Thiruvananthapuram , 14 സെപ്റ്റംബര് (H.S.)

തിരുവനന്തപുരം: മുഖ്യമന്ത്രി വി.ഡി. സതീശൻ കെഎസ്ഇബി ജീവനക്കാർക്കൊപ്പം നൃത്തം ചെയ്യുന്ന രീതിയിൽ ആർട്ടിഫിഷ്യൽ ഇന്റലിജൻസ് (എഐ) സാങ്കേതികവിദ്യ ഉപയോഗിച്ച് നിർമ്മിച്ച വിഡിയോ സമൂഹമാധ്യമ പ്ലാറ്റ്ഫോമായ ഇൻസ്റ്റഗ്രാമിൽ നിന്നും നീക്കം ചെയ്ത് മാതൃകമ്പനിയായ മെറ്റ. ഇന്ത്യയിലെ നിലവിലെ നിയമങ്ങൾക്ക് വിരുദ്ധമാണ് ഉള്ളടക്കം എന്ന് ചൂണ്ടിക്കാട്ടിയാണ് രാജ്യത്തിനകത്ത് ഈ വിഡിയോ ലഭ്യമാകാത്ത വിധത്തിൽ മെറ്റ നിയന്ത്രണം ഏർപ്പെടുത്തിയത്.

വിഡിയോ നിർമ്മിച്ച് ഇൻസ്റ്റഗ്രാമിൽ പങ്കുവെച്ച 'എഐ കവല' എന്ന പ്രൊഫൈൽ തന്നെയാണ് നടപടിയെക്കുറിച്ചുള്ള വിവരം ഇൻസ്റ്റഗ്രാം സ്റ്റോറിയിലൂടെ പരസ്യപ്പെടുത്തിയത്. 'റീച്ച് യു' എന്ന ഡിജിറ്റൽ മാർക്കറ്റിംഗ് കമ്പനിയാണ് നൂതന എഐ സാങ്കേതികവിദ്യ ഉപയോഗിച്ച് ഈ ദൃശ്യങ്ങൾ തയ്യാറാക്കിയത്. വളരെ ചുരുങ്ങിയ സമയം കൊണ്ട് തന്നെ ഇൻസ്റ്റഗ്രാമിൽ ഈ ഉള്ളടക്കം വൻതോതിൽ വൈറലാവുകയും 1.78 കോടിയോളം (17.8 മില്യൺ) കാഴ്ചക്കാരെ സ്വന്തമാക്കുകയും ചെയ്തിരുന്നു. വിവിധ സമൂഹമാധ്യമ പ്ലാറ്റ്ഫോമുകളിൽ ഉപയോക്താക്കൾ വ്യാപകമായി പങ്കുവെച്ചതോടെ വലിയ രീതിയിലുള്ള പൊതുചർച്ചകൾക്കും ഈ വിഡിയോ തുടക്കമിട്ടു.

നിലവിൽ ഇന്ത്യയിലുള്ള ഉപയോക്താക്കൾക്ക് ഈ അക്കൗണ്ടിലൂടെ വിഡിയോ കാണാൻ സാധിക്കില്ലെങ്കിലും, വിദേശരാജ്യങ്ങളിൽ നിന്നുള്ളവർക്ക് ഇത് തുടർന്നും ലഭ്യമാണെന്ന് അക്കൗണ്ട് ഉടമകൾ വ്യക്തമാക്കി. രാജ്യത്തെ നിയമപരമായ മാനദണ്ഡങ്ങൾ മുൻനിർത്തിയാണ് ഇന്ത്യയിലെ ഐപി വിലാസങ്ങളിൽ ഈ വിഡിയോ തടഞ്ഞിരിക്കുന്നത്. മെറ്റയുടെ നടപടിയോടെ വിഡിയോയുടെ ലിങ്കിൽ പ്രവേശിക്കാൻ ശ്രമിക്കുന്നവർക്ക് ഉള്ളടക്കം ലഭ്യമല്ലെന്ന സന്ദേശമാണ് കാണിക്കുന്നത്.

ഉയർന്ന സാങ്കേതിക വിദ്യ ഉപയോഗിച്ച് നിർമ്മിക്കുന്ന ഡീപ്ഫേക്ക്, എഐ ജനറേറ്റഡ് ഉള്ളടക്കങ്ങൾ സോഷ്യൽ മീഡിയയിൽ വ്യാപകമാകുന്ന പശ്ചാത്തലത്തിൽ, പ്ലാറ്റ്ഫോമുകൾ നിയമപരമായ നിയന്ത്രണങ്ങൾ കർശനമാക്കുന്നതിന്റെ ഭാഗമായാണ് ഈ നടപടിയെന്നാണ് വിലയിരുത്തൽ. പ്രമുഖ വ്യക്തികളുടെ എഐ ചിത്രീകരണങ്ങളും ഡീപ്ഫേക്ക് ഉള്ളടക്കങ്ങളും നിയന്ത്രിക്കാൻ കടുത്ത മാനദണ്ഡങ്ങളാണ് അധികൃതർ നടപ്പാക്കിവരുന്നത്. ചുരുങ്ങിയ സമയം കൊണ്ട് റെക്കോർഡ് കാഴ്ചക്കാരെ നേടിയ ഒരു രാഷ്ട്രീയ ആക്ഷേപഹാസ്യ വിഡിയോയ്ക്ക് നേരെ സമൂഹമാധ്യമ ഭീമൻ കൈക്കൊണ്ട നടപടി ഡിജിറ്റൽ ഇടങ്ങളിൽ വലിയ ചർച്ചകൾക്കാണ് വഴിതുറന്നിരിക്കുന്നത്.

---------------

Hindusthan Samachar / Roshith K