Lucknow , 20 സെപ്റ്റംബര് (H.S.)

ലഖ്നൗ: ഉത്തർപ്രദേശിൽ വരാനിരിക്കുന്ന നിയമസഭാ തെരഞ്ഞെടുപ്പിൽ ഓരോ മണ്ഡലത്തിലും ഭാരതീയ ജനതാ പാർട്ടിയുടെ (ബിജെപി) വോട്ട് വിഹിതത്തിൽ 27,000 വോട്ടുകളുടെ കുറവുണ്ടാക്കാൻ സമാജ്വാദി പാർട്ടി പ്രവർത്തിക്കുമെന്ന് പാർട്ടി ദേശീയ അധ്യക്ഷൻ അഖിലേഷ് യാദവ് വ്യക്തമാക്കി. ലഖ്നൗവിൽ പാർട്ടി ഭാരവാഹികളുടെ യോഗത്തിന് ശേഷം സംസാരിക്കുകയായിരുന്നു അദ്ദേഹം.

ഇന്ന് ഞങ്ങൾ പാർട്ടി ഭാരവാഹികളുടെ യോഗം ചേർന്നു. 2027-ഓടെ ഓരോ നിയമസഭാ മണ്ഡലത്തിലും ഞങ്ങളുടെ വോട്ട് വിഹിതം 27,000 ആയി വർദ്ധിപ്പിക്കാൻ ഞങ്ങൾ തീരുമാനിച്ചു. മറ്റൊരു തരത്തിൽ പറഞ്ഞാൽ, ഓരോ മണ്ഡലത്തിലും ബിജെപിയുടെ വോട്ടുകൾ 27,000 കുറയ്ക്കുക എന്നതാണ് ഇതിനർത്ഥം, മുൻ മുഖ്യമന്ത്രി കൂടിയായ അഖിലേഷ് യാദവ് പറഞ്ഞു.

ഈ ലക്ഷ്യം കൈവരിക്കുന്നതിനായി പാർട്ടി സാങ്കേതികവിദ്യ പ്രയോജനപ്പെടുത്തുമെന്നും പ്രവർത്തകർ വീടുകൾ തോറും കയറിയിറങ്ങി ജനങ്ങളുടെ പ്രശ്നങ്ങളും ആശങ്കകളും മനസ്സിലാക്കുമെന്നും അദ്ദേഹം കൂട്ടിച്ചേർത്തു. ജനങ്ങൾക്ക് നീതിയും അന്തസ്സും ഉറപ്പാക്കാൻ സമാജ്വാദി പാർട്ടി ഒപ്പമുണ്ടാകുമെന്നും അദ്ദേഹം വ്യക്തമാക്കി.

യോഗി സർക്കാരിനെതിരെ രൂക്ഷവിമർശനം

ഉത്തർപ്രദേശിലെ തൊഴിലില്ലായ്മ, പരീക്ഷാ ചോദ്യപേപ്പർ ചോർച്ച, വ്യാവസായിക നിക്ഷേപം എന്നീ വിഷയങ്ങളിൽ യോഗി ആദിത്യനാഥ് സർക്കാരിനെതിരെ അഖിലേഷ് യാദവ് രൂക്ഷമായ വിമർശനം ഉന്നയിച്ചു:

-

തൊഴിലില്ലായ്മയും ചോദ്യപേപ്പർ ചോർച്ചയും: യുവാക്കൾ രൂക്ഷമായ തൊഴിലില്ലായ്മ നേരിടുകയാണെന്നും സംവരണ ആനുകൂല്യങ്ങൾ ജനങ്ങൾക്ക് കൃത്യമായി ലഭിക്കുന്നില്ലെന്നും അദ്ദേഹം ആരോപിച്ചു. സർക്കാർ ജോലികൾ നൽകാതിരിക്കാൻ വേണ്ടിയാണ് പലപ്പോഴും ചോദ്യപേപ്പർ ചോർച്ചകൾ ആസൂത്രണം ചെയ്തതെന്നും രാജ്യത്ത് ഏറ്റവും കൂടുതൽ ചോദ്യപേപ്പർ ചോർച്ച റിപ്പോർട്ട് ചെയ്തത് യുപിയിലാണെന്നും അദ്ദേഹം കുറ്റപ്പെടുത്തി.

-

നിക്ഷേപ വാഗ്ദാനങ്ങൾ: വലിയ വ്യവസായങ്ങളും നിക്ഷേപങ്ങളും കൊണ്ടുവരുമെന്ന് വാഗ്ദാനം നൽകി കർഷകരിൽ നിന്ന് ഭൂമി ഏറ്റെടുത്തെങ്കിലും അവിടെയൊന്നും നിക്ഷേപം എത്തിയിട്ടില്ല. കർഷകർക്ക് അർഹമായ നഷ്ടപരിഹാരമോ പുതുക്കിയ സർക്കിൾ നിരക്കിലുള്ള തുകയോ ലഭിച്ചില്ലെന്നും അദ്ദേഹം ചൂണ്ടിക്കാട്ടി.

സമാജ്വാദി പാർട്ടി പരിഭ്രാന്തിയിലാണെന്ന് ബിജെപി

അഖിലേഷ് യാദവിന്റെ പ്രസ്താവനയ്ക്ക് പിന്നാലെ രൂക്ഷമായ പ്രതികരണവുമായി ബിജെപിയും രംഗത്തെത്തി. തെരഞ്ഞെടുപ്പ് തോൽവി ഭയന്ന് സമാജ്വാദി പാർട്ടി പരിഭ്രാന്തിയിലാണെന്ന് ഉത്തർപ്രദേശ് മന്ത്രി അനിൽ രാജ്ഭർ പറഞ്ഞു. ജനങ്ങളെ, പ്രത്യേകിച്ച് ദളിത് വിഭാഗങ്ങളെ തെറ്റിദ്ധരിപ്പിക്കാൻ അടിസ്ഥാനരഹിതമായ വീഡിയോകളും റീലുകളും നിർമ്മിച്ച് സമാജ്വാദി പാർട്ടി സോഷ്യൽ മീഡിയയെ ദുരുപയോഗം ചെയ്യുകയാണെന്ന് അദ്ദേഹം ആരോപിച്ചു.

ഡോ. ബി.ആർ. അംബേദ്കറുമായി ബന്ധപ്പെട്ട സ്മാരകങ്ങളും പാർക്കുകളും നവീകരിക്കാനും സൗന്ദര്യവൽക്കരിക്കാനും സംസ്ഥാന സർക്കാർ ഓരോ മണ്ഡലത്തിലും പ്രത്യേക പദ്ധതികൾ ആരംഭിച്ചിട്ടുണ്ടെന്നും, ഈ വികസന പ്രവർത്തനങ്ങൾ കണ്ട് അഖിലേഷ് യാദവും പാർട്ടിയും വിറളിപൂണ്ടിരിക്കുകയാണെന്നും അനിൽ രാജ്ഭർ പറഞ്ഞു.

---------------

Hindusthan Samachar / Roshith K