Wayanad , 20 സെപ്റ്റംബര് (H.S.)

വയനാട്: ഏറെ രാഷ്ട്രീയ വിവാദങ്ങൾക്ക് വഴിവെച്ച മെസി തട്ടിപ്പ് കേസിൽ പ്രതി ആന്റോ അഗസ്റ്റിൻ അന്വേഷണ സംഘത്തിന് നൽകിയിരിക്കുന്ന മൊഴി മുൻ സർക്കാരിനെതിരെയെന്ന് മന്ത്രി ഒ. ജെ. ജനീഷ്. പുറത്തുവന്ന പുതിയ മൊഴികളുടെയും വെളിപ്പെടുത്തലുകളുടെയും പശ്ചാത്തലത്തിൽ ജനങ്ങളോട് കൃത്യമായ മറുപടി പറയേണ്ട ബാധ്യത ഇപ്പോൾ പ്രതിപക്ഷത്തിനാണെന്ന് മന്ത്രി മാധ്യമങ്ങളോട് സംസാരിക്കവെ വ്യക്തമാക്കി. കേസിൽ മുൻ സർക്കാരിലെ ഉന്നതരുടെ പങ്കിലേക്ക് വിരൽ ചൂണ്ടുന്ന വിവരങ്ങളാണ് പുറത്തുവന്നിട്ടുള്ളതെന്നും അദ്ദേഹം കൂട്ടിച്ചേർത്തു.

ആന്റോ അഗസ്റ്റിനെതിരെ അന്വേഷണ ഏജൻസികൾ പരിശോധനകളും നടപടികളും ശക്തമാക്കിയ ഘട്ടങ്ങളിലെല്ലാം അദ്ദേഹത്തെ സംരക്ഷിക്കാൻ പ്രതിപക്ഷ നേതാക്കൾ അസാധാരണമായ തിടുക്കത്തോടെ രംഗത്തെത്തിയിരുന്നു. തട്ടിപ്പുമായി ബന്ധപ്പെട്ട അന്വേഷണം മുന്നോട്ട് പോയാൽ അതിന്റെ അവസാനത്തെ പന്ത് ചെന്നുനിൽക്കുന്നത് പ്രതിപക്ഷത്തിന്റെ കോർട്ടിലായിരിക്കും എന്ന കൃത്യമായ ബോധ്യമാണ് അന്ന് പ്രതിപക്ഷ നേതാക്കളെ ഇത്തരമൊരു പ്രതിരോധം തീർക്കാൻ പ്രേരിപ്പിച്ചതെന്ന് മന്ത്രി ആരോപിച്ചു. സത്യങ്ങൾ പുറത്തുവരുമ്പോൾ തങ്ങളുടെ പങ്ക് വെളിച്ചത്താകുമെന്ന ഭയമാണ് ഈ സംരക്ഷണത്തിന് പിന്നിലുണ്ടായിരുന്നത്.

മെസി തട്ടിപ്പ് സാധാരണക്കാരെ കബളിപ്പിച്ച ഗൗരവകരമായ സാമ്പത്തിക ക്രമക്കേടാണ്. അത്തരമൊരു തട്ടിപ്പിൽ ഭരണ-രാഷ്ട്രീയ സംവിധാനങ്ങളുടെ സ്വാധീനം മുൻകാലത്ത് എങ്ങനെ ഉപയോഗിക്കപ്പെട്ടു എന്നത് വിശദമായ അന്വേഷണത്തിലൂടെ മാത്രമേ പൂർണ്ണമായും പുറത്തുവരൂ. അന്വേഷണം സുതാര്യമായും ശക്തമായും മുന്നോട്ട് പോകുന്ന ഘട്ടത്തിലാണ് മുൻ ഭരണകാലത്തെ ഇടപാടുകളിലേക്കും ബന്ധങ്ങളിലേക്കും വിരൽ ചൂണ്ടുന്ന മൊഴികൾ പ്രതിയിൽ നിന്ന് തന്നെ രേഖപ്പെടുത്തപ്പെട്ടിരിക്കുന്നത്. ഇത് പ്രതിപക്ഷത്തിന്റെ ഇതുവരെയുള്ള എല്ലാ രാഷ്ട്രീയ ആരോപണങ്ങളുടെയും മുനയൊടിക്കുന്നതാണെന്നും മന്ത്രി ചൂണ്ടിക്കാട്ടി.

തട്ടിപ്പുകാരെ സംരക്ഷിക്കുന്ന നിലപാടല്ല നിലവിലെ സർക്കാരിനുള്ളത്. അഴിമതിയും തട്ടിപ്പും നടത്തിയവർ എത്ര ഉന്നതരായാലും അവരെ നിയമത്തിന് മുന്നിൽ കൊണ്ടുവരിക തന്നെ ചെയ്യും. മുൻ സർക്കാരിന്റെ കാലത്ത് നടന്ന വഴിവിട്ട സഹായങ്ങളും ഒത്താശകളും സംബന്ധിച്ച് ജനങ്ങൾക്ക് മുന്നിൽ വിശദീകരിക്കാൻ പ്രതിപക്ഷ നേതൃത്വം തയ്യാറാകണം. പ്രതിരോധം തീർത്തതുകൊണ്ട് മാത്രം യഥാർത്ഥ വസ്തുതകളെ മൂടിവെക്കാൻ കഴിയില്ലെന്നും, അന്വേഷണം നിയമപരമായ വഴിയിലൂടെ മുന്നോട്ട് നീങ്ങി കുറ്റക്കാരെ മുഴുവൻ നിയമത്തിന് മുന്നിൽ എത്തിക്കുമെന്നും മന്ത്രി ഒ. ജെ. ജനീഷ് വ്യക്തമാക്കി.

---------------

Hindusthan Samachar / Roshith K