Enter your Email Address to subscribe to our newsletters
New delhi, 17 സെപ്റ്റംബര് (H.S.)
മണിപ്പൂരിലെ ദുരിതാശ്വാസ ക്യാമ്പുകളില് അസ്വാഭാവിക മരണങ്ങളില് സുപ്രീം കോടതിയുടെ ഇടപെടല്. 2023-ലെ വംശീയ സംഘര്ഷത്തെത്തുടര്ന്ന് പലായനം ചെയ്യേണ്ടി വന്നവരില് മരണപ്പെട്ടവരെക്കുറിച്ചുള്ള വിശദമായ റിപ്പോര്ട്ട് സമര്പ്പിക്കാന് സംസ്ഥാന ചീഫ് സെക്രട്ടറിയോട് കോടതി നിര്ദേശിച്ചു. ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മാല്യ ബാഗ്ചി, വി. മോഹന എന്നിവരടങ്ങുന്ന ബെഞ്ചാണ് വിഷയം പരിഗണിച്ചത്.
ദുരിതാശ്വാസ ക്യാമ്പുകളില് സംഭവിച്ച മരണങ്ങളെക്കുറിച്ചും പ്രത്യേകിച്ച് അസ്വാഭാവിക മരണങ്ങളെക്കുറിച്ചുമുള്ള വിശദാംശങ്ങള് ഉള്ക്കൊള്ളുന്ന സത്യവാങ്മൂലം സമര്പ്പിക്കാന് മണിപ്പൂര് ചീഫ് സെക്രട്ടറിയോട് ബെഞ്ച് നിര്ദ്ദേശിച്ചു. ആകെ 34 മരണങ്ങള് സംഭവിച്ചിട്ടും എന്തുകൊണ്ട് 20 കേസുകളില് മാത്രം പോസ്റ്റ്മോര്ട്ടം നടത്തി എന്നതിനെക്കുറിച്ച് വിശദീകരണം നല്കാനും സുപ്രീം കോടതി സംസ്ഥാനത്തോട് ആവശ്യപ്പെട്ടു.
അസ്വാഭാവിക മരണങ്ങളുമായി ബന്ധപ്പെട്ട പോസ്റ്റ്മോര്ട്ടം റിപ്പോര്ട്ടുകളുടെ മരണ കാരണങ്ങള് വിശദീകരിക്കാനും ബെഞ്ച് നിര്ദ്ദേശിച്ചു. ദുരിതാശ്വാസ ക്യാമ്പുകളില് കഴിയുന്നതിനിടെ അസ്വാഭാവികമായി മരണപ്പെട്ടവരുടെ ബന്ധുക്കള്ക്ക് എന്തുകൊണ്ട് 20,000 മുതല് 30,000 രൂപ വരെ മാത്രം നല്കിയെന്നതിലും മണിപ്പൂര് സര്ക്കാരിനോട് കോടതി വിശദാംശങ്ങള് തേടി. ഈ വിഷയം അടിയന്തരമായി ഏറ്റെടുക്കാനും അസ്വാഭാവിക മരണങ്ങളുമായി ബന്ധപ്പെട്ട എല്ലാ കേസുകളിലും എഫ്ഐആര് (FIR) രജിസ്റ്റര് ചെയ്യുന്നുണ്ടെന്ന് ഉറപ്പാക്കാനും മണിപ്പൂര് ലീഗല് സര്വീസസ് അതോറിറ്റിയോട് ബെഞ്ച് നിര്ദ്ദേശിച്ചു.
മരണകാരണം കൃത്യമായി കണ്ടെത്തുക. ദുരിതാശ്വാസ ക്യാമ്പുകളില് നിന്ന് കുടിയൊഴിപ്പിക്കപ്പെട്ടവരുടെയോ മറ്റ് ദുര്ബല വിഭാഗത്തില്പ്പെട്ട ഇരകളുടെയോ സുരക്ഷയും അന്തസ്സും ഉറപ്പാക്കാന് ആവശ്യമായ നടപടികള് സ്വീകരിക്കണമെന്നും ഇതിനകം രജിസ്റ്റര് ചെയ്ത എഫ്ഐആറുകളില് വേഗത്തിലുള്ള അന്വേഷണം നടത്തണമെന്നും ബെഞ്ച് വ്യക്തമാക്കി.
എട്ട് ജില്ലകളിലായി ദുരിതാശ്വാസ ക്യാമ്പുകളില് 600-ലധികം മരണങ്ങള് സംഭവിച്ചതായി രേഖപ്പെടുത്തിയ റിപ്പോര്ട്ടിനെ കുറിച്ചും കോടതി പരാമര്ശിച്ചു. 2023-ലെ മണിപ്പൂര് വംശീയ സംഘര്ഷവുമായി ബന്ധപ്പെട്ട ലൈംഗിക അതിക്രമ കേസുകളുടെ അന്വേഷണവും വിചാരണയും സംബന്ധിച്ച ഹര്ജികള് പരിഗണിക്കുകയായിരുന്നു ബെഞ്ച്.
---------------
Hindusthan Samachar / Sreejith S
