Thiruvananthapuram, 18 സെപ്റ്റംബര് (H.S.)

തിരുവനന്തപുരം: സംസ്ഥാന സർക്കാരിന്റെ ആവശ്യങ്ങൾക്കായി പോലീസ് സേന വാടകയ്ക്കെടുത്ത ഹെലികോപ്റ്ററിന്റെ നിലവിലെ കരാർ കാലാവധി നാളെ അവസാനിക്കും. കരാർ കാലാവധി തീരാനിരിക്കെ, നിലവിലുള്ള അതേ വാടക നിരക്കിൽ രണ്ട് വർഷത്തേക്ക് കൂടി സർവീസ് നീട്ടിനൽകണമെന്ന് ആവശ്യപ്പെട്ട് സംസ്ഥാന പോലീസ് മേധാവി (ഡി.ജി.പി) സർക്കാരിന് വീണ്ടും ശുപാർശ നൽകി.

ഹെലികോപ്റ്ററിന്റെ സേവനം തുടർന്നും ലഭ്യമാക്കേണ്ടതിന്റെ ആവശ്യകത ചൂണ്ടിക്കാട്ടിയാണ് ഡിജിപി ആഭ്യന്തര വകുപ്പിന് ഔദ്യോഗികമായി കത്ത് കൈമാറിയത്. നിലവിലെ വാടക വ്യവസ്ഥകളിൽ മാറ്റമില്ലാതെ തുടരാൻ സേവനദാതാക്കൾ സന്നദ്ധത പ്രകടിപ്പിച്ചിട്ടുണ്ടെന്നാണ് ശുപാർശയിൽ വ്യക്തമാക്കുന്നത്. വിഷയത്തിൽ മുഖ്യമന്ത്രി ഇന്നോ നാളെയോ അന്തിമതീരുമാനമെടുത്തേക്കും.

സുരക്ഷയും നിരീക്ഷണവും മുൻനിർത്തി ഡിജിപിയുടെ നീക്കം

മാവോയിസ്റ്റ് സാന്നിധ്യമുള്ള വനമേഖലകളിലെ ആകാശനിരീക്ഷണം, അടിയന്തര രക്ഷാപ്രവർത്തനങ്ങൾ, ദുരന്തനിവാരണ പ്രവർത്തനങ്ങൾ, പ്രകൃതിക്ഷോഭ ഘട്ടങ്ങളിലെ നിരീക്ഷണം, അടിയന്തര സാഹചര്യങ്ങളിലെ വിവിഐപി സുരക്ഷ എന്നിവ മുൻനിർത്തി ഹെലികോപ്റ്ററിന്റെ സാന്നിധ്യം അനിവാര്യമാണെന്നാണ് പോലീസ് നിലപാട്. പുതിയ ടെൻഡർ നടപടികളിലേക്ക് കടന്നാൽ നിരക്ക് വർധിക്കാൻ സാധ്യതയുണ്ടെന്നും നിലവിലെ നിരക്കിൽ കരാർ പുതുക്കുന്നത് സർക്കാരിന് കൂടുതൽ പ്രയോജനകരമാകുമെന്നും ശുപാർശയിൽ ചൂണ്ടിക്കാണിക്കുന്നു.

തീരുമാനം മുഖ്യമന്ത്രിയുടെ പരിഗണനയിൽ

ഡിജിപിയുടെ കത്ത് ലഭിച്ചതിനെ തുടർന്ന് ആഭ്യന്തര വകുപ്പ് വിഷയം മുഖ്യമന്ത്രിയുടെ പരിഗണനയ്ക്ക് വിട്ടിരിക്കുകയാണ്. സംസ്ഥാനം നേരിടുന്ന കടുത്ത സാമ്പത്തിക പ്രതിസന്ധിയും ഹെലികോപ്റ്റർ വാടകയിനത്തിൽ മാസംതോറും ചെലവഴിക്കേണ്ടി വരുന്ന വൻതുകയും മുൻനിർത്തി ധനവകുപ്പിന്റെ നിലപാടും നിർണായകമാകും. വലിയ സാമ്പത്തിക ബാധ്യത വരുത്തിവെക്കുന്ന ഇടപാടെന്ന നിലയിൽ മുൻപും ഹെലികോപ്റ്റർ വാടകക്കെടുത്ത വിഷയം വലിയ ചർച്ചകൾക്ക് വഴിവെച്ചിരുന്നു.

കരാർ പുതുക്കി നൽകുന്നതുമായി ബന്ധപ്പെട്ട ഫയലിൽ ഇന്നോ നാളെയോ മുഖ്യമന്ത്രി ഒപ്പുവെച്ചേക്കുമെന്നാണ് ഉന്നതതല വൃത്തങ്ങൾ നൽകുന്ന സൂചന. നാളെയോടെ നിലവിലെ കാലാവധി അവസാനിക്കുന്നതിനാൽ അതിവേഗത്തിലുള്ള നടപടികളാണ് ഇപ്പോൾ സെക്രട്ടേറിയറ്റ് തലത്തിൽ പുരോഗമിക്കുന്നത്. കരാർ നീട്ടുന്നതിൽ മുഖ്യമന്ത്രിയുടെ ഭാഗത്തുനിന്ന് അനുകൂല തീരുമാനമുണ്ടായാൽ മാത്രമേ വരുംദിവസങ്ങളിലും ഹെലികോപ്റ്റർ സേവനം തുടരാൻ സാധിക്കൂ.

സാമ്പത്തിക പ്രതിസന്ധിക്കിടെയുള്ള വൻ ചെലവ്കേരള സർക്കാർ 2020-ൽ പവൻ ഹാൻസിൽ നിന്ന് ഹെലികോപ്റ്റർ വാടകയ്ക്കെടുത്തിരുന്നു, ഇത് പിന്നീട് റദ്ദാക്കി. തുടർന്ന് 2023 സെപ്റ്റംബറോടെ ചിപ്സൺ ഏവിയേഷൻ എന്ന കമ്പനിയുമായി പുതിയ കരാറിൽ ഏർപ്പെട്ടു.

- ചെലവ്: ഈ കരാർ പ്രകാരം 25 മണിക്കൂർ പറക്കുന്നതിനായി പ്രതിമാസം 80 ലക്ഷം രൂപ നിശ്ചിത വാടകയായി സംസ്ഥാനം നൽകണം. ഈ പരിധി കഴിഞ്ഞാൽ ഓരോ അധിക മണിക്കൂറിനും 90,000 രൂപ വീതം അധികം നൽകണം.

- വിമർശനം: ക്ഷേമ പെൻഷനുകൾ വിതരണം ചെയ്യാനും, ആനുകൂല്യങ്ങളുടെ കുടിശ്ശിക തീർക്കാനും, പൊതുമേഖലാ ശമ്പളം നൽകാനും കടബാധ്യതകൾ കൈകാര്യം ചെയ്യാനും സംസ്ഥാനം ബുദ്ധിമുട്ടുന്ന സാഹചര്യത്തിൽ, ഇത്തരമൊരു ആഡംബരം അനാവശ്യമാണെന്ന് പ്രതിപക്ഷ കക്ഷികളും വിമർശകരും ചൂണ്ടിക്കാണിക്കുന്നു.

---------------

Hindusthan Samachar / Roshith K