Puruliya , 20 സെപ്റ്റംബര് (H.S.)

പുരുലിയ: തൃണമൂൽ കോൺഗ്രസ് (ടി.എം.സി) ഭരണകാലത്ത് കുർമി സമുദായക്കാരുടെ പ്രക്ഷോഭവുമായി ബന്ധപ്പെട്ട് രജിസ്റ്റർ ചെയ്ത മുഴുവൻ കേസുകളും പശ്ചിമ ബംഗാൾ സർക്കാർ പിൻവലിക്കുമെന്ന് മുഖ്യമന്ത്രി സുവേന്ദു അധികാരി വ്യക്തമാക്കി. പുരുലിയ ജില്ലയിൽ സംഘടിപ്പിച്ച 'കരം' ഉത്സവ പരിപാടിയിൽ പങ്കെടുത്ത് സംസാരിക്കവെയാണ് അദ്ദേഹം ഇക്കാര്യം അറിയിച്ചത്. മുൻ ഭരണകൂടം കുർമി വിഭാഗത്തിനിടയിൽ ഭിന്നതയുണ്ടാക്കുകയല്ലാതെ അവരുടെ ക്ഷേമത്തിനായി ഒന്നും ചെയ്തിട്ടില്ലെന്നും അദ്ദേഹം ആരോപിച്ചു.

നിയമസഭാ തിരഞ്ഞെടുപ്പിന് മുന്നോടിയായി ബി.ജെ.പിയുടെ 'സങ്കൽപ പത്ര'ത്തിൽ നൽകിയ വാഗ്ദാനങ്ങളെല്ലാം സർക്കാർ പാലിക്കുമെന്ന് മുഖ്യമന്ത്രി പറഞ്ഞു. മുൻ സർക്കാർ കുർമി സമുദായത്തെ ഭിന്നിപ്പിക്കാനാണ് ശ്രമിച്ചതെന്നും അവർ ഐക്യത്തോടെ തുടരുന്നത് ആഗ്രഹിച്ചിരുന്നില്ലെന്നും അദ്ദേഹം ചൂണ്ടിക്കാട്ടി. ഈ വർഷത്തെ സംസ്ഥാന ബജറ്റിൽ കുർമി വിഭാഗത്തിന്റെ വികസനത്തിനായി 50 കോടി രൂപ വകയിരുത്തിയിട്ടുണ്ടെന്നും വരും ദിവസങ്ങളിൽ ഈ തുക വർദ്ധിപ്പിക്കുമെന്നും അദ്ദേഹം വ്യക്തമാക്കി.

കുർമി വിഭാഗം പ്രധാനമായും സംസാരിക്കുന്ന 'കുർമാലി', വടക്കൻ ബംഗാളിലെ രാജ്ബൻഷി സമുദായത്തിന്റെ ഭാഷയായ 'രാജ്ബൻഷി' എന്നിവ ഭരണഘടനയുടെ എട്ടാം ഷെഡ്യൂളിൽ ഉൾപ്പെടുത്താൻ സംസ്ഥാന സർക്കാർ നടപടി സ്വീകരിക്കുമെന്നും സുവേന്ദു അധികാരി ഉറപ്പുനൽകി. ഇതിനുപുറമെ, കുർമി ഡെവലപ്മെന്റ് ബോർഡിന്റെ പ്രവർത്തനം ഉടൻ തന്നെ പുനരാരംഭിക്കുമെന്നും അദ്ദേഹം കൂട്ടിച്ചേർത്തു.

2022-ൽ തൃണമൂൽ ഭരണകാലത്ത് പട്ടികവർഗ്ഗ (എസ്.ടി) പദവി ആവശ്യപ്പെട്ടും കുർമാലി ഭാഷ ഭരണഘടനയുടെ എട്ടാം ഷെഡ്യൂളിൽ ഉൾപ്പെടുത്തണമെന്ന് ആവശ്യപ്പെട്ടും കുർമി വിഭാഗക്കാർ പശ്ചിമ ബംഗാളിലെ പടിഞ്ഞാറൻ ജില്ലകളിൽ റോഡ്-റെയിൽ ഉപരോധങ്ങൾ ഉൾപ്പെടെയുള്ള വലിയ പ്രക്ഷോഭങ്ങൾ നടത്തിയിരുന്നു. അന്ന് പ്രക്ഷോഭകർക്കെതിരെ ചുമത്തിയ കേസുകളാണ് നിലവിലെ സർക്കാർ പിൻവലിക്കാൻ തീരുമാനിച്ചിരിക്കുന്നത്.

---------------

Hindusthan Samachar / Roshith K