Mumbai, 18 സെപ്റ്റംബര് (H.S.)

മുംബൈ: പ്രമുഖ ഇന്ത്യൻ വ്യവസായ ഗ്രൂപ്പായ ടാറ്റ സൺസിന്റെ ചെയർമാനായി എൻ. ചന്ദ്രശേഖരനെ അഞ്ച് വർഷത്തേക്ക് കൂടി വീണ്ടും നിയമിച്ചു. മുംബൈയിൽ ചേർന്ന ടാറ്റ സൺസ് ഡയറക്ടർ ബോർഡ് യോഗത്തിലാണ് നിർണായക തീരുമാനം ഉണ്ടായത്. ഇതോടെ ടാറ്റ ഗ്രൂപ്പിന്റെ അമരത്ത് ചന്ദ്രശേഖരന്റെ നേതൃത്വം അടുത്ത അഞ്ച് വർഷത്തേക്ക് കൂടി തുടരുമെന്ന് ഉറപ്പായി.

പിന്മാറ്റ പ്രഖ്യാപനത്തിന് ശേഷമുള്ള നിർണായക വഴിത്തിരിവ്

നിലവിലെ കാലാവധി പൂർത്തിയാകുന്നതോടെ മൂന്നാമതൊരു ഊഴത്തിനില്ലെന്ന് ചന്ദ്രശേഖരൻ ഓഗസ്റ്റ് 12-ന് ബോർഡിനെ അറിയിച്ചിരുന്നു. എന്നാൽ, പിന്നീട് റിസർവ് ബാങ്ക് ഓഫ് ഇന്ത്യയിൽ (ആർബിഐ) നിന്നുണ്ടായ നിർണായക തീരുമാനങ്ങളുടെയും പുതിയ റെഗുലേറ്ററി സാഹചര്യങ്ങളുടെയും പശ്ചാത്തലത്തിൽ, മുൻതീരുമാനം പുനഃപരിശോധിക്കാൻ ടാറ്റ സൺസിന്റെ നോമിനേഷൻ ആൻഡ് റെമ്യൂണറേഷൻ കമ്മിറ്റി 63-കാരനായ ചന്ദ്രശേഖരനോട് ഔദ്യോഗികമായി ആവശ്യപ്പെടുകയായിരുന്നു.

2017-ലാണ് സൈറസ് മിസ്ത്രിക്ക് പിന്നാലെ രത്തൻ ടാറ്റയിൽ നിന്ന് എൻ. ചന്ദ്രശേഖരൻ ടാറ്റ സൺസിന്റെ സാരഥ്യം ഏറ്റെടുക്കുന്നത്. തുടർന്ന് 2022-ൽ രണ്ടാമതും അഞ്ച് വർഷത്തേക്ക് അദ്ദേഹത്തെ നിയമിച്ചു. ചന്ദ്രശേഖരന്റെ പകരക്കാരനെ കണ്ടെത്താനായി ടാറ്റ സ്റ്റീൽ സിഇഒ ടി.വി. നരേന്ദ്രൻ, ടാറ്റ സൺസ് സിഎഫ്ഒ സൗരഭ് അഗർവാൾ, എൻഎസ്ഇ സിഇഒ ആശിഷ് ചൗഹാൻ തുടങ്ങിയ പ്രമുഖരെ പരിഗണിച്ചിരുന്നുവെങ്കിലും ഒടുവിൽ ചന്ദ്രശേഖരൻ തന്നെ പദവിയിൽ തുടരണമെന്ന നിലപാടിലേക്ക് ബോർഡ് എത്തുകയായിരുന്നു.

ബോർഡിൽ വിയോജിപ്പറിയിച്ച് നോയൽ ടാറ്റ

ഡയറക്ടർ ബോർഡ് യോഗത്തിൽ ചന്ദ്രശേഖരന്റെ പുനർനിയമന പ്രമേയത്തെ എതിർത്ത് വോട്ട് ചെയ്ത ഏക ഡയറക്ടർ ടാറ്റ ട്രസ്റ്റ് ചെയർമാനായ നോയൽ ടാറ്റയായിരുന്നു. ടാറ്റ സൺസിനെ ഓഹരി വിപണിയിൽ ലിസ്റ്റ് ചെയ്യുന്നതുമായി ബന്ധപ്പെട്ട വിഷയങ്ങളിലും നഷ്ടത്തിൽ പ്രവർത്തിക്കുന്ന എയർ ഇന്ത്യ, ടാറ്റ ഡിജിറ്റൽ, ബിഗ്ബാസ്കറ്റ് തുടങ്ങിയ സംരംഭങ്ങളിലേക്ക് മൂലധനം വകയിരുത്തുന്നതിലും നോയൽ ടാറ്റയ്ക്ക് നേരത്തെ തന്നെ വിയോജിപ്പുകളുണ്ടായിരുന്നു. എന്നാൽ, ടാറ്റ സൺസിൽ 18 ശതമാനത്തോളം ഓഹരി പങ്കാളിത്തമുള്ള ഷാപൂർജി പല്ലോൻജി ഗ്രൂപ്പ് ഉൾപ്പെടെ ലിസ്റ്റിംഗിനെ അനുകൂലിക്കുന്ന നിലപാടാണ് സ്വീകരിച്ചിട്ടുള്ളത്.

ടാറ്റ സൺസ് ഓഹരി വിപണിയിൽ പ്രവേശിക്കുകയാണെങ്കിൽ രാജ്യത്തെ ഏറ്റവും വലിയ പ്രാരംഭ ഓഹരി വിൽപ്പനകളിൽ (IPO) ഒന്നായി അത് മാറും. സ്റ്റീൽ, ഓട്ടോമൊബൈൽ, ഐടി, വ്യോമയാനം, ഹോസ്പിറ്റാലിറ്റി തുടങ്ങി ഒട്ടേറെ മേഖലകളിലെ വൻകിട കമ്പനികൾ ഉൾപ്പെടുന്ന ടാറ്റ ഗ്രൂപ്പിനെ കൂടുതൽ വളർച്ചയിലേക്ക് നയിക്കുകയെന്ന വലിയ ദൗത്യമാണ് ചന്ദ്രശേഖരനെ കാത്തിരിക്കുന്നത്.

---------------

Hindusthan Samachar / Roshith K