Kozhikode, 13 സെപ്റ്റംബര് (H.S.)

കോഴിക്കോട്: സിപിഐഎം വിപുലീകൃത സംസ്ഥാന സമിതി യോഗത്തെ സംബന്ധിച്ച് മാധ്യമങ്ങളിലൂടെയും രാഷ്ട്രീയ എതിരാളികളിലൂടെയും നടക്കുന്നത് തികച്ചും അടിസ്ഥാനരഹിതമായ കള്ളപ്രചാരണങ്ങളാണെന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ. കോഴിക്കോട് നടക്കുന്ന വിപുലീകൃത സംസ്ഥാന സമിതി യോഗത്തിന്റെ ഭാഗമായി തയ്യാറാക്കിയ പ്രവർത്തന മാർഗരേഖ അവതരണം പൂർത്തിയായതായും അദ്ദേഹം വ്യക്തമാക്കി. സംഘടനാപരമായ പോരായ്മകളും ദൗർബല്യങ്ങളും തുറന്നു പരിശോധിക്കുകയും അവ കൃത്യമായി തിരുത്തി മുന്നോട്ടുപോവുകയും ചെയ്യുമെന്നും അദ്ദേഹം വാർത്താ സമ്മേളനത്തിൽ ഉറപ്പിച്ചു പറഞ്ഞു.

പാർട്ടി ഘടകങ്ങളെ അടിമുടി സജ്ജമാക്കാനും തെറ്റുതിരുത്തൽ പ്രക്രിയ ശക്തമാക്കാനുമാണ് യോഗം ഊന്നൽ നൽകുന്നത്. ഉൾപ്പാർട്ടി ജനാധിപത്യത്തിന്റെ അന്തസ്സത്ത പൂർണ്ണമായും ഉൾക്കൊണ്ട് ഗൗരവമേറിയ സ്വയംവിമർശനമാണ് സമിതിയിൽ നടക്കുന്നത്. എന്നാൽ, വസ്തുതകൾ ഇതായിരിക്കെ, പാർട്ടിക്കുള്ളിൽ കടുത്ത ഭിന്നതയാണെന്ന മട്ടിൽ വ്യാജവാർത്തകൾ ചമച്ച് ജനങ്ങളെ തെറ്റിദ്ധരിപ്പിക്കാനാണ് ബോധപൂർവമായ ശ്രമം നടക്കുന്നത്. ഇത്തരം അജണ്ടകളെ പാർട്ടി അർഹിക്കുന്ന അവജ്ഞയോടെ തള്ളിക്കളയുകയാണെന്ന് അദ്ദേഹം വ്യക്തമാക്കി.

കേരളത്തിന്റെ സവിശേഷമായ രാഷ്ട്രീയ-സാമൂഹിക മണ്ഡലത്തിൽ നിന്ന് ഇടതുപക്ഷ പ്രസ്ഥാനത്തെ തകർക്കാനുള്ള ഗൂഢശ്രമങ്ങൾ വളരെക്കാലമായി സജീവമാണ്. സംസ്ഥാനത്ത് ഇടതുപക്ഷത്തിന് ലഭിക്കുന്ന ജനപിന്തുണയെ ഇല്ലാതാക്കി, വർഗീയതയ്ക്കും വലതുപക്ഷ രാഷ്ട്രീയ ആശയങ്ങൾക്കും ഇടം നൽകാനുള്ള ആസൂത്രിതമായ നീക്കങ്ങളാണ് ഇതിന് പിന്നിൽ. വർഗീയ ശക്തികളുമായി സന്ധി ചെയ്തും വികസന വിരുദ്ധ നയങ്ങൾ പ്രചരിപ്പിച്ചും ഇടതുപക്ഷത്തെ ദുർബലപ്പെടുത്താൻ നോക്കുന്നവർക്ക് രാഷ്ട്രീയ കേരളം തക്കതായ മറുപടി നൽകും. വർഗീയതയ്ക്കും ജനവിരുദ്ധ നയങ്ങൾക്കുമെതിരെ വിട്ടുവീഴ്ചയില്ലാത്ത പോരാട്ടം നയിക്കാൻ ഇടതുപക്ഷത്തിന് മാത്രമേ സാധിക്കൂ എന്ന് കേരളത്തിലെ ജനങ്ങൾക്ക് കൃത്യമായി അറിയാമെന്നും അദ്ദേഹം ഓർമ്മിപ്പിച്ചു.

ജനങ്ങളുമായുള്ള ബന്ധം കൂടുതൽ ദൃഢമാക്കുക എന്ന ലക്ഷ്യത്തോടെയാണ് മാർഗരേഖ ചർച്ചകൾ പൂർത്തിയാക്കിയത്. കേഡർമാരുടെയും ജനപ്രതിനിധികളുടെയും പ്രവർത്തന ശൈലി കൂടുതൽ ജനകീയമാക്കും. ജനങ്ങളുടെ ആവശ്യങ്ങളും പരാതികളും കേൾക്കാനും സർക്കാരിന്റെ ക്ഷേമപദ്ധതികൾ ഓരോ സാധാരണക്കാരനിലേക്കും എത്തിക്കാനും പാർട്ടി സംവിധാനം പൂർണ്ണ സജ്ജമാകും. തെറ്റുകൾ തിരുത്താനും ജനങ്ങളിലേക്ക് കൂടുതൽ ഇറങ്ങിച്ചെല്ലാനും പാർട്ടി ഒട്ടും മടിക്കില്ലെന്നും, കൂടുതൽ ജനകീയ അടിത്തറയോടെ പാർട്ടി മുന്നോട്ട് കുതിക്കുമെന്നും എം.വി. ഗോവിന്ദൻ കൂട്ടിച്ചേർത്തു.

---------------

Hindusthan Samachar / Roshith K