിൽ രാഷ്ട്രീയ വിവാദങ്ങൾ കൊഴുക്കുമ്പോൾ, ഉദ്യോഗസ്ഥരെ മറയാക്കി തെറ്റുകൾ മൂടിവെക്കാനുള്ള നീക്കം അംഗീകരിക്കാനാവില്ലെന്ന നിലപാടിലാണ് ബി. അശോക്. ദീർഘകാല കരാർ റദ്ദാക്കലിൽ ഉദ്യോഗസ്ഥതലത്തിൽ പിഴവില്ലെന്ന് മുൻ ചെയർമാൻ തന്നെ പരസ്യമായി വ്യക്തമാക്കിയതോടെ വൈദ്യുതി ബോർഡിലെ നയപരമായ തീരുമാനങ്ങൾ വീണ്ടും വലിയ രാഷ്ട്രീയ ചർച്ചകൾക്ക് വഴിതുറന്നിരിക്കുകയാണ്.

---------------

Hindusthan Samachar / Roshith K