Thiruvananthapuram , 19 സെപ്റ്റംബര് (H.S.)

തിരുവനന്തപുരം: അനധികൃത സ്വത്ത് സമ്പാദനക്കേസിൽ വിചാരണക്കോടതി നാല് വർഷത്തെ കഠിനതടവിന് ശിക്ഷിച്ച മുൻ ഡിജിപി ടോമിൻ ജെ. തച്ചങ്കരിയെ രൂക്ഷമായി പരിഹസിച്ച് മുൻ ഡിജിപിയും ബിജെപി കൗൺസിലറുമായ ആർ. ശ്രീലേഖ. പൂജപ്പുര സെൻട്രൽ ജയിലിലെ മെഡിക്കൽ സൗകര്യങ്ങളെ പരാമർശിച്ചുകൊണ്ടുള്ള ശ്രീലേഖയുടെ സോഷ്യൽ മീഡിയ കുറിപ്പാണ് ഇപ്പോൾ വലിയ ചർച്ചകൾക്ക് വഴിവെച്ചിരിക്കുന്നത്.

'സെല്ലുകളേക്കാൾ വൃത്തിയുള്ള ആശുപത്രി ബ്ലോക്ക്'

സെൻട്രൽ ജയിലിലെ സാധാരണ തടവുകാരുടെ സെല്ലുകളെ അപേക്ഷിച്ച് അവിടുത്തെ ആശുപത്രി ബ്ലോക്ക് വളരെ വൃത്തിയുള്ളതും മെച്ചപ്പെട്ടതുമാണെന്ന് ശ്രീലേഖ ചൂണ്ടിക്കാട്ടി. താൻ ജയിൽ ഡിജിപിയായി സേവനമനുഷ്ഠിച്ചിരുന്ന കാലയളവിലാണ് ഈ ആശുപത്രി വിഭാഗത്തിലെ സൗകര്യങ്ങൾ ആധുനികവത്കരിക്കുകയും നവീകരിക്കുകയും ചെയ്തത്. വർഷങ്ങൾക്ക് മുമ്പ് താൻ മുൻകൈയെടുത്ത് മെച്ചപ്പെടുത്തിയ ആ സൗകര്യങ്ങൾ ഇപ്പോൾ ആർക്കെങ്കിലും നല്ലതുപോലെ പ്രയോജനപ്പെടുന്നുണ്ടെങ്കിൽ അതിൽ സന്തോഷം മാത്രമേയുള്ളൂവെന്ന് അവർ പരിഹാസരൂപേണ ഫേസ്ബുക്കിൽ കുറിച്ചു.

ശിക്ഷാവിധിയെത്തുടർന്ന് ജയിലിലേക്ക് അയക്കപ്പെടുന്ന ഉന്നത ഉദ്യോഗസ്ഥരോ രാഷ്ട്രീയ നേതാക്കളോ പതിവായി ആരോഗ്യപ്രശ്നങ്ങൾ ചൂണ്ടിക്കാട്ടി ജയിൽ ആശുപത്രികളിലേക്ക് മാറുന്ന പ്രവണതയെ പരോക്ഷമായി കളിയാക്കുന്നതാണ് ശ്രീലേഖയുടെ ഈ പ്രതികരണം.

നീണ്ട നിയമപോരാട്ടത്തിനൊടുവിൽ ശിക്ഷ

സർവീസ് കാലയളവിൽ വരവിൽ കവിഞ്ഞ സ്വത്ത് സമ്പാദിച്ചുവെന്ന വിജിലൻസ് കേസിലാണ് മുൻ പോലീസ് മേധാവി കൂടിയായ ടോമിൻ തച്ചങ്കരിക്ക് പ്രത്യേക വിജിലൻസ് കോടതി നാല് വർഷത്തെ തടവുശിക്ഷയും പിഴയും വിധിച്ചത്. പതിറ്റാണ്ടുകൾ നീണ്ട അന്വേഷണത്തിനും നിയമനടപടികൾക്കും ഒടുവിലായിരുന്നു കോടതിയുടെ ഈ നിർണായക ഉത്തരവ്. അഴിമതി നിരോധന നിയമപ്രകാരം കേരളത്തിലെ ഒരു മുൻ ഡിജിപി ശിക്ഷിക്കപ്പെടുന്ന അപൂർവ സംഭവമാണിത്.

വിധിക്ക് പിന്നാലെ പോലീസ് സേനയ്ക്കുള്ളിലും രാഷ്ട്രീയ കേന്ദ്രങ്ങളിലും വിഷയം ചൂടേറിയ ചർച്ചയായിട്ടുണ്ട്. ഒരേ കാലഘട്ടത്തിൽ ഒരേ കേഡറിൽ ഉയർന്ന പദവികൾ വഹിച്ച രണ്ട് മുൻ ഡിജിപിമാർ തമ്മിലുള്ള പഴയകാല ഭിന്നതകളും തർക്കങ്ങളും വീണ്ടും ഓർമിപ്പിക്കുന്നതാണ് ശ്രീലേഖയുടെ ഈ തുറന്ന പ്രതികരണമെന്നാണ് പൊതുവെയുള്ള വിലയിരുത്തൽ. സോഷ്യൽ മീഡിയയിൽ നിമിഷനേരം കൊണ്ട് ശ്രീലേഖയുടെ കുറിപ്പ് വൈറലായിക്കഴിഞ്ഞു.

---------------

Hindusthan Samachar / Roshith K