Thiruvananthapuram , 13 സെപ്റ്റംബര് (H.S.)

തിരുവനന്തപുരം: പരീക്ഷാ തട്ടിപ്പുമായി ബന്ധപ്പെട്ട അന്വേഷണത്തിൽ ക്രൈംബ്രാഞ്ചും പബ്ലിക് സർവീസ് കമ്മീഷനും (പിഎസ്സി) തമ്മിലുള്ള ഏറ്റുമുട്ടൽ പുതിയ തലത്തിലേക്ക്. ചോദ്യം ചെയ്യലിനായി ക്രൈംബ്രാഞ്ച് ആസ്ഥാനത്തേക്ക് എത്തില്ലെന്ന് കാട്ടി പിഎസ്സി അധികൃതർ നൽകിയ കത്ത് അന്വേഷണ സംഘം പൂർണമായി തള്ളി. ഭരണഘടനാ സ്ഥാപനമെന്ന നിലയിൽ പ്രത്യേക ആനുകൂല്യം അവകാശപ്പെടാനാകില്ലെന്നും കുറ്റകൃത്യങ്ങളുടെ അന്വേഷണ പരിധിയിൽ പിഎസ്സി അംഗങ്ങൾക്ക് പ്രത്യേക നിയമ പരിരക്ഷ ലഭ്യമല്ലെന്നും വ്യക്തമാക്കിക്കൊണ്ട് ഐജി അജിതാ ബീഗം പിഎസ്സിക്ക് മറുപടി കത്ത് നൽകി.

പരീക്ഷാ ക്രമക്കേടുമായി ബന്ധപ്പെട്ട കേസിൽ കൂടുതൽ വിവരങ്ങൾ ശേഖരിക്കുന്നതിനും വ്യക്തത വരുത്തുന്നതിനുമായി പിഎസ്സി അംഗങ്ങളോട് ചോദ്യം ചെയ്യലിന് നേരിട്ട് ഹാജരാകാൻ ക്രൈംബ്രാഞ്ച് നേരത്തെ നോട്ടീസ് അയച്ചിരുന്നു. എന്നാൽ, തങ്ങൾ ഭരണഘടനാ പദവിയിലുള്ളവരാണെന്നും പൊലീസ് അല്ലെങ്കിൽ ക്രൈംബ്രാഞ്ച് ആസ്ഥാനത്ത് നേരിട്ടെത്തി മൊഴി നൽകുന്നത് സ്ഥാപനത്തിന്റെ അന്തസ്സിന് ചേർന്നതല്ലെന്നും ചൂണ്ടിക്കാട്ടിയാണ് പിഎസ്സി കത്ത് നൽകിയത്. ആവശ്യമെങ്കിൽ ഉദ്യോഗസ്ഥർക്ക് പിഎസ്സി ആസ്ഥാനത്ത് നേരിട്ടെത്തി വിവരങ്ങൾ തേടാമെന്ന നിലപാടാണ് കമ്മീഷൻ സ്വീകരിച്ചത്.

എന്നാൽ ഈ നിലപാട് തള്ളിക്കൊണ്ടാണ് ക്രൈംബ്രാഞ്ച് കർശന നിലപാടിലേക്ക് കടന്നത്. കുറ്റകൃത്യങ്ങൾ അന്വേഷിക്കുന്ന ഉദ്യോഗസ്ഥർക്ക് മുന്നിൽ ആർക്കും പ്രത്യേക സ്ഥാനമാനങ്ങളുടെ പേരിൽ ഇളവുകൾ അനുവദിക്കാനാകില്ലെന്ന് ഐജി നൽകിയ മറുപടിയിൽ അസന്ദിഗ്ധമായി വ്യക്തമാക്കുന്നു. നിയമത്തിന് മുന്നിൽ എല്ലാവരും തുല്യരാണെന്നിരിക്കെ, പ്രത്യേക പ്രിവിലേജ് ഉയർത്തിക്കാട്ടി അന്വേഷണത്തോട് സഹകരിക്കാതിരിക്കുന്നത് അംഗീകരിക്കാനാവില്ലെന്നാണ് അന്വേഷണ സംഘത്തിന്റെ വിലയിരുത്തൽ. അന്വേഷണ ഏജൻസി നിശ്ചയിച്ച സ്ഥലത്ത് ഹാജരായി കൃത്യമായ വിശദീകരണം നൽകാൻ കമ്മീഷൻ അംഗങ്ങൾ ബാധ്യസ്ഥരാണെന്ന് കത്തിൽ ഓർമിപ്പിക്കുന്നു.

ക്രൈംബ്രാഞ്ചിന്റെ കടുത്ത മറുപടിയോടെ പ്രതിരോധത്തിലായ പിഎസ്സി വിഷയം ഗൗരവത്തോടെയാണ് കാണുന്നത്. ക്രൈംബ്രാഞ്ച് ആസ്ഥാനത്ത് നേരിട്ടെത്തി ചോദ്യം ചെയ്യലിന് വിധേയരാകണമോ അതോ തങ്ങളുടെ നിലപാടിൽ ഉറച്ചുനിൽക്കണമോ എന്ന കാര്യത്തിൽ കമ്മീഷൻ വിശദമായ നിയമോപദേശം തേടിയിട്ടുണ്ട്. ഹൈക്കോടതിയിലെ മുതിർന്ന അഭിഭാഷകരിൽ നിന്നും കമ്മീഷന്റെ നിയമോപദേശകരിൽ നിന്നും ലഭിക്കുന്ന നിർദേശങ്ങളുടെ അടിസ്ഥാനത്തിൽ നാളെ ചേരുന്ന പിഎസ്സി യോഗത്തിൽ അന്തിമ തീരുമാനമെടുക്കും. ഉദ്യോഗാർഥികൾക്കിടയിൽ വലിയ കോളിളക്കം സൃഷ്ടിച്ച പരീക്ഷാ ക്രമക്കേട് കേസിൽ അന്വേഷണം പിഎസ്സി ഉന്നതരിലേക്ക് നീളുന്നതും ഇരുവിഭാഗങ്ങളും തമ്മിലുള്ള നിയമപോരാട്ടത്തിലേക്ക് കാര്യങ്ങൾ നീങ്ങുന്നതും വരും ദിവസങ്ങളിൽ സംസ്ഥാനത്ത് കൂടുതൽ ശ്രദ്ധേയമായ തുടർനടപടികൾക്ക് വഴിവെക്കും.

---------------

Hindusthan Samachar / Roshith K