Thiruvananthapuram , 20 സെപ്റ്റംബര് (H.S.)

തിരുവനന്തപുരം: സംസ്ഥാനത്ത് രൂക്ഷമായ വൈദ്യുതി പ്രതിസന്ധി ആരംഭിച്ച് ഇരുപത് ദിവസം പിന്നിട്ടിട്ടും ശാശ്വത പരിഹാരം കണ്ടെത്താനാകാതെ സർക്കാർ സംവിധാനങ്ങളും കെഎസ്ഇബിയും ഇരുട്ടിൽ തപ്പുന്നു. കനത്ത ചൂടും ആവശ്യകതയിലെ വൻ വർധനവും കാരണം പ്രതിദിന ഉപഭോഗം റെക്കോർഡ് നിലവാരത്തിലേക്ക് ഉയർന്നതോടെ സംസ്ഥാനം കടുത്ത പവർകട്ട് ഭീഷണിയിലാണ്. ഇന്നലെയും വൈദ്യുതി ഉപയോഗം 97 ദശലക്ഷം യൂണിറ്റിന് മുകളിലായിരുന്നു രേഖപ്പെടുത്തിയത്. പ്രതിസന്ധി അയവില്ലാതെ തുടരുന്ന സാഹചര്യത്തിൽ സംസ്ഥാനത്ത് ഇന്നും വൈദ്യുതി നിയന്ത്രണം ഏർപ്പെടുത്തുമെന്ന് അധികൃതർ അറിയിച്ചു.

പരിഹാരം കാണാതെ കെഎസ്ഇബി നീക്കങ്ങൾ

പ്രതിസന്ധിക്ക് പരിഹാരം കാണാനായി കേരളത്തിന് പുറത്തുള്ള ഏജൻസികളുമായും കേന്ദ്ര ഊർജ നിലയങ്ങളുമായും കെഎസ്ഇബി ഉന്നത ഉദ്യോഗസ്ഥർ നിരന്തര ചർച്ചകൾ നടത്തിയെങ്കിലും ആവശ്യമായ വൈദ്യുതി ലഭ്യത ഇതുവരെ ഉറപ്പാക്കാൻ കഴിഞ്ഞിട്ടില്ല. ന്യൂക്ലിയർ പവർ കോർപ്പറേഷൻ അടക്കമുള്ളവരുമായി കെഎസ്ഇബി ചെയർമാൻ ഉൾപ്പെടെയുള്ളവർ ചർച്ചകൾ നടത്തിയെങ്കിലും അധിക വൈദ്യുതി ലഭ്യമാക്കുന്നതിൽ അന്തിമ ധാരണയായിട്ടില്ല. മറ്റ് സംസ്ഥാനങ്ങളിൽ നിന്ന് വൈദ്യുതി എത്തിക്കുന്നതിനുള്ള ചർച്ചകൾക്കായി കെഎസ്ഇബി ഡയറക്ടർമാർ ഡൽഹിയിൽ ക്യാമ്പ് ചെയ്യുന്നുണ്ടെങ്കിലും വിപണിയിലെ കടുത്ത ക്ഷാമം തിരിച്ചടിയാവുകയാണ്. രാജ്യത്താകെ വൈദ്യുതി ഡിമാൻഡ് ഉയർന്നതിനാൽ പവർ എക്സ്ചേഞ്ചുകളിൽ നിന്നോ തത്സമയ വിപണിയിൽ നിന്നോ കൂടിയ വില നൽകിയാലും വൈദ്യുതി വാങ്ങാൻ കിട്ടാത്ത അവസ്ഥയാണുള്ളത്.

ഉപഭോഗം കുതിച്ചുയരുന്നു, ലഭ്യതയിൽ വൻ ഇടിവ്

സംസ്ഥാനത്ത് മഴ ഗണ്യമായി കുറഞ്ഞതും അന്തരീക്ഷ താപനില ഉയർന്ന നിലയിൽ തുടരുന്നതുമാണ് ഉപഭോഗം കുത്തനെ ഉയരാൻ ഇടയാക്കിയത്. വൈകുന്നേരങ്ങളിലെ പീക്ക് സമയങ്ങളിൽ ശരാശരി 700 മുതൽ 900 മെഗാവാട്ട് വരെ വൈദ്യുതിയുടെ ലഭ്യതക്കുറവാണ് സംസ്ഥാനം ഇപ്പോൾ നേരിടുന്നത്. ഇന്നലെ രേഖപ്പെടുത്തിയ 97 ദശലക്ഷം യൂണിറ്റിലധികം ഉപയോഗത്തിൽ ഭൂരിഭാഗവും സംസ്ഥാനത്തിന് പുറത്തുനിന്ന് എത്തിച്ച വൈദ്യുതിയെ ആശ്രയിച്ചാണ് മുന്നോട്ടുപോയത്. ഡാമുകളിലെ ജലനിരപ്പ് മുൻവർഷത്തെ അപേക്ഷിച്ച് ഗണ്യമായി കുറഞ്ഞത് ആഭ്യന്തര ജലവൈദ്യുത ഉത്പാദനത്തെയും പ്രതികൂലമായി ബാധിച്ചിട്ടുണ്ട്.

പീക്ക് സമയങ്ങളിൽ നിയന്ത്രണം തുടരും

വൈകുന്നേരം 6:15 നും രാത്രി 12:45 നും ഇടയിലുള്ള സമയങ്ങളിൽ ഗ്രിഡ് തകരാറിലാകാതിരിക്കാൻ വിവിധ മേഖലകളിൽ ഘട്ടംഘട്ടമായി ലോഡ് ഷെഡിങ് ഏർപ്പെടുത്താനാണ് സാധ്യത. ഗ്രിഡ് ഫ്രീക്വൻസി നിയന്ത്രിക്കുന്നതിനായി ഇന്നലെയും പലയിടങ്ങളിലും മുൻകൂട്ടി അറിയിക്കാതെ വൈദ്യുതി വിച്ഛേദിക്കേണ്ടി വന്നിരുന്നു. ഈ മാസം മുഴുവൻ നിയന്ത്രണം തുടരാനാണ് സാധ്യതയെന്ന് വിലയിരുത്തപ്പെടുന്നു.

പ്രതിസന്ധി രൂക്ഷമായ സാഹചര്യത്തിൽ പൊതുജനങ്ങളും വാണിജ്യ സ്ഥാപനങ്ങളും വൈകുന്നേരങ്ങളിൽ വൈദ്യുതി ഉപയോഗം പരമാവധി കുറയ്ക്കണമെന്നും, ഉയർന്ന വൈദ്യുതി ആവശ്യമുള്ള ഉപകരണങ്ങളുടെ ഉപയോഗം പീക്ക് സമയങ്ങളിൽ ഒഴിവാക്കണമെന്നും കെഎസ്ഇബി അഭ്യർത്ഥിച്ചു. ദീർഘകാല കരാറുകൾ പുനഃസ്ഥാപിക്കുന്നതിലും ബദൽ ഊർജ സ്രോതസ്സുകൾ ഏകോപിപ്പിക്കുന്നതിലും സർക്കാരിന്റെ ഭാഗത്തുനിന്നുണ്ടായ മുൻകരുതൽ ഇല്ലായ്മയാണ് നിലവിലെ സാഹചര്യത്തിന് കാരണമെന്ന വിമർശനവും ഇതിനോടകം ശക്തമായിട്ടുണ്ട്.

---------------

Hindusthan Samachar / Roshith K