newdelhi, 19 സെപ്റ്റംബര് (H.S.)

ന്യൂഡൽഹി: രാജ്യത്തെ പ്രമുഖ കാമ്പസുകളിലൊന്നായ ഡൽഹി യൂണിവേഴ്സിറ്റി സ്റ്റുഡന്റ്സ് യൂണിയൻ (DUSU) തിരഞ്ഞെടുപ്പിൽ അഖില ഭാരതീയ വിദ്യാർത്ഥി പരിഷത്തിന് (എബിവിപി) മികച്ച വിജയം. വാശിയേറിയ പോരാട്ടത്തിനൊടുവിൽ പ്രസിഡന്റ്, സെക്രട്ടറി, ജോയിന്റ് സെക്രട്ടറി എന്നീ മൂന്ന് പ്രധാന പദവികൾ എബിവിപി സ്വന്തമാക്കി. വൈസ് പ്രസിഡന്റ് സ്ഥാനത്തേക്ക് അട്ടിമറി വിജയം നേടി സ്വതന്ത്ര സ്ഥാനാർത്ഥി ദീപാങ്ഷു ഷോകീൻ തെരഞ്ഞെടുക്കപ്പെട്ടു. അതേസമയം, കോൺഗ്രസിന്റെ വിദ്യാർത്ഥി സംഘടനയായ നാഷണൽ സ്റ്റുഡന്റ്സ് യൂണിയൻ ഓഫ് ഇന്ത്യക്ക് (എൻഎസ്യുഐ) ഒരു സീറ്റിൽ പോലും വിജയിക്കാനാകാതെ കനത്ത തിരിച്ചടിയാണ് നേരിട്ടത്.

തിരഞ്ഞെടുപ്പ് ഫലങ്ങൾ ഒറ്റനോട്ടത്തിൽ

-

പ്രസിഡന്റ്: എബിവിപിയുടെ യഷ് ദബാസ് വിജയിച്ചു (22,434 വോട്ടുകൾ). എൻഎസ്യുഐയുടെ വിജയ് മീണ (21,390 വോട്ടുകൾ) രണ്ടാമതെത്തി.

-

വൈസ് പ്രസിഡന്റ്: സ്വതന്ത്ര സ്ഥാനാർത്ഥി ദീപാങ്ഷു ഷോകീൻ റെക്കോർഡ് ഭൂരിപക്ഷത്തിൽ വിജയിച്ചു (28,873 വോട്ടുകൾ). എബിവിപിയുടെ ഇഷു മൗര്യ (15,346 വോട്ടുകൾ), എൻഎസ്യുഐയുടെ വീർ ചത്രത് (4,010 വോട്ടുകൾ) എന്നിവർ പിന്നിലായി.

-

സെക്രട്ടറി: എബിവിപിയുടെ റിയ ഛാവ്ഡി വിജയം ഉറപ്പിച്ചു (19,846 വോട്ടുകൾ). എൻഎസ്യുഐ സ്ഥാനാർത്ഥി നമ്രത ചൗധരിക്ക് 13,963 വോട്ടുകളാണ് ലഭിച്ചത്.

-

ജോയിന്റ് സെക്രട്ടറി: എബിവിപിയുടെ ലക്ഷ്യ രാജ് സിംഗ് വിജയിച്ചു (14,965 വോട്ടുകൾ). സ്വതന്ത്ര സ്ഥാനാർത്ഥി വിശേഷ് യാദവ് (14,836 വോട്ടുകൾ), എൻഎസ്യുഐയുടെ ഗോപാൽ ചൗധരി (14,482 വോട്ടുകൾ) എന്നിവർ കടുത്ത മത്സരമാണ് ഇവിടെ കാഴ്ചവെച്ചത്.

പോളിംഗും വോട്ടെണ്ണലും

ഇത്തവണത്തെ ഡൽഹി യൂണിവേഴ്സിറ്റി യൂണിയൻ തിരഞ്ഞെടുപ്പിൽ ആകെ 40.46 ശതമാനം പോളിംഗാണ് രേഖപ്പെടുത്തിയത്. പ്രസിഡന്റ് സ്ഥാനത്തേക്ക് എബിവിപിയും എൻഎസ്യുഐയും തമ്മിൽ ഇഞ്ചോടിഞ്ച് പോരാട്ടമാണ് നടന്നത്. ആയിരത്തിലധികം വോട്ടുകളുടെ നേരിയ ഭൂരിപക്ഷത്തിലാണ് എബിവിപിയുടെ യഷ് ദബാസ് എൻഎസ്യുഐയുടെ വിജയ് മീണയെ പരാജയപ്പെടുത്തിയത്. ജോയിന്റ് സെക്രട്ടറി സ്ഥാനത്തും സ്വതന്ത്ര സ്ഥാനാർത്ഥിയുമായി കടുത്ത മത്സരത്തിനൊടുവിലാണ് എബിവിപി വിജയം പിടിച്ചെടുത്തത്.

വിജയാഹ്ലാദ പ്രകടനങ്ങൾക്ക് ഡൽഹി ഹൈക്കോടതിയുടെ വിലക്ക്

തിരഞ്ഞെടുപ്പ് പ്രചാരണത്തിനിടെ ക്യാമ്പസുകളിൽ ഉണ്ടായ അക്രമ സംഭവങ്ങളും പോസ്റ്ററുകൾ പതിച്ച് പൊതുമുതൽ നശിപ്പിച്ചതും കണക്കിലെടുത്ത് തിരഞ്ഞെടുപ്പ് ഫലപ്രഖ്യാപനത്തിന് ശേഷമുള്ള വിജയാഹ്ലാദ പ്രകടനങ്ങൾക്ക് ഡൽഹി ഹൈക്കോടതി കർശന വിലക്കേർപ്പെടുത്തി. ലിംഗ്ദോ കമ്മിറ്റി ശുപാർശകളും മുൻ ഉത്തരവുകളും ലംഘിച്ചതിന് വിദ്യാർത്ഥി സംഘടനകൾക്കെതിരെ എന്തുകൊണ്ട് പിഴ ചുമത്തിക്കൂടാ എന്ന് ചോദിച്ച് ഹൈക്കോടതി കാരണം കാണിക്കൽ നോട്ടീസ് അയച്ചു.

നിയമം കയ്യിലെടുക്കുന്നവർക്കെതിരെ വിദ്യാർത്ഥികളാണെന്ന പരിഗണനയില്ലാതെ കർശന നടപടിയെടുക്കാൻ ഡൽഹി പോലീസിന് കോടതി നിർദ്ദേശം നൽകി. ക്രമസമാധാന പാലനവും സർവകലാശാലാ ചട്ടങ്ങളും കർശനമായി നടപ്പിലാക്കുന്നുണ്ടെന്ന് പോലീസും സർവകലാശാല അധികൃതരും ഉറപ്പാക്കണമെന്നും കോടതി വ്യക്തമാക്കി.

കഴിഞ്ഞ വർഷത്തെ തിരഞ്ഞെടുപ്പിലും പ്രസിഡന്റ് ഉൾപ്പെടെ മൂന്ന് സീറ്റുകൾ എബിവിപി വിജയിച്ചപ്പോൾ, വൈസ് പ്രസിഡന്റ് സീറ്റിൽ എൻഎസ്യുഐ ആയിരുന്നു വിജയിച്ചിരുന്നത്. എന്നാൽ ഇത്തവണ വൈസ് പ്രസിഡന്റ് പദവി സ്വതന്ത്ര സ്ഥാനാർത്ഥി പിടിച്ചെടുത്തതോടെ എൻഎസ്യുഐ പൂർണ്ണമായും ചിത്രത്തിൽ നിന്ന് പുറത്തായി.

---------------

Hindusthan Samachar / Roshith K